КъБР-м и Парламентым щекIуэкIащ XXXII дунейспо хъуромэ (рождественскэ) еджэныгъэхэм щыщ VIII щIы­налъэ зэIущIэр. «Динымрэ щэнхабзэмрэ: тфIэ­кIуэдамрэ къытхэхъуамрэ, къэ­кIуэнум и теплъэр» - аращ зытеу­хуауэ щытар. ЗэIущIэм хэтащ депутатхэр, ­къулыкъущIэхэр, дин, жылагъуэ, егъэ­джэныгъэ зэгухьэ­ны­гъэ­хэм я лIы­кIуэ­хэр, щIэныгъэлIхэр, щэнхабзэм и лэжьакIуэхэр, студентхэр, журналистхэр. ЗэIущIэм къеблагъэхэм макъамэ­кIэ яIущIащ Къэбэрдей-Балъкъэр къэ­рал филармонием и «Камерата» оркестрыр.

 ЗэIущIэр къызэIуихащ КъБР-м и Парламентым и унафэщI Егоровэ Татьянэ. И гугъу ищIащ динымрэ щэнхабзэмрэ зэ­рызэпхам.
- Динымрэ щэнхабзэмрэ мыхьэнэкIэ зэ­пыщIащ, зыр адрейм елъытыжауэ къызэдогъуэгурыкIуэ. ЗэщIыгъуу ахэр сэбэп мэхъу зыр зым илъытэу, пщIэ хуи­щIу, гущIэгъу хуиIэу цIыхур гъэсэнымкIэ. Мыхьэнэшхуэ щагъэзащIэ унагъуэ Iуэхуми. Дин гупсысэхэр щIэлъщ су­рэ­тыщI Iэзэхэм, усакIуэшхуэхэм, архитек­торхэм я IэдакъэщIэкI цIэрыIуэхэм. Ап­хуэдэ лэ­жьыгъэхэм дунейпсо гъуазджэм увы­пIэшхуэ щаубыдащ. ЦIыхубэм ялъы­тэ, ягъэлъапIэ дин мыхьэнэ зиIэ ма­хуэш­хуэхэр. Дэри ди къалэнщ ди тхыдэ, щэнхабзэ щIэиныр тхъумэну икIи дгъэкIуэтэну. Ди щIэблэр щытхъумэн хуейщ Iеймрэ щIэпхъаджэмрэ. Абы папщIэ зэхагъэкIыфу егъэсапхъэщ дэтхэнэ Iуэхугъуэр щапхъэми, дэтхэнэм зы­щыхъумапхъэми. ЩIэблэм я гъэсэныгъэм и гугъу пщIымэ, абы хэтын хуейщ дин IуэхущIапIэхэр. А псом нобэ ды­теп­сэлъыхьынущ, мурадхэри дгъэбелджы­лынущ, - жиIащ Егоровэм. 
Зытепсэлъыхь Iуэхугъуэм теухуауэ и гупсысэхэмкIэ зэIущIэм хэтхэм ядэгуэшащ Пятигорскрэ Черкесскрэ я Архиепископ Феофилакт. 
- КъБР-м и Парламентым щекIуэкI Iуэху­гъуэхэр сыт щыгъуи игъуэщ, щхьэ­пэщ, зозыгъэужьщ. Сыкъеблэгъэху ды­зытепсэлъыхьхэр Iэмал имыIэу мэхъу Iуэху дахэ гуэр къызыкIэлъыкIуэ щIэдзапIэ. Къапщтэмэ, мыхьэнэ пыу­хыкIа зиIэ Iуэхугъуэ щхьэхуэм зэгъусэу утепсэ­лъыхьыныр щхьэпэщ. Абы къокI а зэIущIэм хэтхэр зы гупсысэм, зы Iуэ­хум дигъэпIейтейуэ, хэкIыпIэ къэтлъыхъуэу. Пэжщ, щхьэж къегъэсэбэп езым фIыуэ зыхищIыкI Iэмалхэр. 
Дин хуэIухуэщIэхэм хэлъхьэныгъэ хуа­щIащ щэнхабзэм и зыужьыныгъэм. Ди­ным щэнхабзэм щIелъхьэ гъэсэныгъэ мыхьэнэ, псэр зыузэщI гупсысэ. Къапщтэмэ, щэнхабзэр езыр псэм ехьэ­лIащ. Дэтхэнэми къыдгуроIуэ цIыхубэм я гъащIэм щэнхабзэм щигъэзащIэ къалэным и инагъыр. Щэнхабзэ зыхэзылъ­хьэм и псэр егъэнщI дахагъэкIэ. Щэнхабзэмрэ динымрэ зэпэщIахыну и ужь ихьакъэ – тIуми я мыхьэнэр мэкIуэд, - жиIащ абы. 
