Тэрч районым хыхьэ Дей жылэмрэ Прохладнэ щIыналъэм и Красносельскэ къуажэмрэ амбулаторэщIэхэр щаухуэнущ «ЦIыхухэм япэ медицинэ дэIэпыкъуныгъэ щрат IуэхущIапIэхэр къэгъэщIэрэщIэжын» программэмкIэ. А IуэхущIапIэхэм иджыпсту я Iуэху зыIутым нэхъ гъунэгъуу зыщигъэгъуэзэну, ухуэныгъэщIэхэр  щащIыну щIыпIэхэр зригъэлъагъуну жылагъуитIми щыIащ  КъБР-м узыншагъэр хъумэнымкIэ и министр Къалэбатэ Рустам.

         Амбулаториехэм я хэщIапIэр 50 гъэхэм яухуа унэщ икIи я щытыкIэкIэ кхъахэ дыдэ хъуащ. IуэхущIапIэхэм я дохутырхэм щепсалъэм министрым къыхигъэщащ иджырей технологиехэр къагъэсэбэпу ухуэныгъэхэр зэрырагъэкIуэкIынур, ахэр зыхуэныкъуэ IэмэпсымэхэмкIэ къызэрызэрагъэпэщынур, цIыхухэм хуащIэ медицинэ Iуэхутхьбзэхэр егъэфIэкIуэным хуэщIауэ абыхэм лэжьыгъэр зэрыщызэтраублэнур.

         «ЦIыхухэм япэ медицинэ дэIэпыкъуныгъэхэр щрат IуэхущIапIэхэр къэгъэщIэрэщIэжын» программэр 2025 гъэ пщIондэ лэжьэнущ. Республикэм и щIыналъэхэм щыIэ медицинэ IуэхущIапIэхэм щыщ куэд зыхуей хуагъэзэжыну хунэсынущ а пIалъэм къриубыдэу.

         Мы илъэсым узыншагъэр хъумэнымкIэ IуэхущIапIэхэр ухуэн къыщрагъэжьэнущ Белая Речкэ, Шэрэдж Ищхъэрэ, Къубэ-Тэбэ, Дей, Красносельскэ, Светловодскэ къуажэхэм, Звезднэ жылэм, апхуэдэу зэгъэпэщыжыныгъэ лэжьыгъэхэр щрагъэкIуэкIынущ Узыфэ зэмылIэужьыгъуэхэр зыпкърытхэм щеIэзэ республикэ сабий клиникэ центрым, Шэджэм, Iуащхьэмахуэ районхэм я поликлиникэ къудамэхэм, Балъкъэр Ипщэ, Яныкъуей, Шэджэм Ищхъэрэ, Нартан, Щхьэлыкъуэ, Гундэлэн къуажэхэм дэт амбулаторэхэм.

ЩХЬЭЩЭМЫЩI Изэ.