Элбрус районну жер-жерли администрациясы, башланнган классланы окъуучуларыны заманында бийик качестволу эм саулукълу аш-азыкъ бла жалчытылыныуларына уллу эс бургъанлай турады.

 Роспотребнадзорну излемлерине кёре 1-4-чю класслада окъугъан сабийлеге хакъсыз исси аш бериледи. Эрттен ашны 7-11-жыллыкъ окъуучулагъа деп битеу школлада да бирча хазырлайдыла. Ала этден, сютден, чабакъдан, дагъыда кёп тюрлю саулукъгъа файдалы продуктладан жарашдырыладыла. Санитар-тазалыкъгъа уа бютюнда уллу эс бурулады. Сабийлени, аш ашардан алгъа, къолларын жууар амаллары барды.

Районда саулай да исси аш алгъан сабийлени саны 1400-ге жууукъду, ала 1-4-чю классаны окъуучулары, къолайсыз юйюрлени сабийлери бла СВО-гъа къатышханланы сабийлеридиле. Аланы ашлары тынгылы къуралгъанына ата-аналада ыразыдыла.

Темуккуланы Асият.