США-м и президент Кеннеди и щхьэгъусэ Жаклинрэ СССР-м и президент Хрущёв Никитэ и щхьэгъусэ Нинэрэ япэ дыдэу зэрызэхуэзам теухуауэ хъыбар гъэщIэгъуэнхэр нобэр къыздэсым кърахьэкI.
1961 гъэм Хрущев Никитэ Венэ кIуат США-м и президентым лэжьыгъэ IуэхукIэ абы щыIущIэну. Мис а зэIущIэм щыгъуэщ унафэщIхэм я щхьэгъусэхэр щызэрыцIыхуари. США-мрэ СССР-мрэ шурэ лъэсрэ зэрызэхуэмыдэм хуэдэу, а цIыхубзитIри зыкIи зэтехуэртэкъым, зэ IуплъэгъуэкIэ. Жаклин бзылъхугъэ лъагэт, псыгъуэт, модэм и иужьрей щIэщыгъуэхэмкIэ зэщыхуэпыкIат, щапхъэ зытрахт. А тхьэIухудым елъытауэ, Хрущевым и щхьэгъусэр губгъуэм къикIыжа, колхоз лэжьыгъэм иужьыгуа, къызэрыгуэкI къуажэ фызхэм хуэдэт. А зэIущIэм Нинэ щыгъа «хъэлатым» и хъыбар куэдрэ кърахьэкIащ европей, америкэ газетхэм.
КъызэрыщIэкIамкIэ, Нинэ щыгъар къызэрыгуэкI «хъэлат щхъуэкIэплъыкIэтэкъым», атIэ къежьагъащIэ бостей-костюмт, шылэ лъапсейм къыхэщIыкIарэ, Москва и дэрбзэр нэхъыфI дыдэм - Гупалэ Нинэ - хуидауэ. Хрущевэр илъэс 60 хъуагъэххэт, Жаклин 32-рэ ирикъуа къудейт. Къапщтэмэ, Нинэ ипхъу хуэдэт ар, я дахагъэкIэ зэбгъэпщэнуи къезэгъыртэкъым. Арами, псалъэмакъыр мыужьыхыжу зыкъомрэ дунейм къыщрахьэкIащ.
Журналистхэм зэуэ къагурымыIуами, хэзыщIыкIхэм ящIэрт Нинэ апхуэдизу «къызэрыгуэкIыу» щIыщытар. «Нинэ цIыху гуапэу уIуоплъэ, зэтетщ, цIыхуфIу фэ тетщ. ГъэщIэгъуэнщ абы и нэгу щIэкIа псом иужькIэ апхуэдэу зэпIэзэрыту къызэрызэтенар», - жаIэрт абыхэм. Жаклин, минрэ дахэми, теплъафIэми, модэм и псыпэхэшми, дагъуэншэу напэ къабзэми, ар зыцIыхухэм жаIэрт Кеннеди и щхьэгъусэр зэрызэкIуэцIылъыр, гу щIыIэу зэрыщытыр. Абы цIыхухэр гъунэгъуу зыбгъэдигъэхьэртэкъым, запыIуидзырт.
Нинэ апхуэдэтэкъым… Абы игурэ и щхьэрэ зэтелът, сыт хуэдэ зэIущIэми къыщаIэт Iуэхугъуэхэм хищIыкIырт, псалъэмакъыр хэти диIыгъыфырт, хузэфIэкIынумрэ зыхищIыкIымрэ ищIэжрэ абы и нэгур игъэнэхуу цIыхубз гуакIуэт. Ар хуиту зекIуэрт, и гур утIыпщауэ псалъэрт, цIыхум и нэгум хуиту иплъэрт. Нинэ зыцIыхуу щытахэм жаIэжырт ар гъэсауэ, хабзэ хэлъу зэрыщытар. Арат абы Америкэм и лIыкIуэхэр къызэрыдихьэхари.
Арагъэнущ Нинэ бостей, сэхусэплъ лъапсейхэмкIэ зыщIимыгъэдэхар абы щыгъуэ. Ар хуэныкъуэтэкъым нэщыпхъуэ. Нинэ езыр дунейм нэхъ ин дыдэу тет къэралыгъуэ лъэщым хуэфэщэн гуащэт. Ар хуиту ирипсалъэрт инджылызыбзэм, франджыбзэм, польскэбзэм, украиныбзэм. Жаклин и щхьэгъусэм яужь иту, абы и ныбжь тридзэу щытамэ, Нинэ и щхьэгъусэм бгъурыту, абы и чэнджэщэгъу нэхъыщхьэу, хуэфэщэн пщIэрэ нэмысрэ къыхуищIыжу зэдэпсэуащ.
