Аз тебиу, дайым да олтуруп ишлеу, айхай да, саулукъгъа иги тюйюлдю. Аны бла бирге компьютер, техника айныгъанлары бла адамгъа иш алай кёп къалмайды. Аны осал жанларындан бири уа жаш адамла, сабийле, бирде уа абаданла да телефонла, смартфонла бла кюреше, асыры кёп заман оздургъанларындады.

Врачла, тренерле да юйретгенлерича, кёп заманны тынч турууну хатасын азайтырча, физкультура бла кюреширге, жарау этерге, жюзерге керекди. «Былай алып къарагъанда, инсан бош сыртындан жатып турургъа деп угъай, ишлерге деп жаратылгъанды. Ол иши, этими бла ёсюп барыргъа керекди. Эринчеклик игиге келтирмейди. Арт заманда адамла зат этмегенден мардадан семиз болуп башлагъандыла. Аны ашагъаны жараргъа керекди да, аны не терлеп, не ишлеп «кюйдюрмесенг»,  семирип, къарыусуз болуп барлыкъды. Шаугютю, саны да къыйналып тебирерикдиле. Аны ючюн кюреширге керекди. Шёндю къара иш жокъду, бир-бирле къаламдан ауурну кётюрмейдиле. Чарх а къарыуну излейди. Спорт бла кюрешиу къанны тазалайды, жюрекге, мыйыгъа, санлагъа да хайырлыды. Ол а эм иги солууду», - деп чертеди Яникойну орта школуну физкультурадан устазы Къудайланы Керим.

 Керим Чукаевич,  физкультурадан юйретгенинден тышында, волейболдан секцияны бардырады, ары жюрюген къызчыкъла кёбюрек заманны жарау этдиририн окъуна тилейдиле. Ала эришиулеге да къатышадыла, окъуучуланы араларында спартакиадада биринчи юч жерден энишге тюшмейдиле, майдалсыз да къалмайдыла. Андан сора да, мектепде аслам секция ишлейди: дзюдо, бокс, волейбол, баскетбол, футбол. Сабийле аланы барына да жюрюйдюле, бири бла чекленип къалмай, экисине-ючюсюне баргъанла да бардыла. Гитче сабийле, арымай-талмай,  барысына да къатышыргъа кюрешедиле. Абаданыракъла да ыйыкъгъа бир юч кере жыйылып ойнаучудула. ГТО-ну мардаларын да жетишимли берирге кюрешедиле.

- Саулукъну юсюнден айтханда,  хар заманда акъырын чапхан игиге саналгъанды, - дейди устаз. – Инсан жыл санына кёре кюннге бир кесек заманны чапса, бек хайырлыды. Аны да этип, ыйыкъгъа бир кере окъуна бассейнде жюзюп чыкъса, ким да хата кёрлюк тюйюлдю. Аллай гитче жараулагъа жетген зат жокъду. Тренажёрламы, фитнесми, йогамы,  жюреги неге тартса да, аны бла кюрешсин. Жангыз да кесине зор бла хор бла жарау этдирген болушурукъ тюйюлдю.

Физкультура бла спортну дагъыда бир ахшылыкълары – инсанны низамгъа, муратына жетерге юйретгенлериди. Спортчу кесине алчы болама дегенча бир-тюрлю борч сала эсе, ол бош заманын анга кёре  къоратады, не компьютерни къояды, не бир башха керексиз затладан къалады. Аш-азыкъны да тюз ашайды, хар нени жутуп бармагъанлай. Ол барысы да низамлыкъгъа келтиреди, низамсыз   инсан а не окъуугъа, не ишге тураллыкъ, не адет-намысны жюрюталлыкъ тюйюлдю, деп чертеди Керим Чукаевич.

Кульчаланы Зульфия хазырлагъанды.