Илъэс куэд хъуащи, хабзэфIым тету, Хэкум къэзыгъэзэжахэм я махуэм ирихьэлIэу, Къэрэшей-Шэрджэс Республикэм и Адыгэ Хасэм Iуэху дахэхэр къызэрегъэпэщ зи адэжь щIыналъэм къихьэжа ди лъэпкъэгъухэр къыхашэу. Абы и щапхъэу, иджыблагъэ Адыгэ Хасэм и хэщIапIэм щызэхуэсащ Али-Бэрдыкъуэ, Хьэбэз къуажэхэр, Черкесск къалэр псэупIэ зыхуэхъуа, Урысейм и цIыху хъужу ягурэ я щхьэрэ адэжь щIыналъэм щызыгъэтIылъыжа унагъуэхэр.
ГуфIэгъуэ зэхыхьэм кърихьэлIат Хьэбэз къуажэм щып-сэу зэIыхьлыхэу Гусокъуэхэрэ Мэхъушхэрэ я унагъуэхэр, Али-Бэрдыкъуэ псэупIэ щызыщIа Бэлыкъуэхэ, илъэс куэд дыдэ хъуауэ Черкесск къалэм щып-сэу Лаш Джэлал сымэ…
Ди лъэпкъэгъухэм ягу къаIэтыну, ахэр зыгъэгуфIэ-зыгъэпIейтейхэм щIэдэIуну пшыхьым къекIуэлIащ республикэм къыщыдэкI «Черкес хэку» газетым и журналистхэр, редактор Абидокъуэ Люсанэ я пашэу: Туаршы Ирэ, Аслъэныкъуэ Мадинэ, ГъукIэкъул Иринэ, хэгъуэгум адыгэбзэмкIэ и телевиденэм и лэжьакIуэ Мамхэгъ Белэ сымэ.
Адыгэ Хасэм и тхьэмадэ Аслъэнхэ Алий фIэхъус гуапэ ярихащ зэIущIэм кърагъэблэгъахэм икIи псоми ягу къигъэкIыжащ шыщхьэIум и 1-м адыгэхэм я дежкIэ мыхьэнэшхуэ зэриIэр.
- Хуабжьу ди гуапэщ фи адэжь Хэку зэрывгъуэтыжар, фыгуфIэу, фыгушхуэу фыкъызэрытхыхьэр. Ди лъэпкъым щыщ дэтхэнэми хузэфIэкI ещIэ фи щыIэкIэ-псэукIэр ефIэкIуэным, фызыхуей вгъуэтыным теухуауэ. Дызэкъуэтщ, дызэдоIэпыкъужри, Iуэхухэми лъэпощхьэпохэми даполъэщ. Пэжщ, а лъэныкъуэхэмкIэ Адыгэ Хасэм и пщэрылъыр нэхъыбэщи, зэдмыгъэтIылъэкIыу, IэщIыб дымыщIу къытхуэкIуэжахэм я Iуэхухэр ди нэIэм щIэдгъэтщ, дытолажьэ, догъэкIуатэ. ФыкъыздекIуэлIэжа адэжь жьэгум фыщытыншыным дэтхэнэри гу зэIухакIэ дыхущIокъу, - къыхигъэщащ Алий.
КъинэмыщIауэ, Хасэм и тхьэмадэр къытеувыIащ Къэрэшей-Шэрджэсыр псэупIэ зыхуэхъуа ди лъэпкъэгъухэм, зэман зэхуэмыдэхэм Щамым къикIыжа унагъуэ къэс зэралъыкъуэкIым, зыхуей зэрыхуагъазэм, зэрадэIэпыкъум, цIыху къэс зытегузэвыхь елъытауэ гулъытэ зэрыхуащIым. И гуапэу къыхигъэщащ нобэ Къэрэшей-Шэрджэс Республикэм щетIысэха ди лъэпкъэгъуу хъуам, ахэр цIыху 35-м зэрынохьэсри, Урысейм и цIыху зэрыхъуам щыхьэт техъуэ дэфтэр зэраIэр, я бынхэри зыщеджэнухэмкIэ къызэрызэрагъэпэщыр.
Хасэм и тхьэмадэм гу лъитащ гъэ псом и кIыхьагъкIэ ди лъэпкъэгъухэр я нэIэм щIамыгъэкIми, Хэкум къэзыгъэзэжам и махуэм нэхъри нэхъ гулъытэ хэха абыхэм зэрырагъэгъуэтым. АтIэ, ахэр къызэхуашэс, я щыIэкIэ-псэукIэм зыщагъэгъуазэ, зытегузэвыхьхэм щIоупщIэ, ягу зэIухауэ зэдоуэршэрхэ.
- Хэкум къэзыгъэзэжауэ нобэ мы зэIущIэм къеблэгъахэми къэмыкIуэфа адрей ди къуэш-шыпхъухэми яхуэдгъэхьэзыра саугъэт гуапэ диIэщ. Пщыхьэщхьэ Черкесск къалэм и амфитеатрым концерт щызытыну, адыгэм къытхэкIа музыкант цIэрыIуэ ЛIыбзу Аслъэн Хасэм фызэрыщызэхуэтшэсынур къыщищIэм, цIыху къэс билет тыгъэ къыфхуищIащ, - и гуапэу къыщIигъуащ Алий.
Къапщтэмэ, пшыхьым кърагъэблэгъа ди лъэпкъэгъухэм фIыщIэ хуащIащ Хасэм и Советым хэтхэм ящыщу АфIэунэ Исмэхьил, Лъыс Розэ, Жэгуэтэн Руслан, Абидокъуэ Люсанэ сымэ, къищынэмыщIауэ адыгэ, абазэ лъэпкъхэм я къуэ щыпкъэхэу Жумай Анзоррэ Пщымахуэ Алийрэ, нэгъуэщIхэми.
ЩОХЪУЖЬ Люсанэ.