Уи лIакъуэм къикIуа гъуэгуанэм, укъызыхэкIа лъэпкъым и къежьапIэм, уи унагъуэр къызытехъукIам хэпщIыкIыныр, нэхъыщхьэжыр аращи, ар къэпхутэныр уасэ зимыIэ гуащIэщ, ар ипэкIэ узэрыплъэм, къыпкIэлъыкIуэну щIэблэм узэрегупсы-сым и нэщэнэщ. Иужьрей зэманхэм нэрылъагъу мэхъу а Iуэхугъуэхэм жылагъуэм гулъытэ инхэр зэрахуищIыр: цIыхухэм къахутэ лъыкIэ «зэхэлъэда» лъэпкъхэр, къыздикIа щIыналъэхэр, къызытехъукIахэр, я лъэпкъхэм яIэ ныбжьыр. АтIэ, икIэм-икIэжым, цIыху къэс и акъылыр абы хуэкIуэну ДыкъэзыгъэщIам егъэпс: Iэмал имыIэу пцIыхун хуейкъэ уи къежьапIэр?!
«Бланэ щалъху йокIуэлIэж» - мы жыIэгъуэр дигу къэзыгъэкIар Али-Бэрдыкъуэ (Хьэгъундыкъуей) жылэжьым дэт музейм къыщызэрагъэпэща Iуэхугъуэ къызэрымыкIуэращ. Илъэси 155-рэ зытекIыжа къэхъугъэщ зи гугъу тщIынур. Дауи, дядэжьхэм я гуи къэкIынтэкъым унэлъащIэ хьэпшыпым лъэпкъ къуэпсым и зэпыщIэныгъэмкIэ мыхьэнэшхуэ иIэну.
КъыщIэддзэнщ и къежьапIэмкIэ. Илъэси 155-кIэ узэIэбэкIыжмэ, Кавказ зауэр зэриухрэ илъэсиплI фIэкIа дэмыкIауэ, Хьэгъундыкъуей адыгэ жылэжьым дэкIри, Къэбэрдей щIыналъэмкIэ яунэтIащ Щокъарэ лъэпкъым я щIалитIым: Щауейрэ БатIурэ. Абыхэм къатехъукIыжащ нобэ Къэбэрдей-Балъкъэрым щыпсэу унагъуэ 60-м щIигъур.
Абыи къыщымынэу, лъэпкъ жыгым деж зэрыщыгъэнэIуамкIэ, мы лъэпкъым и тхыдэр къэтIэщIыжыным гуащIафIэу елэжьахэм къызэрахутамкIэ, нобэкIэ къэралхэм, къалэхэм унагъуи 110-м щIигъу дэсщ «Щокъарэ» унагъуэцIэр зэрахьэу.
Мы махуэм музейм къеблэгъа хьэщIэхэр, Щокъарэхэ къахэкIа щIалиплIыр: Хьэбас, Руслан, Казбек, Хьэзрэт-Алий сымэ къыздикIар Къэбэрдей-Балъкъэрырщ.
- Ди къакIуэр зытедухуар Iуэху дахэщ… Ди къуэш, адыгэ лъэпкъым и къуэ щыпкъэ Аргун Олег нэIуасэ, ныбжьэгъу къытхуэхъуауэ, дыщигъэгъуэзауэ щытащ Хьэгъундыкъуей адыгэ жылэжьым музей телъыджащэ зэрыдэтым, абы дуней псом адыгэу тетыр къекIуэлIэныр я хъуэпсапIэу зэрыщытым.
Абы щыгъуэми дигу къэкIащ дядэжьхэм къащIэна, щIэблэкIэрэ зэIэпытхыу дыхуэсакъыпэу лIэщIыгъуэрэ ныкъуэм щIигъуауэ зетхьэ унэлъащIэ хьэпшып зыбжанэ къыздрахауэ щыта хэгъэгум къедгъэгъэзэжыну. Къэбэрдейм къыщыхутэн ипэкIэ, а хьэпшыпхэр щащIауэ щыта щIыпIэм къэтхьыжыныр, ди лъэпкъым и лъапсэр къыздежьа щIыналъэм щыIэ музейм пщIэ хуэтщIу ахэр щIэтлъхьэныр ди гуращэу щыжытIэм, Аргун Олег къыддиIыгъащ, «Ар сыту фIы хъунт! ДыщыгуфIыкIыну къудейщ апхуэдэ Iуэху дахэм!» - жиIащ.
НэхъыжьыфIым и псалъэхэм дытрагъэгушхуэри, нобэ къуэш хэгъэгум, Щокъарэхэ ди лъэпкъым и лъапсэр къыщежьа Хьэгъундыкъуей къэтхьэсащ пщIэ зыхуэтщI, ди лъэпкъымкIэ тхыдэ мыхьэнэшхуэ зиIэ хьэпшып-хэр.
