Россейде отлукъну бир  ненча  тюрлюсюню  багъалары кётюрюлюп барадыла. Биринчиден,  ол оптовый биржалада эсленеди, ызы бла розницагъа да жетеди. Ол  не бла байламлы болгъаныны  юсюнден оюмларын КъМР-ни Промышленность, энергетика эм сатыу-алыу министерствосундан билдиргендиле.

Багъала терк ёсюп баргъанларыны талай сылтауу барды. Биринчиден, нефть чыгъарыу бла кюрешген компаниялагъа къырал артха къайтарыучу тёлеу келир айда 50 процентге азайырыкъды. Башха къыраллада отлукъгъа багъала да къошулуп барадыла. Дагъыда нефтьни жарашдырыучу онжети завод шёндю ишлемейдиле, ремонтда турадыла – ол да  сылтауладан бириди.

Росстатны билдириуюне эмда бардырылгъан тинтиулени эсеплерине кёре  Къабарты-Малкъарда бензинни орта багъасы СКФО-да багъаладан озмайды. Сёз ючюн, АИ-92 марка бензинни  литри 50,8 сом турады. Аны эм учузу Ингушетиядады – 50 сом. Къарачай-Черкесде – 50,6, Шимал Осетияда уа  50,7 сомду аны багъасы. Барындан да бег а АИ-92 Чеченде (52,8) бла Дагъыстанда (54) багъады.

Аналитиклени тергеулерине кёре, адамланы къолайлыкъларын эсге алып къарагъанда, быллай отлукъ Ингушетияда бла Чеченде жашагъанлагъа багъаракъ келеди.

Бензинни АИ-95 тюрлюсю уа Ставрополь крайда, Чеченде эмда Дагъыстанда багъа турады. Аланы башхалыгъы транспортха къоранчла бла да байламлыды.

Къыралны Правительствосунда шёндю бензинни эмда дизель отлукъну тышына ташыугъа чек салыуну сагъышын эте турадыла. Алай болса, багъала да тюшерге боллукъдула. Дагъыда ала  жылны кезиую бла байламлы сурам азайгъаны бла да тохташыргъа боллукъдула. Ол а сентябрьни ахырында, октябрь айны аллында башланады.