Мейкъуапэ къалэм къикIыу иджыблагъэ хъыбар гуапэ къытIэрыхьащ. ФокIадэм 23 - 29-хэм абы щокIуэкI Урысей Федерацэм щыщ цIыхухъухэмрэ цIыхубзхэмрэ тхэквондомкIэ (ВТФ - Олимп джэгухэм хыхьэмкIэ) я чемпионат. Абы япэ увыпIэр къыщихьащ Къэбэрдей-Балъкъэрым и спортсмен, «Пять колец» спорт академием и гъэсэн Багъ Идар.

Килограмм 58-рэ зи хьэлъагъхэм ди щIалэм къыпэлъэщын къахэкIакъым - абы и зэIущIэхэр дахэу, Iэмал гъэщIэгъуэнхэр къигъэсэбэпу икIи ерыщу иригъэкIуэкIащ. КIэух зэхьэзэхуэм Идар къыпэщIэтар и ныбжьэгъу, и гъусэу «Пять колец» академием зыщызыгъасэ, налшыкдэс Яхненкэ Даниилщ. Абыхэм я тренерыр Ахъмэт Амирщ.

Къыхэдгъэщынщи, Багъ Идар УФ-м тхэквондомкIэ тIэунейрэ и чемпион хъуащ. Нэгъабэ, фокIадэм, Налшык щекIуэкIа чемпионатым республикэм щыяпэу дыщэ медаль къихьауэ щытащ абы. ЩIалэр илъэс 19 хъууэ аращ, ауэ и Iэзагъэр мызэ-мытIэу къигъэлъэгъуащ.

Идар чемпионатым кIуэну щежьэну махуэм ипэ къихуэу зыхуэзгъазэри интервью къеIысхауэ щытащ. Зэрыспортсмен Iэзэм и мызакъуэу, ар псэлъэгъу гъэщIэгъуэнуи зэрыщытыр ди газетеджэхэми мыгувэу къедгъэщIэнщ – тхыгъэр къытеддзэну догъэхьэзыр.

ХЬЭЩЫКЪУЕЙ Олег.