КъМР-ни Башчысыны къуллугъун болжаллы халда толтургъан К.В. Коков Правительствону таматалары бла республиканы социал-экономика айныуунда белгиленнген кёрюмдюлерине жетиуню биринчи саналгъан эсеплери жаны бла «контроль сагъат» халда кенгеш бардыргъанды. Къабыл кёрюлген отрасль программаланы жашаугъа кийириу, миллет проектлени регион бёлюмлерини чеклеринде министрлени кабинетинден сакъланнган эсеплени магъаналылыкълары, андан сора да, республикалы проектлени федерал къырал власть органладан финансирование этиу вопросла бла байламлы докладларын КъМР-ни Правительствосуну Председатели Мусукланы А.Т. эм КъМР-ни экономиканы айнытыу министри Рахайланы Б.М. этгендиле.
Белгили кёрюмдюлеге кёре, республикалы бюджетни хайырлылыгъы 8 айгъа 24 миллиард 693 миллион сомдан артыкъ болгъанды, промышленный производствону индекси 2019 жылны январь-август айларына 103,8 процентди, эл мюлк продукцияны ёлчеми 24,5 миллиард сомгъа жетгенди (2018 жылны бу кезиуне 105 процент), декабрьни ахырына бу кёрюмдю, экспертле санагъаныча, 50 миллиарддан атларыкъды.
Бусагъатда федерал ара бла келишимлеге къол салгъаннга кёре регионда миллет проектлени 44 регион кесеклери къабыл кёрюлгендиле. Аланы толтурургъа керекли ырысхы 2019 жылда 5 миллиард 671 минг сом ёлчемде республикагъа келгенди.
«Шимал-Кавказ федерал округну айнытыу» къырал программаны чеклеринде тёрт инвестиция проект тындырыла турады, энтта да алты турист, агропромышленный эм инфраструктура инвестпроектле, Россейни Минкавказында сайлауланы ётюп, быйылгъа кереклиси чакълы бир финансированияны жалчытыу бла къырал программагъа къошулгъандыла. Правительствогъа белгиленнген заман болжалгъа эм графикге кёре предприятияланы хайырланыугъа кийириуню жалчытыргъа, отрасль келишимле жаны бла федерал власть органла бла жангы байламлыкъла къурауну тирилтирге, Къабарты-Малкъарны къырал целевой программалагъа къошулууун кенгертирге борчла салыннгандыла.
Кенешни чегинде республика бюджетни проектин хазырлаугъа эм Къабарты-Малкъарны 2020-2022 жыллада инвестиция программасын тирилтиуге къаралгъанды. Республиканы оноучусу къоранчланы белгилеу къабыл этилгенде баш финанс документни социал магъаналылыгъы сакъланыргъа тийишлисин чертгенди.