КъМР-ни Башчысы Казбек Коков эм «Фахму эм жетишим» деген билим бериуге себеплик этген фондну оноучусу, «Билим бериу» миллет проектни жамауат-иш советини председатели Елена Шмелева «Антарес» араны Къабарты-Малкъар Республикада сабийлеге эм жаш тёлюге чыгъармачылыкъ, спорт, билим бериу эм илму жаны бла болушлукъ бериу,  онгларын эм фахмуларын  айнытыугъа Себеплик этиу советни регион арасыны жыйылыуун бардыргъанды, деп билдиргендиле республиканы оноучусуну пресс-службасындан.

Жыйылыугъа   Къырал Думаны депутатлары Геккиланы Заур  бла  Витория Родина, КъМР-ни Башчысыны Администрациясыны таматасы Мухамед Кодзоков,  КъМР-ни Парламентини Председателини орунбасары Мурат Карданов, КъМР-ни Парламентини Билим бериу жаны бла комитетини председатели Нина Емузова, КъМР-ни Парламентини депутаты Мухамед Кудалиев, КъМР-ни жарыкъландырыу, илму эмда жаш тёлюню ишлери жаны бла министри Анзор Езаов, Нальчини администрациясыны башчысы Таймураз Ахохов, Сбербанкны Къабарты-Малкъар бёлюмюню таматасы       Залина Бейтуганова, Бийик тау институтуну  оноучусу Беккиланы Мухтар,   Битеукавказ жаш тёлю тренинг араны башчысы Екатерина Борисевич,   Къабарты-Малкъар къырал университетни компьютер технологияла эм информация къоркъуусузлукъ жаны бла кафедрасыны профессору, Эксперт советни келечиси Татьяна Хаширова, ВКС амала бла жыйылыугъа «Ай Ти Ви Групп» компанияны генеральный директору Алтуланы Мурат бла «КАВКАЗ.РФ» акционер обществону генеральный директору Хасан Тимижев къатышхандыла. 

КъМР-ни Башчысы Казбек Коков жыйылыуну ача, «Антарес» республикагъа магъаналы проект болгъанын белгилегенди. Ара 2019 жылда «Хар сабийни жетишими» деген федерал проектни чеклеринде бардырылыргъа деп къуралгъанды. «Биз аны къуралыууна уллу эс бургъанбыз, анга сейирлерин битеу бёлюмлени оноучулары бёллгенлерин,   энчи белгилерге сюеме. Мен кесим аны къуралыуу  соруулары бла кюрешгенме. Араны Нальчикни сабий санаториясыны мурдорунда къуралгъаны уа, аны  сабийлеге биягъы къуллукъ этерге, башха качествода къайтханын белгилерчады. Араны къураргъа республика 213 миллион сом алгъанды, андан сора да республикалы бюджетден ырысхыла да бёлюнгендиле. Бюгюнлюкде Ара бизни сабийлерибизни фахмуларын ачыкъларгъа эм андан ары да ёсдюрюрге себеплик этеди.      Ол жетишим Россейни Президенти Владимир Путин салгъан  борчладан бириди», -дегенди Казбек Коков. 

Елена Шмелева  кенгешге къатышханлагъа салам бергенди эм  Къабарты-Малкъар къошакъ халда билим бериуде кёп иги затла этгенин четргенди  «энди   баш борч  сабийле  кеслерин  ачыкълар ючюн онгла берирге керекди, ол себепден инфраструктураны комплексли айнытыу эм квалификация кадрланы хазырлау, ала хар заманда да керек затладыла».

«Сиз тюз жолну сайлагъансыз, нек дегенде, республиканы битеу районларыны  программагъа тюшерге бирча тенг онглары барды, ол бюгюнлюкде  уллу  магъананы тутады. Регион ара этген затла, ала барысы да «Сириусну» модели бла бизни специалистлерибиз берген рекомендациялагъа кёре тамамланадыла. Салыннган борчну  бир-бирини ызындан толтура барырча,  сиз кесигизге, сабийлеге да аламат стратегияны сайлагъансыз.

 Битеу партнерланы былай жетишимли ишлегенлери бир затны кёргюзтеди, арагъа тынгылы оноучула айырылгъанларын, хайырланнган стратегия уа- ол барыбызда бир  стратегияды», - дегенди Елена Шмелева.  

Казбек Коков ёсюп келген тёлюню билимлерин ёсдюрюрге салгъан къыйыны ючюн, Елена Шмелевагъа ырызылыгъын айтханды. Дагъыда  ол билим берген ишге къатышхан битеу адамаланы «уллу эм къыйматлы ишлерин»  белгилегенди.

 «Ала намысха-сыйгъа тийишлидиле.  Бюгюн аланы къалай ишлегенлерини кёрюмдюлерин сабийлерибизни жетишимлерини юслеринде ангылайбыз.  Биз ол ишлени бютюн терен бардырлыкъбыз. Республикагъа билим бериуню айнытыу- баш борчладан бириди эм келир заманын да аны бла бирге кёребиз», - дегенди Казбек Коков.

Регион араны ишини юсюнден КъМР-ни жарыкъландырыу, илму эм жаш тёлюню ишлери жаны бла министри Анзор Езаов айтханды. Ара фахмулу сабийлени тюрлю-тюрлю бёлюмледе ачыкълау эм алагъа болушлукъ этиу-араны ишини мурдоруду.

«Антарес» араны Эксперт советини ишини юсюнден Татьяна Хаширова   отчёт этгенди эм келир заманда тамамланыркъ затланы юсюнден билдиргенди. Башда сагъынылгъан регион араны оноучусу Джаппуланы Тамара стратегия айнытыуну борчларыны юсюнден тынгылы  айтханды. Келир жылда школчуланы араларында Битеуроссей олимпиаданы муниципал кезиуюн бардыргъанда, республикалы тест программаны хазырларгъа мурат болгъанын ачыкълагъанды.   

Жыйылыуну кезиуюнде «Антарес» орналгъан жерде узакъ элледен келген сабийле кече къала турурча блок къураргъа онг бар эсе деген оюм да айтылагъанды. Анда школчула сменаны кезиуюнде жашаргъа боллукъдула.

 Жыйылыуну ахырында КъМР-ни Башчысы Казбек Коков 2022 жылда  1 мартха дери  къошакъ халда билим алгъан сабийлени санын кёбейтирге рекомендация бергенди, дагъыда къошакъ халда битеулю билим берген  программаланы кенгертирге,  сменаланы къурап бардыргъанда культура, спорт учрежденияла бла байламлыкъны тирилтирге эм шёндюгюлю билим бериу  болумлада  устазланы ол ишге тынгылы хазырларгъа эм педагог кадрла бла  дайым ишлерге кереклисин белгилегенди.

Бизни корр.