КIуэкIуэ Казбек гъатхэпэм и 16-м Москва къалэм щыIущIащ УФ-м спортымкIэ и министр Матыцин Олег. Ахэр тепсэлъыхьащ Къэбэрдей-Балъкъэрым спорт IэнатIэм зыщегъэужьыным ехьэлIа Iуэхухэм.
ЩIыналъэм и унафэщIымрэ министрымрэ я зэIущIэм нэхъыщхьэу зыщытепсэлъыхьахэм ящыщщ «Спартак» стадионыр, спортым зыщыхуагъасэу, узыншагъэр щрагъэфIакIуэу Тырныауз къалэм дэт «Бахъсэн» спорт комплексыр, «Налшык» спорт комплексыр зэгъэпэщыжыныр, олимп джэгухэм бэнэкIэ хуитымкIэ ехъулIэныгъэхэр щызыIэрызыгъэхьэфыну гугъэ уэзыгъэщI ныбжьыщIэхэм щадэлажьэ, физкультурэ-узыншагъэр щрагъэфIакIуэ комплекс ухуэныр, апхуэдэ дыдэ комплекс боксым зыхуэзыгъасэхэм яхуэщIыныр, Каменномост къуажэм ФОК, Шэрэдж щIыналъэм хыхьэ Безенги, Зэрэгъыж къуажэхэм спорт залхэр щыухуэныр.
ЗэIущIэм щытепсэлъыхьащ лъэпкъ проектхэр гъэзэщIэным и Iуэхуми. «Демографие» лъэпкъ проектым хыхьэ «Спортыр ди псэукIэм и мардэщ» къэрал проектым зэрыщыубзыхуам тету, КъБР-м и Правительствэмрэ УФ-м СпортымкIэ и министерствэмрэ Iэ зытрадза зэгурыIуэныгъэхэм къызэрыщыгъэлъэгъуам ипкъ иткIэ 2020 гъэм республикэм къыIэрыхьащ сом мелуан 360-рэ хуэдиз. КъыхуаутIыпща мылъкур трагъэкIуэдащ спорт IуэхущIапIэхэм я материально-техникэ лъабжьэхэр гъэбыдэным. Яухуащ Iуэху куэдым хуэщIа джэгупIэ губгъуэ 25-рэ, воркаути узыншагъэр щрагъэфIакIуэ комплексхэри хэту. КъимыдэкIэ, Май къалэм дэт спорт школым футбол джэгупIэ къыщызэIуахащ. ЗэфIэкIащ Къэщкъэтау, Къэрэгъэш, Щхьэлыкъуэ къуажэхэм щрагъэкIуэкIа спорт ухуэныгъэхэр, мыгувэу ятынущ Бахъсэн къалэм щаухуа ФОК-мрэ Псыхъурей къуажэм щащIа спорт пэшымрэ.
Дызэрыт илъэсым республикэм спорт IэнатIэм зыщегъэужьыным къэрал субсидиеу къыхуаутIыпщынур сом мелуан 350-м щIигъу хъунущ. Зэман гъунэгъум ирагъэкIуэкIыну ухуэныгъэ нэхъ инхэм ящыщщ иджырей пятиборьем зыщыхуагъэсэну спорт комплекс Налшык къалэм Ашуровым и цIэр зезыхьэ и уэрамым щыухуэныр, ар 2022 гъэм яухын хуейуэ хуагъэуващ. А псом къадэкIуэу, республикэм и Правительствэм а Iуэхухэр зэхьэлIа къэрал министерствэм зэгурыIуэныгъэ ирищIылIащ 2022 - 2023 гъэхэм къриубыдэу яухуэнухэм трагъэкIуэдэну сом мелуан 300-м щIигъу къыхуаутIыпщыныр щыщIэгъэбыдауэ. А мылъкур хухахынущ щIымахуэ спорт лIэужьыгъуэхэм зыщыхуагъэсэну, мыл зытегъэлъэда къэжыхьыпIэрэ физкультурэ-узыншагъэр щрагъэфIакIуэ уни зыхэтыну, щхьэ зытелъ комплексыр ухуэным. АдэкIэ пащэнущ республикэм и спорт школхэр спорт-технологие IэмэпсымэхэмкIэ, нэгъуэщI зыхуеинухэмкIэ къызэгъэпэщыным ехьэлIа лэжьыгъэхэм, ГТО-м и мардэхэр щагъэзэщIэну спорт утыкухэр, нэгъуэщI ухуэныгъэхэр республикэм и къалэхэмрэ щIыналъэхэмрэ щрагъэкIуэкIынущ.
Республикэр ипэкIэ кIуэтэныр зэлъыта унэтIыныгъэ нэхъыщхьэхэм ящыщ зыуэ къонэж цIыху куэд зыхэт спортым зегъэужьыныр, физкультурэ махуэ къэс щIыным цIыху нэхъыбэ къыхэшэныр, спорт ухуэныгъэхэм цIыхухэр екIуэлIэфу, ахэр щыхуейм къагъэсэбэпыфу Iуэхур зэтеухуэныр. КъБР-м СпортымкIэ и министерствэм къызэритамкIэ, республикэм щыпсэу сабийхэмрэ щIалэгъуалэмрэ я процент 82,2-р физкультурэмрэ спортымрэ хэтщ. Республикэм щыпсэухэм я процент 46,3-р махуэ къэс физкультурэ, спорт Iуэхухэм хэту ятхащ 2020 гъэм, ар абы ипэ ита илъэсым зэрыщытам проценти 5-кIэ щIегъу. Я узыншагъэр ирагъэфIэкIуэн мурадкIэ физкультурэ Iуэхухэм хэтхэм я бжыгъэм кIуэ пэтми хохъуэ.
ЗэIущIэм Iэ щытрадзащ физическэ щэнхабзэмрэ спортымрэ щызэдэлэжьэным теухуа зэгурыIуэныгъэм, илъэсиплI пIалъэм тещIыхьауэ. Абы къыщыгъэлъэгъуащ спорт инфраструктурэм зегъэужьыным хуэгъэпса къэрал проектхэмрэ программэхэмрэ щызэдэлэжьэныр, спортым ныбжьыщIэхэр нэхъ жыджэру къыхэшэным ехьэлIа лэжьыгъэхэр, дунейпсо утыкум урысей спортым хуэфэщэн увыпIэ щиIыгъыным ехьэлIа Iуэхухэр, спорт гъэсакIуэхэмрэ егъэджакIуэхэмрэ я Iэзагъэм хагъэхъуэныр, спортым къыщагъэсэбэп Iэмэпсымэхэр республикэм къыщыщIагъэкIыну IуэхущIапIэхэр къызэIухыныр, физическэ щэнхабзэмрэ спортымрэ ятеухуа щIэныгъэ къэхутэныгъэу ирагъэкIуэкIым хэгъэхъуэныр.