Быйылгъы жыл Россей Федерацияны Президенти В.В.Путинни указы бла Юйюрню жылыча белгиленнгени себепли Черек районда да анга жоралап уллу байрам этгендиле. Ары районну эллерини уллу, юлгюлю юйюрлерин эм республиканы белгили инсанларын чакъыргъандыла. Тюбешиуню аллында келгенле барысы да ёрге сюелип, Россейни гимнине тынгылагъандыла.
Ызы бла къонакъланы Черек районну администрациясыны башчысы Къулбайланы Алан алгъышлагъанды.
– Президентибиз Владимир Владимирович Путин айтханлай, Россей бир уллу юйюрдю. Биз барыбыз да бир болсакъ, бир юйюрча жашасакъ, не къыйынлыкъладан да ёталлыкъбыз, иги жетишимлеге да жетерикбиз. Юйюр хар адамны да жашауунда энчи жерни алады. Адетге, намысха, тюз сезимлеге уллу эс буруп ёсген сабийлени хайыры бла уа республика, къырал да айныйдыла.
Бюгюн эрттенли Афганистандан совет аскерлени чыгъарылгъаннга жораланнган тюбешиу да болгъанды. Аны да белгилерге сюеме, бизни райондан ары алтмыш беш жаш баргъан эди, алтысы, жарсыугъа, къайтмагъандыла. Ала барысы да жигитледиле, аллай ётгюр инсанла жангыз да ахшы юйюрледен чыгъадыла. Туугъан жерлери ючюн жанларын, къанларын аямагъан, не къыйынлыкъдан да къоркъмагъан жашларыбыз бюгюн да энчи аскер операцияда къыралыбызны сакълайдыла. Бизни районнга Юйюрню жылы иги хапарладан башланнганды, бу айда къыркъ юч сабий туугъанды. Юйюр институтну айныууна жоралап, кёп магъаналы тюбешиуле да этерге умутлубуз, – дегенди Алан Борисович.
Ызы бла байрамны бардыргъан Гергъокъаланы Халимат бла Сарбашланы Аскер 23 январьда Владимир Путин «Россейни жюреги» деген Битеуроссей юйюр отну жандыргъанын билдиргендиле. Черек районнга да ол отну факелы келгенди, аны уа сахнагъа Огъары Малкъардан Улбашланы Алимни бла Фариданы юйюрю чыгъаргъандыла. Алим школда информатикадан окъутады, юйдегиси сабий садда ишлейди. Огъурлу жаш юйюр жети сабий ёсдюреди, гитчечикле Амирхан, Мариям, Медина эгизчикледиле. Алан Борисович Улбашланы юйюрлери Огъары Малкъарда сыйлары, намыслары жюрюген юйюр болгъанын чертип, алагъа сыйлы грамота бла саугъала бергенди.
Черек районда юлгюлю юйюрле аслам болгъаны къууандырады, Къашхатауда жашагъан Чеченланы Элдар аскер къазауатланы ветераныды, энчи аскер операциягъа да баргъанды. Бюгюнлюкде ол юйдегиси Фатима бла тёрт сабий ёсдюреди. Аланы да сахнагъа чакъыргъандыла, Черек районну прокурору Хасан Эржибов аланы алгъышлагъанды, Элдар кёп жашларыбызгъа юлгю болгъанын чертип саугъалагъанды.
Врач усталыкъны тёлюден-тёлюге ётдюрген юйюр КъМР-ни сыйлы врачы Чаналаны Абдулла бу бёлюмде элли жылдан аслам ишлегенди, къызлары Светлана Къашхатауну больницасында неврологду, Фатима уа Нальчикни экинчи сабий поликлиникасында таматалыкъ этеди. Къарындашындан туугъан Чаналаны Аслижан а Огъары Малкъарны больницасыны баш врачыды. Чаналаны тукъумдан бу ызда бюгюнлюкде отуз адам ишлегенин да белгилегендиле.
Ызы бла сахнагъа Зарагижде жашагъан Сабанланы тукъумну келечилерин чакъыргъандыла, ала тёлюден-тёлюге устаз усталыкъны ётдюрген юйюрдюле. Хасан Залимбиевич кёп жылланы Зарагижни орта школуну директору болуп тургъанды, физикадан окъутады, юйдегиси Анета да, жашлары Мухаммед бла Мират, аланы юйдегилери Фатима бла Марина да ол усталыкъны бардыргъанларын чертип алгъышлагъандыла.
