Курск деж къыщахьа текIуэныгъэр илъэс 80 щрикъум ирихьэлIэу
Иужь зэманым куэдрэ зэхыдох зауэ Iуэху хэхам хэтхэм къебгъэрыкIуэну зызыгъэхьэзыр украин нацистхэм Гитлер IэщIэкIа щыуагъэм къытрамыгъэзэжыну КъухьэпIэм щыщхэм чэнджэщ къызэрыратыр. Дауи, мыбы фэрыщIыгъэ хэлъщ. Япэрауэ, ебгъэрыкIуэныгъэр сыт и лъэныкъуэкIи зыгъэхьэзырыр США-р зи унафэщI езы НАТО-рщ. ЕтIуанэрауэ, зэрыгурыIуэгъуэщи, абы апхуэдэу зыхуагъэхьэзыр ар зыхуэгъэзахэми. Аращи, а «чэнджэщхэр» нэхъыбэу зэхьэлIар, я мурадыр къаймыхъулIэмэ, езыхэр хейуэ хэкIыу, къуаншагъэ псори зытралъхьэн къагъуэтынырщ. Дауи, ар Украинэм и президент Зеленскэрщ.
Ауэ сыт хуэдэ щыуагъэ ди жагъуэгъу политикхэм зи гугъу ящIыр икIи ар етIощIанэ лIэщIыгъуэм и цIыху нэхъ бзаджэнаджэ дыдэу къалъыта Гитлер щхьэ хуэгъэза? А упщIэм и жэуапым дэ дыхуешэж илъэс 80 ипэкIэ, 1943 гъэм и гъэмахуэм, «Курская дуга» фIэщыгъэмкIэ тхыдэм хыхьа зауэшхуэм Дзэ Плъыжьым къыщихьа текIуэныгъэм.
... Сталинград деж хьэлэчу щыхагъэщIа иужь, нэмыцэ зауэлIхэм я лъэр щIэхуат, ягухэр иуда хъуат. Абыхэм гушхуэныгъэ халъхьэжын папщIэ фашистхэм абы ещхь текIуэныгъэ гуэр къахьын хуейт. Ари фIэкIыпIэ имыIэу СССР-м и щIыналъэм хуэзэу. ЩIыпIэр къыщыхахащ Орёл, Курск, Белгород областхэм я зэхуакум. 1943 гъэм мэлыжьыхьым и 15-м Гитлер итхыгъащ: «Зэхэуэр псынщIэу иухын хуейщ дэ дытекIуауэ. Курск деж къыщытхьыну текIуэныгъэр ди лъэщагъым и дамыгъэу дуней псом щыувынущ». Ар псом хуэмыдэу зыщыгугъыр вермахтым ярита «Тигр» танкыщIэ дыдэрт, абы къилъытэрт а Iэщэ лIэужьыгъуэр къэзыгъэувыIэфын къару а зэманым щымыIэу.
ЛъэныкъуитIри гъэмахуэм пэплъэрт. Зэхэуэхэр мащIэ хъуат. Фашистхэм я мурадт Дзэ Плъыжьыр къаухъуреихьу танкхэмкIэ зэхапIытIэну, иужькIи Москва къеIэну. Гитлер унафэ ищIащ ебгъэрыкIуэным замыгъэгувэу щIадзэну. Генерал-фельдмаршалхэу Манштеин Эрихрэ Модель Вальтеррэ ар яфIэпасэт: зауэшхуэр зытраухуа щIыпIэм деж нэмыцэхэм къарур къащемэщIэкIырт, ауэ совет зауэлIхэм къратыну жэуапыр узижагъуэну къыщIэкIынут. Модель, уеблэмэ фюрерым иригъэлъэгъуащ Дзэ Плъыжьым игъэбыда щIыпIэхэм траха сурэтхэр. АрщхьэкIэ Гитлер IэубыдыпIэншэт: ар щыгугъырт ищхьэкIэ щыIэ къару гуэрым, ар къыдэIэпыкъуным. Мис аращ и щыуагъэу иджы ираудэкIыжри. Пэжу, щебгъэрыкIуэну пIалъэр ягъэIэпхъуащ, арщхьэкIэ мурадым къыпыкIакъым. Генерал Гот къыхилъхьэри, танкыдзэр Прохоровкэ щIыпIэм ягъэIэпхъуащ, абдеж щытафэти, СССР-м и къарухэм удынышхуэ къыщрадзыфынут.
Фашистхэм я штаб нэхъыщхьэм хуабжьу егугъуу зигъэхьэзырырт, псори зэпилъыт хуэдэт. Къащыгъупщар зы закъуэт: абы ич дэтхэнэ лъэбакъуэми сакъыу кIэлъыплъырт совет дзэзешэхэр. Дыдейхэр щыгъуазэт Курск деж къыщезэуэну нэмыцэхэм зэрамурадым. Абы щыхьэт техъуащ тIасхъэщIэххэри, къалэм и гъунэгъуу бийм къаруушхуэ зэрызэщIигъэуIуэм теухуауэ партизанхэм къат хъыбархэри. Хэбгъэзыхьмэ, сыхьэтыр къэгъэнауэ, къыщеуэну дакъикъэри къащIат. Арати, псори екIуэкIащ вермахтым и штабым зэримыгугъам хуэдэу.
