КъМР-ни Башчысы Казбек Коков бардыргъан «муниципал сагъатны» кезиулю жыйылыуунда республикада эпидемиология болум сюзюлгенди, миллет проектле жашауда къалай бардырылгъанлары, энергоресурсла ючюн тёлеуле тинтилгендиле. Сёз муниципал къуралыуланы сейирлерин сюд органлада къоруулауну юсюнден да баргъанды. Кенгешге Правительствону башчысы Мусукланы Алий, аны биринчи орунбасары Муаед Кунижев, премьер-министрни экинчиси Марат Хубиев, жууаплы министрле, муниципал къуралыуланы оноучулары да къатышхандыла.
Республикада эпидемиология болумну юсюнден айта, Казбек Коков коронавирус жукъгъанланы саны азая баргъанын чертгенди. Бюгюнлюкде госпитальлада 743 адам бардыла, аладан 73-сю реанимация бёлюмде турадыла. Бир кюннге ауруу жукъгъанланы саны азайгъанды. Аны бла байламлы бир ненча госпитальгъа саусузланы келтириу тохтатылгъанды, къалгъанларында болгъан 1235 жерден 62 проценти эркинди. Резервде 450 жер барды.
Иммунизация жумушла андан ары бардырыладыла. Коронавирусха къажау дарман салырча 43 жер ачылгъанды, организациялагъа барып, уколну жеринде этерге амалла да къуралгъандыла. Республикагъа «Гам-Ковид-ВАК» дарманны 8242 дозасы келтирилгенди, 3197 адам аны биринчи кесегин салдыргъандыла, экинчисина – мингден аслам.
Коронавирус жукъгъанланы саны азайып баргъанына да къарамай, республиканы оноучусу айтханыча, алыкъа аурууну жайылыуу бла байламлы кийирилген чеклени кетерирге эрттеди. Сёзге, халкъ аслам къатышхан жыйылыуланы.
Мусукланы Алий миллет проектле бла къырал программала къалай толтурулгъанларын билдиргенди. Аны айтханына кёре, ахча муниципалитетлеге берилгенди. «Къурау жумушланы тамамлагъандан сора проектлени жашауда бардырып башларыкъбыз»,-дегенди ол. Казбек Коков муниципал къуралыуланы башчыларына миллет проектлени тамамлауну кеслерини контрольларында тутаргъа керек болгъанларын эсгертгенди.
Муаед Кунижев энергоресурсла ючюн тёлеуле не халда болгъанларыны юсюнден айтханды. Республиканы Башчысы, анга тынгылап, организацияла тёлеулени къалай этгенлерин сюзерге буюргъанды. «Адамларыбыз газ, суу, ток, башха ресурсла ючюн ахчаны бермейдиле деп ийнанмайма. Муниципалитетлени башчылары организацияла бу ишни къалай бардыргъанларын тинтирге керекдиле»,-дегенди ол эмда, муниципал организациялада тинтиуле бардырып, керекли мадарла толтурургъа буюргъанды.
КъМР-ни Башчысы жууаплы ведомствола квитанцияланы тёлеучюлеге заманында жетдирирге керек болгъанларын да белгилегенди, энергоресурсла ючюн тёлеуле бирикдирилген квитанцияла бла хайырланнганланы санын ёсдюрюрге кереклисини юсюнден да баргъанды сёз. «Тёлеулени кёбейтсек, тарифлени азайтыргъа онг боллукъду. Аны себепли бу жаны бла ишни къатыландырыргъа керекди»,-дегенди ол.
Муниципал къуралыуланы сейирлерин сюд органлада къоруулауну юсюнден энчи айтылгъанды кенгешде. Республиканы Башчысы муниципал ырысхыны къоруулагъанда къаты болургъа кереклисине эс бургъанды. «Закон эркин эте эсе, сюд органлагъа барыргъа керекди. Биз муниципалитетни, районда жашагъанланы сейирлерин сакъларгъа борчлубуз»,-деп чертгенди эмда бу жаны бла иш къалай къуралгъанын сюзерге буюргъанды.
Кенгешде сёз социальный сетьледе Тёбен Чегемде школну халыны, аны жангыртыргъа кереклисини юсюнден басмаланнган билдириуню юсюнден да баргъанды. «Жарсыугъа, быллай осал болумгъа жетген школ жангыз тюйюлдю. Хау, федерал программалада бу жумушлагъа ахча бёлюнмегенди. Алай биз школну жангыртыргъа ахчаны кесибиз табарыкъбыз. Керек болса, аны жерине барып да кёрлюкбюз. Алай республикада билим бериу учрежденияланы быллай осал халгъа жетдирмезге, онг болгъанына кёре, аланы тап халда тутаргъа керекди. Сабийлерибиз школгъа, ол жангы тюйюл эсе да, къууанып, сюйюп кирирча этерге борчлубуз»,-дегенди Казбек Коков.
Муниципал къуралыуланы башчыларына къысха заманны ичинде битеу школлада болуп, аланы халларын сюзерге, тинтиулени эсеплерин Жарыкъландырыу министерствогъа берирге буюрулгъанды.