КъБР-м ис муслъымэнхэм я дин IуэхущIапIэм и унафэщIым и япэ къуэдзэ Мысыр Хъызыр тепсэлъыхьащ дин гъэ­сэныгъэм и Iэмалхэм.
- Ди зэманым щэнхабзэр, гущIэгъур, псэ къабзагъэр хъумэным зэпымыууэ утеп­сэлъыхьын хуейщ. Гъуэгу пхэнжкIэ дамыдзыхыу щIэблэр къыдэгъэкIуэтеиным дызэрелэжьыпхъэр гъэсэныгъэрщ – зэпымыууэ ахэр хуэдущиин ­хуейщ гущIэгъумрэ зэхэщIыкIымрэ. Дэ жэуап ­дохь къэкIуэну зэманым абыхэм я IуэхущIафэ, я хьэл-щэн, я цIыху хэ­тыкIэ хъунумкIэ. Напэр яфIэмыкIуэду гугъуехьхэр къы­­зэранэкIыфу гъэсэ­нырщ нэхъыщ­хьэр. 
ЦIыхур щыпсэу щIыпIэм, зыщыщ лъэпкъым, зэрихьэ диным емылъытауэ, зыр зым илъытэу, пщIэ хуищIу щы­тып­хъэщ. Аращ щIалэгъуалэр къызы­хуед­джэн хуейр щIэпхъаджагъэ ямы­щIэн, дин, лъэпкъ зэщыIей къэзыгъэхъуну хуей­хэм зыдрамыгъэхьэхын папщIэ. ЦIыхубэм гупсысэкIэ узыншэ яIэмэ, ди къэралым ис лъэпкъхэр зэгурыIуэнущ, - жиIащ Мысырым. 
ЗэIущIэм къыщыпсэлъащ КъБР-м щэн­хаб­зэмкIэ и министр Къумахуэ Му­хьэдин:
- ЛъапIэныгъэхэр яIэщIэхуу е нэсу къа­гурымыIуэу къыщытщыхъу иджы­рей дунейм щэнхабзэмрэ гъуазджэмрэ я фIы­пIэр хъумэным мыхьэнэшхуэ щи­Iэщ. 
Ижь-ижьыж лъандэрэ фIэщхъуныгъэмрэ щэнхабзэмрэ зэкIуу къызэдэ­гъуэ­гурыкIуащ. Ар къыхощ литерату­рэм, гъуазджэм, архитектурэм. Псалъэм папщIэ, диныр античнэ литературэм пэ­джэжри, къэунэухащ пасэрей алыдж ми­фологиер. Абы къытехъукIыжащ пасэрей театрыр икIи европей гъуазджэми лъабжьэ хуэхъуащ. Шекспир, Цицерон, Моцарт сымэ я IэдакъэщIэкI телъы­джэхэми ар къыхощ. Библием мыхьэнэ щигъэ­зэщIащ гъуазджэм образыщIэхэр къыщыунэхунымкIэ. инджылым ит хъыбархэр щапхъэ яхуэхъуащ усакIуэхэм, сурэтыщIхэм, макъамэтххэм. ЛитературэмкIэ зыдгъазэмэ, щапхъэу къэхьыпхъэщ Библиемрэ КъурIэнымрэ. 
Лъэпкъ зэмылIэужьыгъуэ куэд зы­щып­сэу ди къэралым и щэнхабзэр зэфIэувэным теухуауэ къалэнышхуэ ягъэ­зэ­щIащ ислъам, чристэн динхэм. 
Ислъам диным и къабзагъым итхьэ­къуащ урыс тхакIуэ, усакIуэ цIэрыIуэхэр. Пушкин Александр и «Михайловские ссылки» тхыгъэм усэ Iэрамэ хэтщ «Подражание корану» жиIэу. Толстой Лев и IэдакъэщIэкIхэм къыхощ ислъам диным узыщрихьэлIэ Iуэхугъуэхэр. 