Телъыджащэщ ди нэгу къыщIэувар: ди къуэш шэрджэсхэми, дэ дыкъыздикIа Къэ-бэрдей-Балъкъэрми, уеблэмэ, дуней хъурейми мыпхуэдэ музей щыбгъуэтынкъым пасэ-рей адыгэм къыщIэна хьэпшыпхэмкIэ гъэнщIауэ, зэхуэщIауэ, адыгэ лIакъуэхэм я тхыдэр хъумэным тегъэчынауэ хуэлажьэу. Абы гугъэшхуэ къытхилъхьащ нобэр къыздэсам Щокъарэхэ щытхъума лъэпкъ хьэпшыпхэр зэрымыкIуэдынумкIэ… Тхьэр арэзы къыфхухъу!
Нобэ ди Iэрылъхьэр мащIэми, дяпэкIэ, ди лъэужьым лъэпкъ куэд къызэрырикIуэнур си фIэщ мэхъу. АтIэ, мы пасэрей жылэжьым ныдэкIауи, хэгъэгум щыщ адыгэ къуажэхэм ящыщуи Къэбэрдей-Балъкъэрым унагъуэ, лъэпкъ куэд щопсэу. Псалъэм папщIэ, Бетыгъуэнхэ, Мэкъуауэхэ, Лыхьхэ...
Каменномост къуажэм и зы район цIыкIум «хьэгъундыкъуей хьэблэ» фIэщыгъэ яIэщ, мыбыкIэ никIахэр дызэрыIыгъыу дызэдопсэу. ГъэщIэгъуэнкъэ ар: дядэжьхэм, мы хэгъэгум никIахэм здыдэса къуажэм и цIэр ягъэкIуэдакъым, хьэблэм фIащыжащ, абыкIи я лъапсэм и къежьапIэр яхъумащ... Мис, апхуэдэурэ зытхъумэжурэ дыкъокIуэкIри, нобэ ди жылэжьым ди къакIуэр тхьэм фIы ищI, ди зэкIэлъыкIуэныгъэри кIыхь ухъу! - жиIащ хьэщIэхэм ящыщ Щокъарэ Руслан.
Гупым фIыщIэ ин къыхуащIащ музейм и къызэгъэпэщакIуэхэм, абы кIэлъыплъхэм, къыхагъэщащ къэкIуэху къэс гуфIэгъуэкIэ къызэрырагъэблагъэр.
- Ди лъэпкъым Кавказ зауэм къыхуихьа насыпыншагъэ иныр тщызымыгъэгъупщэщ адыгэ хэкум япэ дыдэ щагъэува мы мывэ сыныр. Ар здэщытыр нобэ фыкъыздекIуэлIа, фядэжьхэр здыдэкIа къуажэжьращи, ар уасэншэщ. Фи къакIуэр мы къуажэм, мы щIыпIэм ивопхри, ар адыгэ лъэпкъым и зыужьыныгъэм щхьэпэн нэщэнэфIу Тхьэм къыщIигъэкI!
ЗэрумыгъэщIэгъуэн щыIэкъым: зэбградзу, хамэ къэрал, щIыналъэ щхьэхуэхэм ихуахэм нобэ я лъэпкъ къуэпсхэр къатIэщIыж, къагъуэтыж, зэпащIэж. Дуней псом щикъухьа хъуа ди лъэпкъым Тхьэм Iуэтэжыгъуэ дигъэгъуэтыж, лъэпкъ жыгыр зэфIигъэувэжыфа-уэ, дызэгурыIуэу, дызэрылъагъуу ди хэкужьым дыщызэхуэсыжауэ тхьэм дигъэлъагъу! - захуигъэзащ хьэщIэхэм къуажэ Хасэм и тхьэмадэ Аслъэныкъуэ Рэмэзан.
- Тхьэм фигъэпсэу, ди къуэшхэ! Къыдэвгъэза дзыхьыр узыфIэмыкIыжыну инщ икIи фыкъызэрытщыгугъыу дыкъыщIэкIыжынщ! Хьэпшыпхэм пщIэшхуэ яхуэтщIу зетхьэнущ, дгъэлъэгъуэнущ, щIэблэм ядгъэцIыхунущ ахэр къыздикIамрэ къакIуа тхыдэ гъуэгуанэмрэ. Хуабжьу тыгъэфIщ мы хьэпшыпхэр ди къуажэм дежкIи, ди лъэпкъ музеймкIи, - къыхигъэщащ музейр зи нэIэм щIэт, и хъумакIуэ гумызагъэ Хутэ Аслъэн.
- ЛIэщыгуъэрэ ныкъуэм щIигъукIэ узэIэбэкIыжмэ, Къэбэрдей щIыналъэм ирахьауэ щыта хьэпшыпхэр зэрымыкIуэдам къегъэлъагъуэ лъэпкъыр къызэрызэтенар, зэрызихъумэжар. Апхуэдэ фи щыIэкIэ-псэукIэм, фи Iуэху бгъэдыхьэкIэм пщIэшхуэ хуэщIыпхъэщ, - жиIащ музейр зи нэIэм щIэтхэм ящыщ Иуан Норий.
