Псы Iуфэм щыпсэууэ щыта пасэрей адыгэхэм сытым дежи къэралыгъуэ яIащ. Абыхэм къалэ щIэращIэхэр яухуэрт, сату Iуэхушхуэхэм зэрыхэтымкIэ дуней псом къыщацIыхурт. Тхы-дэм къыхэна щIэныгъэр щыхьэт зытехъуэ адыгэ къалэхэм ящыщщ Тэнэисыр (Танаис), алыдж зэрыпхъуакIуэхэм я дамэ щIагъэувауэ щы-та мэуэт къалэр. Ди лъэхъэнэм ипэкIэ 100 - ди лъэхъэнэм и 300 гъэхэм щыIа къалэр тIэунейрэ зэхакъутэурэ яухуэжащ. ЛIэщIыгъуэ зыбжанэкIэ къалъыхъуа Тэнэис и щэхухэм ящыщ зыуэ аращ ар щIызэтракъутам и щхьэусыгъуэр!
Тхыдэтх, географ Страбон и тхыгъэхэм щытопсэлъыхь а къалэм, алыджхэм зэрызэхакъутар къыхигъэщу. Ауэ абы щхьэусыгъуэ хуэхъуам и гугъу ищIыркъым, ди жагъуэ зэрыхъунщи. ИужьыIуэкIэ къызэрахутамкIэ, псы Iуфэм Iуса къалэхэм я нэхъ лъэрызехьэ дыдэхэм ящыщу, сатущIапIэ лъэщу щытащ Тэнэисыр, Мэуэтейм и къалэ телъыджэр.
Япэ дыдэу а къалэм и лъэужь теувар урыс археологием и лъабжьэр зыгъэтIылъа Стемпковский Иванрэ Дюбрюкс (Поль) Павелрэщ. Стемпковскэр Париж кIуэуэ, Страбон и «География» тхылъ 17-р щIиджыкIа нэужь, къыгурыIуат Тэн псыр Iузэвым щыхыхьэжым деж пасэрей Тэнэисыр зэрыщытар. Ауэ академикыр Iузэв и кавказ Iуфэм къэсу псори и нэкIэ зригъэлъэгъуа нэужь, къыгурыIуащ илъэс мини 2-м къриубыдэу псы Iуфэм зэрызихъуэжар: пасэрей къалэжьхэр е псым щIилъэфат, е илъэсат, е псыр къеуэурэ зэтрикъутэри, мывэ къутахуэу зэхэщэщэжат. Абы хуигъэфэщащ Тэнэисыр Тэн псым и сэмэгурабгъум тесауэ, ауэ зы щыхьэти къыхуэгъуэтакъым. Апхуэдэу щыхъум, ТаганрогкIэ екIуэкIри, щIэупщIащ. Абдежи IуэрыIуатэм къыщыхэщтэкъым а щIыпIэм зэгуэр къалэр щыIэххауэ.
Стемпковскэр цIыху ерыщт, къынтIэсынтIэти, зыгуэр къимыгъуэту кIуэжынутэкъым. Арати, егупсысу щIидзащ: Iузэв и Iэхэлъахэр пшахъуэщIщ, укIуэцIрощэт, абы Тэнэисыр щIэтIысыкIауэ къыщIэкIынущи, умылъыхъуэххэми хъунущ. Абы пасэрейхэр щыгъуазэу щытамэ, мыхъейуэ щIы быдэ гуэрым тращIыхьагъэнущ къалэр… Недвиговкэ къуажэм «мыхъей» псалъэр и лъабжьэ щыхъуакIэ, аращ щIы быдэу щытари, Тэнэис щылъыхъуэн хуейри. Пэжу, къуажэм километр зыбжанэкIэ пэжыжьэу Иван къигъуэтат быдапIэ блынхэр, хьэкхъуафэ дэтIыкIахэр, алыдж хьэкъущыкъу къутахуэхэр, ахъшэ жьгъейхэр.
Стемпковский а къэхутэныгъэр и кIэм нигъэсакъым, апхуэдизу зыщIэбэгыу щыта къалэри къитэщIыжакъым, куэд дэмыкIыу дунейм зэрехыжам къыхэкIыу.
Абы лъандэрэ илъэс 30 дэкIыжауэ, Николай Езанэ пащтыхьым Ростов областым и щIыр къэзакъхэм ятригуэшэн щIидзащ. Абы и министру щыта Перовский Лев идакъым пасэрей Тэнэи-сыр здэщытауэ зыхуагъэфащэ щIым лей зэрырахыр. «Къэзакъхэм епта щIым археологиемкIэ мыхьэнэшхуэ иIэщ. Ар абыхэм зэхатIыхьынущ, хъугъуэфIыгъуэу къыщIахыр зыкIэщIаупщIэнущ, быдапIэ къагъуэтыжам и блынхэр зэхакъутэнурэ, унэ, псэуалъэ щащIкIэ къагъэсэбэпынущ. И чэзу къэсауэ къысщохъу Тэнэисыр къэттэщIыжыным!», - жиIэри, пащтыхьым хуитхат абы. Пасэрей къалэжьхэм къащIэныжа хъугъуэфIыгъуэхэм хуэнэпсей пащтыхьыр арэзы хъури, илъэс 30 фIэкIа мыхъу профессор Леонтьев Павел унафэщIу яхэту, археолог гуп къиутIыпщащ, Тэнэис къагъуэтыжыну къалэн къащищIри.
