Нальчикде  жаш къараучуну театрында  «Биз Россейни инсанларыбыз!» деген проектни чеклеринде  паспортланы бериуге жораланнган къууанчлы жыйылыу болгъанды. Анда 14 жыл толгъан 95 жашха бла къызгъа жашауларында эм магъаналы документлери берилгендиле. Ала барысы да  «Биринчилени атламлары» битеуроссей биригиуге киргенледиле.

Къууанчлы ишге къатышханлагъа  аламат концерт  да кёргюзтюлгенди. Аны «Рирада» жыр студия, «Эдельвейс» жыр  къауум, башхала  да  къурагъандыла. 
«Паспортну ма былай къууанчлы халда бериуню магъанасы уллуду. Аны ол халда алгъан  жаш адам ол кюнню бир заманда да унутурукъ тюйюлдю, андан сора да, ол къыралыны, аны маданиятыны бла тарыхыны бир кесеги болгъанын сезерикди», - дегенди Сабийлени бла жаш тёлюню  «Биринчилени атламлары» битеуроссей биригиулерини правленини таматасы  Григорий Гуров.
Эсгертиу: «Биз Россейни инсанларыбыз!» деген проектни РФ-ни Ич ишле министерствосу бардырады. Ол ёсюп келген тёлюню патриот ниетде юйретиуге жораланады. Быйыл анга 2 мингден аслам муниципалитетден  60 мингден аслам адам къатышханды.