КъМР-ни Башчысы Казбек Коков Тырныауузда «Къабарты-Малкъар барыбызны да юйюбюздю» деген районла аралы форумну ишине къатышханды.
Ачыкъ эм тенг халда бардырылгъан ушакъгъа эки жюзден аслам эксперт къатышхандыла. Ол санда халкъда даражалары жюрюген акъсакъалла, депутатла, къырал эм жер-жерли власть органланы, жаш тёлю биригиулени келечилери, жамауат, дин, илму къуллукъчула.
Тюбешиуле тёрт прощадкада бардырылгъандыла. Алада регионну тарыхы, аны шёндюгю болуму, миллет эм битеуроссей энчиликле, динле эм миллетле аралы келишиулюкню жалчытыуну, граждан обществону бирикдириуню эм айнытыуну соруулары, политика эм жаш тёлю институтланы болумлары сюзюлгендиле.
Форумгъа жыйылгъанланы алгъышлай, Казбек Коков Къабарты-Малкъар Республиканы 100-жыллыгъын белгилеуню аллында быллай даражалы тюбешиулени къурау артыкъда магъаналы болгъанын чертгенди: «Бирге жыйылып, тарыхыбызны эсгерирге, къыраллыкъны, миллетлени келишиулюклерини мурдорун салгъан тамата тёлюню эсгерирге онг болгъаны иги жумушду»,-деп чертгенди ол.
Республиканы оноучусу районланы акъсакъалларындан жаш тёлюню сынауларына юйретирлерин, шуёхлукъгъа, халкъ бирге болса, не къыйынлыкъладан да къутулургъа тынч болгъанына, бирге келишиулюкде жашаргъа кереклисине юйретирлерин тилегенди: «Бизде аламат жаш тёлю ёсюп келеди, бизни уа алагъа айтыр затларыбыз бардыла. Ырахматлыкъ жаланда бирлик, бир бирге билеклик, болушлукъ этилген жерде сакъланнганын барыбыз да ангылайбыз»,-деп къошханды ол.
Таматала ёсюп келген тёлюге юлгю болгъанын чертгенди республиканы Башчысы. Ала миллетлерини, тукъумларыны атын къуру сёзле бла угъай, ахшы, магъаналы ишлери бла айтдыргъанларын белгилегенди ол.
Миллетле эм динле аралы къаугъаланы тохтатыуну юсюнден соруугъа жууап бере, Казбек Коков республикада алагъа бир тюрлю сылтау болмагъанын айтханды. Къаугъаланы тышындан къозгъаргъа кюрешедиле. Аны юсюнден РФ-ни Президенти Владимир Путин кёп кере айтханды.
Тышында кючле бизни адет-тёрелерибизни бузаргъа, аланы орунларына сыйсыз ниетлени жаяргъа кюрешедиле. Аны себепли регион эм жер-жерли власть органла Къабарты-Малкъарны даражасын кётюрюр, аны айныуун жалчытыр ючюн къолдан келгенни этерге керекдиле.
Ахырында Казбек Коков форумгъа къатышханлагъа хайырлы ишлерге, республиканы халкъына уа мамырлыкъ, бирлик, келишиулюк, къолайлыкъ тежегенди.