«Жылны устазы – 2020» деген Битеуроссей конкурс бир ыйыкъны ичинде Волгоградда бардырылгъанды. Анга къыралны битеу субъектлерини келечилери къатышхандыла. Къабарты-Малкъарны атындан эришиуге Тырныаууз шахарны 5-чи номерли гимназиясыны физкультурадан устазы Фуад Буранов атланнганды. Эсигизге салайыкъ, ол регионда озгъан жылны бек иги устазына саналгъанды.
Быйыл бла Россей даражада бу эришиу 31 кере бардырылады. Специалистле белгилегеннге кёре, аны энчилиги башха жылладан анга къатышханланы араларында эр кишилени саны иги да аслам болгъанындады. Ол шартны конкурсда хорлагъанланы саугъалау байрам жыйылыуда РФ-ни жарыкъландырыу министри Сергей Кравцов да белгилегенди.Устазлагъа сахнадан ыспас эте, ол жамауат алагъа жангы кёзден къарагъанын чертгенди.
-Дунияда эпидемия бла байламлы тюрлениуле билим бериуде да кеслерини ызларын къойгъандыла. Бир къауум заманнга дистанцион окъутууну «татыуун» да сезерге да тюшгенди. Ма ол кезиуде бютюнда бек ангылагъандыла окъуучула, ата-анала да устазны магъаналылыгъын. Мен оюм этгенден, сизни сыйыгъыз бютюнда бийикге кётюрюлгенди, - дегенди ол.
Быйылгъы конкурсну финалына 15 специалист чыкъгъанды. Ызы бла алагъа мастер-классла бардырып, кеслерини хунерлерин ачыкъларгъа тюшгенди. Аны эсеплерине кёре, конкурсда Дондагъы Ростовну келечиси Михаил Гуров хорлагъанды.
Къабарты-Малкъардан Фуад Буранов а «Учительская газета» басманы энчи саугъасы бла белгиленнгенди. Эришиуню къурагъанла айтханнга кёре, аны тарыхында бу энчи номинацияда биринчи кере бериледи физкультурадан устазгъа.
