Гочаланы Борис бла Нина бирге жашагъанлы бу кюнледе 35 жыл толгъанды. Ала тау адетлеге кёре ариу къылыкълы сабийле ёсдюрюп, алагъа билим алдырып, юлгюге тутарча юйюр къурагъандыла. Къызлары Жаннет энди кеси да юйюрлю болгъанды, бир жашлары Мухтар къыралын къоруулагъан органлада ишлейди, ючюнчюлери Мурат предпринимательлик ишин бардырады, эм гитчелери Таулан да кеси юйюрюню башчысы, тутуругъу болуп турады. Ала барысы да намыслары-сыйлары жюрюген адамладыла.
Былайда энчи да Нинаны юсюнден айтырыгъым келеди. Ол хунерли, жигит тиширыу жашагъан ёмюрюнде бир инсаннга хата жетдиргенни къой, уллу окъуна сёлешген болмаз. Кесини адамлыгъы, халаллыгъы бла эллилеринден хурмет да тапханды.
Гитчелигинден да аны музыка жанына хунерлиги уллу эди. Ол Искусстволаны Шимал-Кавказ къырал институтуну колледжин тауусханды. Алгъа «Аязчыкъ» ансамбльде тепсегенди, ызы бла Тёбен Чегемни орта школуна музыкадан устаз болуп ишлерге чакъырадыла да, анда сегиз жыл урунады. Артда уа элни Маданият юйюню художестволу башчысы болады.
Сабийлери да, аналарыча, фахмулуладыла. «Салам Алейкум» телерадиофестивальда тёртюсю да алчы жерлени алып тургъандыла. Отарланы Омар атлы конкурсда уа Нинаны кесине да иги жырлагъаны ючюн тийишли багъа берилген эди. Къызы Жаннет 2007 жылда «Мисс балкарочка» деген ат бла бардырылгъан район конкурсда алчы жерге чыкъгъанды.
Нина Николаевнаны кесими эм сюйген устазларымы санына къошама, не заманда да уллу сюймеклигим бла эсиме тюшюреме, кёрсем бек къууанама. Аны дерслеринде энчи сюйюп олтуруучу эдим. Маданият юйде бардырылгъан ишлеге да тири къатышып тургъанма. Ол ишин билген, сабийлени кеси баласыча кёрген, бир уллу жюреги болгъан адамды.
КъМР-ни сыйлы журналисти Шауаланы Разият Нина Николаевнаны юсюнден былай айтады: «Биз бирге ёсгенбиз, бек татлы къоншула эдик. Нинаны тукъумундан билирге боллукъду оруслу болгъанын ансы, не ишинде, не сёзюнде, не намыс жюрютюуюнде таулу тюйюлдю деп айтхан къыйынды. Атама жюз жыл болады, ол былай айтыучуду хар заманда да: Нинаны атасы Коляны къыйыны тиймеген Тёбен Чегемде бир юй болмаз, ол бир алтын адам эди».
Былайда Нинаны атасысыны юсюнден сёзге къошулмай болмайма. Николай Шихов Чегем ауузунда хар юйге чыракъ тартханды десем, ётюрюк болмаз. Ол жанына аны хунери бирда болмагъанча уллу эди. Жырлагъан да ариу этгенди, къыл къобузну да уста сокъгъанды. Жарсыугъа, дуниядан эртте кетгенди.
Нинаны анасы Керекмезланы Чомайны къызы Азиза да халкъ жырлагъа уста. Бюгюн да, Аллахны ахшылыгъындан, сабийлерине, аладан туугъанлагъа къууанып жашайды. Баям, эгечибиз Нинагъа да атасындан бла анасындан келген болур илхам да, фахму да.
БАЙТУУГЪАНЛАНЫ Исмайыл,
РФ-ни Журналистлерини
союзуну члени.