Нэмыцэхэм къебгъэрыкIуэу щIадзащ 1943 гъэм бадзэуэгъуэм и 5-м. Абы сыхьэтитIкIэ ипэ къихуэу советыдзэм и топышэхэм щIыр ягъэзджызджу хуежьащ. Ахэр апхуэдизкIэ зэщIэгъэуIуат, икIи, лъэщти, фашистхэр зыпэмыплъауэ къыщIэкIащ. Вермахтым и генералхэм зэуэ къагурыIуащ я мурадыр къызэрызэпаудар. Абыхэм къахуэнэжыр ебгъэрыкIуэныр ягъэувыIэу захъумэжыным яужь ихьэнырт. Апхуэдэ дыдэ къыщыхъуащ Белгород-Обоянь унэтIыныгъэми. Манштеин и корпусым унафэ хуищIащ ПрохоровкэкIэ кIуэцIрыкIыу Курск хуэкIуэну. Абдеж щызэIущIащ дыдейхэмрэ бийхэмрэ я танкхэр. Фашистхэр ди щIытIхэм къахуэкIуэрт, «Тигр» шынагъуэхэр япэ иту. Абыхэм къакIэлъыкIуэрт «Пантера»-хэмрэ нэхъ техникэ псынщIэмрэ. «Тигр»-хэм япкъхэр апхуэдизкIэ Iувти, ди топышэхэм пхраудыфыртэкъым, метрищэкIэ гъунэгъу къэхъуми. Мис ар ефIэкIыныгъэт! АрщхьэкIэ гъэщIэгъуэнщ - абыхэм япимыкIуэту къыщIэкIащ ЕтIуанэ дунейпсо зауэм и танк нэхъыфIу иужькIэ къалъыта ди «Т-34»-хэр. Абыхэм зэуапIэ губгъуэм тыншу зыщагъазэрт, зегъэкIуэгъуафIэт, къутами, псынщIэу пхузэгъэпэщыжырт. ИкIи, дауи, «Тигр»-хэмрэ «Пантера»-хэмрэ лъэпощхьэпо бзаджэу къахущIэкIащ лагъымхэр куэду зыщIатIа губгъуэр, совет бомбэзехьэхэм традзэ удынхэр. Ахэр апхуэдизкIэ гуащIэти, уазэрыпэлъэщын щыIэтэкъым. Зыри жамыIами, Дзэ Плъыжьым куэдкIэ нэхъыфIу зигъэхьэзырауэ къыщIэкIащ. Зэхэуэхэр нэхъ гуащIэу щыщыта бадзэуэгъуэм и 12-м и закъуэ бийхэм яфIэкIуэдащ танк 300-м щIигъу. Иджы ебгъэрыкIуэр ди къарухэрт, фашистхэм захъумэжырт. Совет фронтитхури жыджэру Iуэхум хэтт. Абыхэм хуит къащIыжащ Орёл, Белгород, Харьков къалэхэр. А ехъулIэныгъэшхуэм и саулыкъукIэ, Хэку зауэшхуэм зэрыщIидзэрэ япэ салютыр Москва щатауэ щытащ.
Фашистхэм Прохоровкэ яубыдыфакъым, советыдзэхэм я къарухэр пхатхъыфакъым. КIэщIу жыпIэмэ, я мурадам щыщу зыри къайхъулIакъым.
Сталинград хуэдэуи, совет зауэлIхэм мыбдежми къыщагъэлъэгъуащ псэемыблэж хахуагъэ. Абы и щапхъэхэр гъунэжщ. Топым и унафэщI Борисов Михаил къихутащ «Тигр» шынагъуэм и щIагъымкIэ гъущIыр зэрыщынэхъ пIащIэр икIи нэхъ зэрыпхыудыгъуафIэр. Абы хузэфIэкIащ апхуэдэ танки 7 икъутэн. Борисовым и бгъэм ЛIыхъужьым и Дыщэ Вагъуэр къыхалъхьащ икIи щымыгугъауэ, Сталиныр, Черчилль, Жуковыр, Молотовыр, Левитан сымэ, нэгъуэщIхэри я гъусэу ихуащ Гитлер езым и бий нэхъ кIэуфIыцIхэр зритхэ тхылъым. Борисовым хуэдэхэр къикIуэтынутэкъым. Лейтенант нэхъыщIэ Деревянкэ Алексей, танки 4 зыкъутам, и Iыхьлыхэм яхуитхырт: «Ди бийхэр бзаджэщ, зауэр гущIэгъуншэщ. ЗэвгъащIэ, саукI хъужыкъуэмэ, сэ лIыхъужьу фIэкIа си псэр стынукъым!?»
Курск къэухъуреихьыныгъэ ныкъуэм иужькIэ зыми шэч къытрихьэжакъым къару бзаджэнаджэм - фашизмэм - и бгыр зэрызэпаудынум.
АрщхьэкIэ нацизмэм и къуэпсхэр гъущакъым. Апхуэдиз илъэс дэкIа иужь ахэр, ди жагъуэ зэрыхъунщи, къыщыдэжыжащ ди гъунэгъу Украинэм. Дауи, КъухьэпIэ зэкъуэткIэ зэджэжыр дэмыIэпыкъуамэ, ар къызэфIэувэнутэкъым. Иджы нэгъуэщIым и жыIэм щIэувэну хуэмей Урысейм къыпэщIэтщ къару зэхэдзэкIэ. Вашингтонщ иужь зэманым мыувыIэу зи гугъу ящI ебгъэрыкIуэныгъэр зи унафэ щIэту ягъэхьэзырри, ищхьэкIэ зи гугъу щытщIа чэнджэщхэр къызыбгъэдэкIри. АрщхьэкIэ, зэрытлъагъущи, тхыдэр щыхьэт тохъуэ апхуэдэ бзаджэнаджагъэхэм гъуэгу зэрамыгъуэтым. Курск и щапхъэм и закъуэ ирикъунщ.
«Махуэкум» и къыдэкIыгъуэр зыгъэхьэзырар Шал Мухьэмэдщ.