Кёп болмай Росгвардияны КъМР-де ОМОН бёлюмюню офицерлери Ново-Ивановское элни 7-чи номерли лицейини профильли классыны окъуучуларын кадетлеге алыу бла байламлы къууанч жыйылыугъа къатышхандыла.
Муниципалитетни келечилерини, росгвардиячыланы, устазларыны, жууукъ-ахлуларыны аллында окъуучула бет жарыкълы къуллукъ бардырыргъа – кадетни уставын бузмазгъа, классларыны сыйын сакъларгъа эм иги окъургъа ант бергендиле.
- Бюгюнден сиз къуллукъ этип башлагъансыз. Келир заманда сизни къауумугъуздан иги кесек адам, Росгвардияны тизмелерине къошулуп, Ата журтларын къорууларыкъларына бек ышанама,- дегенди полицияны полковниги Мухтар Б.
Май районну администрациясыны башчысы Татьяна Саенко уа Къабарты-Малкъарда кадет тебиулюкню айнытханлары ючюн Росгвардияны офицерлерине ыразылыгъын билдиргенди.
Жыйылыуну ахырында росгвардиячыла кадетле бла аланы ата-аналарына ведомстволу вузлагъа къалай кирирге боллугъун, аладан биринчи не затла изленириклерин эм курсантлагъа этилген льготаланы юсюнден да айтхандыла.