Сайлагъан усталыкълары бла жамауатдан ыразылыкъ табып ишлеген врачларыбыз асламдыла, къудуретни ахшылыгъындан. Аллайларыбыздан бириди республикалы клиника больницаны анестезиология бёлюмюню анестезиологу-реаниматологу Жашыуланы Лиза да. Ишине уллу кёллю болмай, ауругъанлагъа эс тапдырып келгенли уа жыйырма беш жылдан атлагъанды.

Озгъан жыл медицинада ишлегенлени къауумун КъМР-ни Парламентини Сыйлы грамоталары бла саугъалагъандыла. Аланы арасында уа Жашууланы къызлары да барды.

Лиза сабийлигинден да мурат этгенди врач усталыкъны сайларгъа. Анасы астмадан къыйналгъаны ючюн ол хар заманда да ауругъан адамгъа себеплик этип ишлегенни жаратханды. Аны себепли Элбрус посёлкада орта школну тауусуп, ызы бла Нальчикде медучилищеге киргенди. Медсестра усталыкъны алгъанындан сора Тырныауузда больницаны хирургия бёлюмюнде, Нальчикде РКБ-да да операциялагъа къатышхан медсестра болуп тургъанды.

Анда белгили адамларыбыз, тутхан ишлери бла айтылгъан докторларыбыз Таукенланы Магометча, Ботталаны Хадисча профессионалланы къатларында ишлей, кёп затха тюшюннгенди. Усталыгъын, билимин да ёсдюрюрге сюйюп, КъМКъУ-ну медицина факультетини багъыу иш бёлюмюне да киреди. Анда окъуй тургъанлай а, ишин да къоймай, ингирде дежурстволагъа жюрюп тургъанды. Алай бла уа бютюнда уллу сынам жыйышдыргъанды.

Терапия ызда интернатураны тауусхандан сора уа, аны Биринчи Чегемде ара район больницагъа жибередиле. Анда терк болушлукъ берген бёлюмню мычымай эс тапдыргъан службасыны врачы болгъанды.

Аны медицинаны эм къыйын ызына – анестезиологиягъа – келирине уа Ботталаны Хадис себепчи болгъанды. Ол таулу къызны РКБ-ны хирургия эмда терк болушлукъ берген бёлюмлеринде къалай ишлегенин кёрюп, аны больницаны анестезиологиясында ишлеп башларча этеди. Андан бери Лиза мында адамлагъа болушлукъ этип, аланы кеслеринден, жууукъ-ахлуларындан да ыразылыкъ тапханлай келеди.

- Не къадар кёп ишлей барсанг, жууаплылыкъны да бекден-бек сезесе. Саусузгъа себеплик эталгъанынгы кёрсенг а, сени бир сейирлик сезим бийлейди. Адамланы сюерге керекди, аланы орунларында кесинг неда бир жууугъунг болуп къалыргъа тюшеригин да унутмазгъа, - дейди ушагъыбызны кезиуюнде ол кеси уа.

Коронавирус къаты жайылгъан заманда Жашыуланы къызлары анга къажау сюелген врачладан бири болгъанды. Ол Нальчикде къуралгъан Ковидден къыйналгъанлагъа болушлукъ этген арада беш айны ичинде себеплик тапдырып тургъанды. Бу ишге къошхан юлюшю ючюн да саугъагъа тийишли болгъанды.

Врач къадарында инсанны саулугъу, аны жашауу къаллай бирге магъаналы болгъанларын кёргенлей келгенликге, сагъынылгъан арада ишлегенинден сора уа жашаугъа кёз къарамы тюрленнгенин жашырмайды. Саусузлагъа бютюн сакъ болгъанын да. Ол кезиуню унуталмазлыгъын, къыйналгъанлагъа болушлукъ этерча хар не да табылып тургъанына ыразылыгъын айтады.

Анестезиологлагъа-реаниматологлагъа ауур саусузну халин тапландыргъан биринчи 30-40 минутну ичинде бютюнда магъаналыды эмда аны бла бирге уа къыйынды. Хар минут да адамны жашауу бла бирге базманда турадыла. Аллай кезиуле уа бу врачлада аз тюйюлдюле.

Ала берген антларына, тутхан ишлерине кертичилей къала, мычымай, борчларын толтура, жууаплылыкъны боюнларына аладыла. Аны себепли бир бирге болушлукъ эте ишлегенлери ючюн Лиза реанимация бёлюмню таматасы Инна Абазовагъа бла коллегасы Геккиланы Жаннетге, бирсилеге да ыразылыгъын билдиреди. Чертирге тийишлиди, больницада иш юсюнде болуп тургъан кезиулеринден сора да, бу ызда ишлеген докторла кече-кюн демей, болушлукъ керек жерге, узагъыракъгъа окъуна, чакъырылыргъа тюшедиле.

Бош заманы аз къалса да, Лиза, усталыгъы бла байламлы литературадан сора да, орус классиканы окъургъа сюеди. Табийгъатдан а къарыу алгъанын айтады. Тенгликни-шуёхлукъну багъалайды, кертичиликни хурметлейди.

Ол дагъыда огъурлу таулу анады. Баш иеси Тюбейланы Руслан бла жаш ёсдюредиле. Магомет а бюгюнлюкде КъМКъУ-ну медицина факультетин бошай турады. Ол да анасыны жолу бла барыргъа – анестезиологияны сайларгъа деп турады. Миллетибизни энчи алып айтханда окъуна, саулукъ сакълауну бу ызында аладан юйренирча белгили профессионалларыбыз Геккиланы Жаннет бла Мызыланы Зарича, Наршауланы Рамазанча, Жашыуланы Лизача, бирсилеча да болгъанлары уа жаш адамлагъа бу жол бла барыргъа юлгюдю.

Мокъаланы Зухура.