Мейкъуапэ щагъэлъагъуэ
КъуэкIыпIэ лъэпкъхэм гъуазджэмкIэ я къэрал музей Москва дэтым Мейкъуапэ къалэм щиIэ и къудамэм щагъэлъагъуэ ди республикэм и сурэтыщI цIэрыIуэхэу Аккизовхэ Екъубрэ Сиярэрэ я лэжьыгъэхэр щызэхуэхьэса «Укрощение иллюзий» выставкэр. Абы хагъэхьащ зэщхьэгъусэхэм илъэс зэмылIэужьыгъуэхэм я Iэдакъэ къыщIэкIа сурэтхэр. Гъэлъэгъуэныгъэр къызэрагъэпэщащ УФ-м ЩэнхабзэмкIэ и министерствэм, КъуэкIыпIэ лъэпкъхэм гъуазджэмкIэ я къэрал музей Москва дэтым Мейкъуапэ къалэм щиIэ и къудамэм, КъБР-м и СурэтыщIхэм я зэгухьэныгъэм.
СурэтыщI гъуазджэм дихьэххэу ди къэралми хамэ щIыналъэхэми щыпсэухэр фIыуэ щыгъуазэщ Аккизовхэ Екъубрэ Сиярэрэ я лэжьыгъэхэм. КъБР-м щIыхь зиIэ и художник, КъБР-м гъуазджэмкIэ и Къэрал саугъэтыр зыхуагъэфэща Аккизов Екъуб мы IэщIагъэм хуеджа япэ балъкъэр художникщ. Ар станковэ живописымрэ сурэт щIынымрэ хуэIэзэу щытащ. КъБР-м и къэрал гербыр, юбилей, фэеплъ дамыгъэхэр игъэхьэзыращ, тхылъи I00-м щIигъу игъэщIэрэщIащ.
КъБР-м и цIыхубэ художник, ТворчествэхэмкIэ дунейпсо академием хэт, «Золотая палитра» дунейпсо выставкэм и лауреат Аккизовэ Сиярэрэ Екъубрэ илъэс 30-м щIигъукIэ зэдэлэжьащ. Сиярэ Екъуб дэзыхьэхыу щыта гъуазджэм, сурэт щIыным хуэпэжщ, къыщIэна лэжьыгъэхэри хуэсакъыу ехъумэ. Екъуб дунейм ехыжа нэужь, и щхьэгъусэм Лъэпкъ музейм фэеплъ гъэлъэгъуэныгъэ гукъинэж къыщыхузэригъэпэщащ. Абыхэм щхьэхуэу я Iэдакъэ къыщIэкIахэри, зэдагъэхьэзыра сурэтхэри Къэбэрдей-Балъкъэрым и сурэтыщI гъуазджэм и гъэтIылъыгъэм хагъэхьащ. Екъуб дунейм ехъыжа нэужь, Сиярэ пищащ я лэжьыгъэхэм. Абыхэм я щIэблэри я лъагъум ирикIуэжауэ республикэм и гъуазджэр ягъэбей. Япхъу Имарэ сурэтыщI нэхъыфIхэм ящыщщ.
Гъуазджэм хуэпэж икIи абы хэлъхьэныгъэфIхэр хуэзыщI, зи лэжьыгъэхэр куэдым ягу дыхьэ художник цIэрыIуэ Аккизовэ Сиярэ I975 гъэм УФ-м и СурэтыщIхэм я зэгухьэныгъэм хагъэхьащ. Ар республикэпсо, урысейпсо, союзпсо, хамэ къэрал (Польшэм, Болгарием, Германием) выставкэхэм хэтащ. Налшык, Пятигорск, Киев, Тбилиси, Мэхъэчкъалэ, Грознэм, Москва щигъэлъэгъуа и лэжьыгъэхэр куэдым ягу къинэжащ. Дунейпсо выставкэм пщIэшхуэ щигъуэтащ нарт IуэрыIуатэм къыхэщ лIыхъужьхэм я сурэтхэу зэщхьэгъусэхэм я Iэдакъэ къыщIэкIахэм.
Сиярэ и сурэтхэр и лэжьэгъухэм апхуэдизкIэ яфIэщIэщыгъуэщи, сыхьэт бжыгъэкIэ уеплъми зыщомыгъэнщIу щIэ гуэр халъагъуэу, гупсысэ хэлъу, нэхурэ дахагъэкIэ гъэнщIауэ жаIэ. Сиярэ зэманымрэ гъащIэмрэ щIэуэ къагъэувхэм задезыгъэкIуфщ. Абы иджырей Iэмэпсымэхэм ирилэжьэфу зригъэсащ, инджылызыбзэр зригъэщIащ. СурэтыщIым и лэжьыгъэхэм пщIэ зэраIэм и щыхьэтщ КъБР-м и Iэтащхьэм и унафэкIэ 20I8 гъэм Аккизовэ Сиярэ КъБР-м и ЩIыхь тхылъыр къызэрыхуагъэфэщар. Мейкъуапэ щекIуэкI выставкэр шыщхьэуIум и 7 пщIондэ лэжьэнущ.
ТЕКIУЖЬ Заретэ.