Иджыри зы Iуэхум гу лъытапхъэщ. Илъэс зыбжанэкIэ узэIэбэкIыжмэ, Хьэгъундыкъуей къуажэм и кхъэхэм ящыщ зым дагъэувауэ щытащ Щокъарэхэ я сын. Мы лъэпкъым къыщIэхъуа щIэблэхэм яхэлъ хэкупсагъэр къэзыгъэлъагъуэщ КъБР-м къикIыурэ а сыным деж лъэпкъым щыщхэр къызэрыкIуэр, я щхьэр зэрыхуагъэщхъыр.
КъищынэмыщIауэ, 2008 гъэм Щокъарэхэ я лъэпкъым и зэхуэс Къэбэрдей-Балъкъэрым щызэхашэри, ди хэгъэгум щыщ я унагъуэ-хэри а зэхыхьэм хэтауэ щытащ. Абы иужь, илъэсипщI дэкIыжауэ, къэхутэныгъэ лэжьыгъэшхуэ къызэранэкIри, лъэпкъым и тхылъ купщIафIэ дунейм къытехьащ. Иджы а тхылъым и етIуанэ Iыхьэр ягъэхьэзыр. Абдежым къыщызэщIаубыдэнущ дуней псом Щокъа- рэ унагъуэцIэр зезыхьэу щыпсэууэ хъуар.
Абыхэми къыщымынэу, щIэбли 10-кIэ (!) зэIэбэкIыжри, лъэпкъ жыгыр зэфIагъэувэ-жын ялъэкIащ. Ар зыхузэфIэкIа гъуэтыгъуафIэкъым. Мис апхуэдэ щIэблэфI къащIэхъуащ Хьэгъундыкъуей жылэжьым дэкIа Щауейрэ БэтIурэ.
Щокъарэхэ я лъэпкъым щыщ нэхъыжьхэми фIыщIэшхуэ хуащIащ я къуэшхэм. Я зэкIэлъыкIуэр, зэпыщIэныгъэр зэпымычыну ехъуэхъуащ.
- Щауей - къуитху, БатIу - къуих яIэу Къэбэрдей щIыналъэм нихьэжати, абыхэм къатекIыжа къудамэ 11 нобэ абдеж дыщопсэу. Къудамэ къэс нэхъыжь пашэ диIэжщ. Абыхэм иджыри зы нэхъыжь къащхьэщытыжщ. Абы и дежщ лъэпкъым и ныпыр здыщытхъумэр.
Нобэ Щокъарэхэ я тхыдэр зэуэ щызэхуэхьэса хъуащ ди тхылъым. Ари тыгъэ худощI музейм. КъБР-м щыпсэу, «Щокъарэ» унагъуэцIэр зезыхьэу зы цIыху къэнакъым мы тхылъым имыхуауэ. Абы папщIэ архивхэм дыщылэжьащ, дэфтэр куэд щIэтщыкIащ, тхузэфIэкIар зэхуэтхьэсыжащ.
Къэбэрдей-Балъкъэр къэрал университетым и щIэныгъэрылажьэ Къармэ Руслан и дэIэпыкъуныгъэшхуэ хэлъу къыдэдгъэкIыжащ. ИкIи, Щокъарэхэ я унагъуэ къэс илъыну яIэрыдгъэхьащ. Ауэ, абыкIэ ди лъэпкъ тхы- дэр джыныр, зэфIэгъэувэжыныр зэфIэкIыркъым. Куэд къэнащ гулъытэншэу. Абы къыхэкIкIэ, тхылъым и етIуанэ Iыхьэм ди щIалэгъуалэр гуащIафIэу, жыджэру йолэжь. АтIэ, нобэ ди лъэпкъэгъухэр щопсэу хамэ къэралхэми: Болгарием, Щамым (Сирием), Тыркум... Абыхэми, Къэрэшей-Шэрджэсым щыпсэухэми дызэрыхуейуэ далъэIэсыфакъыми, иджы ахэр къызэщIэдубыдэнущ, - щIагъужащ хьэщIэхэм.
КъыщIэкIуа Iуэху дахэр, я пщэрылъыр екIуу ягъэзэщIа нэужь, хьэщIэхэм нэгузыужь программэ гъэщIэгъуэн хузэхашащ. ЖыпIэнурамэ, Хьэгъундыкъуей щыщ Щокъарэхи, хьэщIэхэри, лъэпкъ Iуэхум телажьэхэри а махуэм куэд дыдэрэ гупсэхуу зэпсалъэу зэбгъэдэсащ. Иужьым, Щокъарэ Мухьэдин и пщIантIэм деж адыгэ Iэнэ къыщигъэуври, Къэбэрдей-Балъкъэрым къикIа къуэшхэр ягъэхьэщIащ.
ЩОХЪУЖЬ Люсанэ.