«Лазурная волна - Сочи 2023» гъуазджэхэмкIэ VIII дунейпсо зэпеуэмрэ «Сочэ 2023» VII дунейпсо пленэр-зэпеуэмрэ зэхэту мэкъуауэгъуэм и 17-м щегъэжьауэ махуиплIкIэ Лазаревскэ щIыналъэм щекIуэкIащ.
Урысейм и щIыпIэ куэ-дым къикIа, зэфIэкI зиIэ гупхэр, уэрэджыIакIуэхэр зэхуэзышэсар Дунейпсо Арт комитетращ. А зэпеуэхэм я къэпщытакIуэ-хэм хэтащ цIыху цIэрыIуэхэу Бейтыгъуэн Iэуес, Дзугутовэ Лидие, Дзэгъэл Iэуес, Даур Иринэ, Погосян Вартан, Ало Алан сымэ, нэгъуэщIхэри.
Зэпеуэм и кIэух Iыхьэр, еплIанэ махуэр, абы хэтахэм я концерт инкIэ зэхуащIыжащ. КъызэгъэпэщакIуэхэм жаIащ а зэхыхьэр лъэпкъхэм яку дэлъ зэныбжьэгъугъэр зыгъэбыдэ Iуэхугъуэу зэрыщытыр. Гухэхъуэт икIи нэгузыужьт а концертыр. Зэпеуэм хэта псоми щIыхь, фIыщIэ тхылъхэр иратащ, нэхъыфIхэм дыщэ медалхэр хуагъэфэщащ.
«Лазурная волна - Сочи 2023» зэпеуэм и Гран-прир хуагъэфэщащ: къафэмкIэ - Урысейм щIыхь зиIэ и къэфакIуэ гуп, цIыхубэ къафэмкIэ «Псыгуэнсу» гупым (я унафэщIыр Мыз Хьэжмуратщ), Дагъыстэным я «Горцы» къэфакIуэ школымрэ «Ак-Таш» къафэмкIэ театрымрэ (унафэщIыр Солтангишев Магомедрасулщ), Кожлаев М. и цIэр зэрихьэу, зэфIэкI лъагэ зиIэ сабийхэм зыщагъасэу, Дагъыстэным щылажьэ «Килиан» гъуазджэхэмкIэ школым (унафэщIыр Магомедтагировэ Клавдиещ), Владикавказ къалэм щылажьэ «АРИОН» ныбжьыщIэ къэфакIуэ гу-пым (унафэщIыр Болатаев Эрикщ), Владикавказ дэт ГъуазджэхэмкIэ лицейм и лэжьакIуэ гупым (унафэ-щIыр Цагараевэ Джинэщ), уэрэд жыIэнымкIэ - Шэшэн Республикэм я «Ихьсан» сабий студием ( унафэщIыр Муцаевэ Седэщ), «BELKANTO» щапхъэ зытрах ансамблым и уэрэджыIакIуэ Погосян Гар- ри (егъэджакIуэр Феоктистовэ Дианэщ).
КъызэгъэпэщакIуэ гупым я унафэщI, Дунейпсо Арт комитетым и вице-президент Бейтыгъуэн Iэуес жиIащ мы зэпеуэм хэта псоми зэфIэкI ин ябгъэдэлъу къызэрилъытэр, я гуащIэ щымысхьу абыхэм ядэлэжьа егъэджакIуэхэм фIыщIи щытхъуи зэрахуэфащэр.
Тэрчокъуэ Дисэ.