«Машук-2018» билим бериу форумну экинчи сменине къатышыр ючюн Пятигорск шахаргъа  Шимал Кавказдан, Россейни башха регионларындан бла тыш къыралладан мингле бла жаш адамла келгендиле.  Аланы араларында Къабарты-Малкъардан Халкъ мюлкню бла къырал службаны россейли академиясыны Шимал Кавказда филиалында окъугъан Джулина Шихмагомедова да барды.
Экинчи смен граждан обществогъа аталыпды. Аны тренинг программасына  чыгъармачылыкъ («Арт-Машук»), бизнес («Энчи ишинг») эмда къуллукъда кётюрюлюу («Жетишимли болуу») киредиле. Ма аланы хар бирине кёре сейирлик дерсле бардырыллыкъдыла. Бек тириле уа экспертлени сюзюулерине кеслерини проектлерин берликдиле.
-Джулина Шихмагомедова «Музейни дуниясы» деген проектни хазырлагъанды. Аны баш мураты – Шимал-Кавказ федерал округну маданият хазнасын бютюн кёп адам билир эмда ол сакъланыр  ючюн, регионда битеу музейлени мурдорунда квест-майдан (компьютер оюнла) къураргъады.  Апрельни аягъында  аны иши  социал предпринимательство жаны бла  бардырылгъан конкурсну  «Бек иги проект башламчылыкъ» деген  номинациясында баш саугъагъа тийишли  болгъан эди. Энди проектни  «Машукда» къорууларгъа тюшерикди,- дегенди  академияны къырал жумушла бла менеджмент кафедрасыны доценти, социология илмуланы кандидаты Юлия Ильяева.
«Музейни дуниясы» деген проектни  Халкъ мюлкню бла къырал службаны россейли академиясыны Шимал Кавказда филиалыны студентлерини къаууму волонтёрла бла бирге толтурлукъдула.
 -Музейледе квестле бардырыргъа эрттеден мурат этгенме. «Машукда» мени баш борчум - проектими тийишлисича къорууларгъады, керти магъанасын ангылатыргъады. Бизни командабыз бош турмайды: Чеченде тарых музей бизге заказ бергенди. Къысха заманны ичинде биз ол республиканы 200-жыллыгъына аталгъан «Грозныйни жашырынлыкълары» деген сценарий да хазырлагъанбыз. Башха субъектле да проектге эс бурадыла,-дегенди Джулина  Шихмагомедова.
«Машук» жаш тёлю форумда кёргюзтюлген проектлени хар бирин экспертле тинтгенден сора сайланырыкъдыла. Конкурсну грант фонду 83,8 миллион сомду. Экинчи смен 23 августда жабыллыкъды.