Тхэквондо

Бразилием и пIэкIэ - Башкирием

Бадзэуэгъуэм 23-м щыщIэдзауэ шыщхьэуIум и 2 пщIондэ, Урысейм и мызакъуэу, хамэ къэрал спортсменхэри хэту, Башкирием щекIуэкIынущ зи узыншагъэм сэкъат иIэхэм я сурдолимпиадэ.

«Спортым дызэкъуегъэувэ». Аращ абы и къыхуеджэныгъэу щытынур. Абы хэтынущ тхэквондомкIэ зэфIэкI зиIэу зыкъэзыгъэлъэгъуа ди адыгэ хъыджэбз цIыкIуитI. Ахэр Сатушы Мадинэрэ (килограмм 49-рэ) Жылэ Татьянэрэщ (килограмм 67-рэ). Бразилием щекIуэкIыну дунейпсо Сурдолимпиадэрт здэкIуэну щытар. Ар Мадинэрэ Татьянэрэ хуэдэ спортсменкэхэми я хъуэпсапIэщ. Ауэ, ди жагъуэ зэрыхъунщи, политикэмрэ спортымрэ зэхэзыпщэхэм я зэранкIэ Урысейм щыщхэр абы хагъэтынукъым. Апхуэдэу щыхъум, ди къэралым езым и джэгухэр къызэрегъэпэщыж. Дохъуэхъу ди хъыджэбз цIыкIухэм абы ехъулэныгъэ щаIэну.

Бокс

Ди щIалэхэм я ехъулIэныгъэхэр

Шэшэн Республикэм и къалащхьэ Грознэм боксымкIэ урысейпсо зэхьэзэхуэ, спортым и мастеру щыта Турпал-Али Кукаевым и фэеплъу, щрагъэкIуэкIащ. Мыбы хэтащ илъэс 19-м щыщIэдзауэ 40 хъу спортсмену 100-м нэс.

Къэбэрдей-Балъкъэрым и щIалитху а зэхьэзэхуэм хэтати, килограмм 80 зи хьэлъагъ гупым текIуэныгъитху зэкIэлъыпыту къихьри, япэ увыпIэр ХъуэкIуэн Алим къихьащ. Килограмм 75-рэ зи хьэлъагъхэм я деж Гъуэтыж Темыркъан ещанэ увыпIэр щиубыдащ.

Ди спортсменхэм я гъэсакIуэр Занилов Муратщ.

Бгым псынщIэу дэкIын

Зэпеуэ нэхъыщхьэхэр яублэнущ

ЦIыху миным щIигъу зыхэтыну гъэмахуэ зэпеуэ нэхъыщхьэр Iуащхьэмахуэ лъапэ шыщхьэуIум и 4-м щыщIэдзауэ и 6 пщIондэ щекIуэкIынущ. Абы хэтыну хуейхэм бадзэуэгъуэм и 30 пщIондэ «Эльбрус» курортым зыщрагъэтх хъунущ.

Зэхьэзэхуэм хэтынухэм блэнейрэ псори зэхэту километр 360-рэ зэпачынущ, Iуащхьэмахуэ лъапэ, Бахъсэн, Джылы Су, мымащIэу мы щIыналъэм щыIэ нэхъ щIыпIэ дахэхэм километр 60-кIэ, 100-кIэ къыщызэдэжэнущ. Зи лъэкIыныгъэм шэч къытезымыхьэ спортсменхэр километр 35-кIэ къызэдэжэу, метр 3100-рэ зи лъагагъ бгым дэкIынущ.

Мыбы щхьэхуэу щызэпеуэнущ зи ныбжьыр илъэсих иримыкъуахэр. Ахэр Азау губгъуэм метр 500-кIэ къыщызэдэжэнущ, абыхэм нэхърэ нэхъыжьхэр метр 1000-м щызэпеуэнущ. Зэхьэзэхуэр къызэзыгъэпэщхэр зыхущIэкъур псори арэзы ящIу махуэшхуэхэр нэгузыужьу егъэкIуэкIынырщ

ШАФИЙ Аслъэн.