Къэбэрдей-Балъкъэрым щэнхабзэмкIэ и министерствэм гулъытэшхуэ хуещI Урысейм и щэнхабзэр, псэм зезыгъэужь лъапIэныгъэхэр, тхыдэ фэеплъыр хъу­мэным теухуауэ. Апхуэдэ къалэнхэр игъэ­защIэу ирегъэкIуэкI щэнхабзэ зэ­хьэ­зэхуэ куэд - зэIущIэхэр, концертхэр, гуфIэгъуэ дауэдапщэхэр, фестивалхэр, - жиIащ министрым. 
ЩIэныгъэмкIэ Урысей Академием и Къэбэрдей-Балъкъэр щIэныгъэ цент­рым и унафэщIым и къуэдзэ, тхыдэ щIэ­ныгъэхэмкIэ доктор Абазэ Алексей теп­сэ­лъыхьащ динымрэ щэнхабзэмрэ егъэ­джэныгъэм щаIэ мыхьэнэм. Щхьэхуэу къытеувыIащ еджапIэ нэхъыщхьэхэм щIэуэ щаджыну «Основы российского государства» дерсыр зэрыхагъэхьам, ар зэ­раджыну тхылъхэри къызэрыдагъэ­кIам. 
Гуманитар къэхутэныгъэхэмкIэ институтым этнологиемрэ этнографиемкIэ и къудамэм и унафэщI Просолов Дмитрий къытеувыIащ динымрэ щэнхабзэмрэ зэрызэпыщIам теухуауэ я IуэхущIапIэм щрагъэкIуэкI къэхутэныгъэхэм. 
- Нобэ къэтIэтауэ дызытепсэлъыхь уп­щIэм гъащIэм и лъэныкъуэ куэд къызэ­щIеубыдэ. Зи дин зэтемыхуэ лъэпкъ куэд зыщыпсэу ди республикэм зэтеубла щыхъуащ а лъэпкъхэм я зэхуаку къыдэхъуэ зэхущытыкIэ дахэ, пщIэ, гъунэгъугъэ, ныбжьэгъугъэ, зэхэщIыкI. Ар тхъумэну ди къалэнщи, абы папщIэ республикэм щыдогъэкIуэкI Iуэхугъуэ куэд. Ди министерствэр абы и лъэныкъуэкIэ ядолажьэ дин, жылагъуэ зэгухьэныгъэхэм, - къы­щыхигъэщащ КъБР-м граждан жыла­гъуэ IуэхущIапIэхэм ядэлэжьэнымрэ лъэпкъ IуэхухэмкIэ и министр КIурашын Анзор и къэпсэлъэныгъэм. Щхьэхуэу и гугъу ищIащ абы теухуауэ министерст­вэм иригъэкIуэкI лэжьыгъэми. 
Мэльбахъуэ Тимборэ и цIэр зезыхьэ Къэрал лъэпкъ библиотекэм щэнхабзэм е­­хьэлIа дэфтэрхэмкIэ и фондыр щахъу­мэ къудамэм и унафэщI Кушбокъуэ Зитэ тепсэлъыхьащ фондым диным теу­хуауэ хэлъ тхылъ гъуэтыгъуейхэм. 
Фиофилакт жиIащ Лъэпкъ библиоте­кэм тыгъэ хуащIыну тхыдэ щIэин къыщыгъэлъэгъуа тхылъ зэрыIыгъ зэрагъэ­хьэзырар. 
ТворчествэмкIэ «Дыгъэпс къалэ» сабий академием и егъэджакIуэ Таз ФатIимэ тепсэлъыхьащ сабий зэчиифIэхэм зе­зыгъэужь «Свеча» студием, «Егъэджа­кIуэм и лIыгъэ» проектым, езыр зы­хэта егъэджакIуэ зэпеуэхэм, абыхэм къыщихьа ехъулIэныгъэхэм. 
Тырныауз къалэм дэт гимназие №5-м гъэсэныгъэ лэжьыгъэхэмкIэ и уна­фэ­щIым и къуэдзэ Кадниковэ Светланэ тепсэлъыхьащ илъэс къэс я еджапIэм псапэ хуэщIэу къыщызэрагъэпэщ жармыкIэм, а Iуэхугъуэм я еджакIуэхэр жы­­джэру зэрыхэтым. 
Мы зэхыхьэм щагъэлъэпIащ Егъэджэ­ны­гъэм, гъэсэныгъэм, сабийхэмрэ щIалэгъуалэмрэ ядэлэжьэным теухуауэ илъэс къэс ирагъэкIуэкI «ЕгъэджакIуэм и лIыгъэ» зэпеуэм 2023 гъэм щытекIуахэр.