Сахнагъа Огъары Жемталадан Жангуразланы Бахауну юйюрюн да чыгъаргъандыла. Бахау граждан авиацияны лётчиги болуп тургъанды, шёндю пенсиягъа чыкъгъанды, юйдегиси Лейля школда педагог-психологду. Къызлары Жаннета медицина факультетде, жашлары Аслан а КъМКъАУ-да архитекторгъа окъуй турадыла, ала эллеринде юлгюлю юйюрледен биридиле.
Аланы КъМР-ни Правительствосуну председателини орунбасары Хубийланы Марат бла Черек районну башчысыны орунбасары Уяналаны Азрет алгъышлагъандыла. Районда анча юлгюлю юйюр болгъанына ыспас этгендиле, ыразылыкъларын айтхандыла.
Къара-Суудан юлгюлю юйюрледен бири уа Толгъурланы Арсенни бла Фазилятны юйюрюдю. Ала беш сабийни ёсдюредиле. Арсен жыйырма беш жылны элни амбулаториясында ишлейди. Ала сабийлерине ахшы юлгю кёргюзтгенлерин, адетге, намысха да сакъ болгъанларын да белгилегендиле, Сахнагъа чакъырып, ыразылыкъларын билдирип, грамота бла саугъалагъандыла.
Огъурлу юйюрлени санында Бабуген элде жашагъа Чофанланы Жамалны бла Майрышханны юйюрюн да энчи белгилегендиле. Ала да беш сабий ёсдюредиле. Абадан жашлары Магомед Красноярскда Сибирь федерал университетни жетишимли бошап, Усть-Хантайская ГЭС-де ишлейди. Аны гитчеси Мурат а Ульяновскда граждан авиация институтну къызыл диплом бла бошагъанды. Алим а КъМКъАУ-ну студентиди, эгиз къызчыкъла Сабира бла Амира уа школда окъуйдула. Аланы да сахнагъа чакъырып, сыйлы грамота бла саугъалагъандыла.
Герпегеж элден а Биттирланы Алимни бла Халиматны юйюрлерин белгилегендиле. Ала юч сабийни Умарны, Динараны, Османны ёсдюредиле.
Черек район къоншу районла бла не жумушда да байламлыкъ жюрютгенлей турады. Аны себепли бу байрамгъа Зольский райондан Тотроковланы юйюрлерин да чакъыргъандыла. Зураб бла Людмила жаш юйюрдюле, юч сабий ёсдюредиле, районларында «Юлгюлю жаш юйюр» деген атха да тийишли болгъандыла. Аланы уа КъМР-ни жаш тёлю ишлери жаны бла министри Азамат Люев алгъышлагъанды.
Андан сора аллай юлгюлю юйюрлени санында Къашхатауда жашагъан Заниколаны Азретни бла Динараны айтхандыла. Азрет эркин тутушуудан Россейни спортуну устасыды. Жашлары Марат Россейни эркин тутушуудан жыйымдыкъ командасына киреди. Алина стоматологияда ишлейди, Расул а жетинчи классда окъуйду. Аланы уа КъМР-ни спорт министрини орунбасары Заур Хежев саугъалагъанды.
Аушигер элден а сахнагъа Бербеков Рамазан бла Маяны юйюрюн чакъыргъандыла. Ала экиси да музыкагъа уста адамладыла, Рамазан элни маданият юйюню таматасыды. Ала юч сабийни ёсдюргендиле, Ислам энчи аскер операциягъа къатышханды. Аскер жаны бла ишлейди. Алихан ДПС-ни инспекторуду, Алина уа биология факультетде окъуйду.
Дагъыда Аушигерден Черкесов Суфьянны бла Ларисаны юйюрлерин белгилегендиле. Ала жети сабий ёсдюредиле. Аланы КъМР-ни культура министри Мухадин Кумахов бла Черек районну урунуу, иш бла жалчытыу эм социал къоруулау арасыны башчысы Батчаланы Алим алгъышлагъандыла.
Жемтала элден бирге алтмыш жыл жашагъан Гоплачев Муаедни бла Дахауосну сахнагъа чакъыргъандыла. Юйюрню башчысы колхозда ишлеп тургъанды, андан сора да, малчылыкъ бла кюрешгенди, юйдегиси уа больницада уруннганды. Ала алты сабий ёсдюргендиле, барысы да билим алып, иги жерледе ишлейдиле. Бюгюнлюкде сыйлы къартланы онюч туудукълары бла онтёрт учхунлары барды. Аланы уа районну ветеран советини келечиси Чеченланы Георгий алгъышлагъанды.
Байрамгъа келген къонакъланы кёллерине уа концерт программа да жарыкълыкъ къошханды.
Темуккуланы Амина.
Суратны Мамайланы Алий алгъанды.