ЩIэныгъэлI жыIэдаIуэр къэсри, занщIэу еувэлIащ Iуэхум. Ауэ и кIэн къикIакъым… Тэнэис здэщыта щIыпIэм и Iэхэлъахэм ит мэуэт, щэрмэт Iуащхьэхэр куэд щIауэ зэхадыгъуауэ, уасэ зиIэ гуэри щIэмылъыжу къыщIэкIащ. Ауэ щыхъум, пащтыхьым и ней къыщыхуэнкIэ шынэри, Леонтьевым лэжьакIуэхэм я зэхуэдитIым Недвиговкэ жылэ цIыкIум и лъабжьэр щIатIыкIыну унафэ яхуищIащ. Абы быдэу и фIэщ хъурт иджыри илъэс 35-рэ и пэкIэ Стемпковскэм жиIауэ щытар - а къуажэм и лъабжьэм Тэнэис зэрыщIэлъыр.
Пэжу, Недвиговкэ къуажэм и лъабжьэм къалэжь къыщагъуэтыжащ абы щыгъуэ, ауэ ар мыхьэнэншэт, къызэрыгуэкIт, блынхэр Iушэт, лъахъшэт, хьэкъущыкъухэр а лъэхъэнэм щыIэн хуеяхэм нэхърэ куэдкIэ нэхъ фейцейт. Къыпщыхъурт абы щыпсэуа цIыхухэр жьэгум пэрысу къекIуэкIауэ, унэ зэращI къудей ямыщIэу. Леонтьевым и гукъыдэжыр зэуэ къехуэхащ, абы и фIэщ ищIыну хуейтэкъым пасэрей Тэнэисыр апхуэдэ дыдэу тхьэмыщкIэу, мыфэмыцу, хуэмыщIауэ щытауэ. «Страбон зэритхамкIэ, ди лъэхъэнэм и 100 гъэхэм и кIэм ирихьэлIэу Тэнэисыр зэтезыкъутар боспорыпщ Полемонщ. Мы къыщIэттIыкIыжар абы куэд дыдэкIэ къыщхьэщокI, уеблэмэ алыджхэм Iэпэ хуамыхьам хуэдэу, нэгъуэщI культурэщ зыщIар. Мыр Тэнэискъым!», - итхыжауэ щытащ щIэныгъэлIым.
Леонтьевым къэлыбауэ апхуэдэу итха щхьэкIэ, мыгувэу гупым мрамор блын зыбжанэ къыщIагъэщащ, тхыгъэ гуэрхэр тедзауэ. Абдежым Павел и фIэщ ищIын хуей хъуащ, минрэ игу иримыхьми, Недвиговкэ и лъабжьэм щIэлъыр зэры-Тэнэисыр. Мрамор блыным тетым тепщIыхьмэ, ар япэрей Тэнэисыр зэтракъута нэужь, Къуэтий Ещанэм и хьэмтетыгъуэм яухуэжа Тэнэис етIуанэрт. Леонтьевыр теужащ. Страбон зи гугъу ищI Тэнэисыр нэгъуэщI щIыпIэт зыщIэлъыр, икIи щыIэт, етIуанэр къыщагъуэтакIэ. ЩIэныгъэлIым пасэрей тхыгъэжьхэр къиIэтыжри, набдзэгубдзаплъэу щIиджыкIащ, щIэныгъэу бгъэдэлъыр зэригъэзэхуэжри, алъандэрэ зы цIыхум игу къэмыкIа Зэшитху IуащхьэхэмкIэ еплъэкIащ. Абы къызэрибжамкIэ, абыхэм я лъабжьэм щIэлът пасэрей Тэнэисыр. Ауэ щыхъум, Недвиговкэ деж Леонтьевым къыщIитIыкIыжа къалэм Тэнэис цIыкIу фIащащ, икIи 1867 гъэм Пащтыхь Археолог комиссэм лэжьыгъэшхуэхэр зэхиублащ Тэнэисышхуэр Зэшитхум я лъабжьэм къыщIэхыжынымкIэ.
Мызыгъуэгум лэжьакIуэ гупым унафэщIу яхэтыр фон Тизенгаузен Владимир баронырт. Недвиговкэ и Iэхэлъахэм къыщигъуэтыжа Iэмэпсымэ, хьэпшып къызэрыгуэкIхэмкIэ мыарэзыуэ, Анапэ и Iэхэлъахэм ит Зэшибл Iуащхьэхэри зэхитIыхьащ абы. Мис а Iуащхьэхэм я лъабжьэм бароным къыщыщIихат дыщэ хьэкъущыкъухэмрэ Iэмэпсымэхэмрэ. Ауэ абы теухуауэ зы псалъи къыхигъэщакъым иригъэкIуэкIа лэжьыгъэр зритхэ тхылъым. Бароным пащтыхьыр къигъэщIэхъуащ, къыIэрыхьа къулеигъэхэр къищтэри, зигъэбзэхыжащ, щIэныгъэм зыгуэркIэ сэбэп хуэхъун зы псалъи къызэримынэкIыу.
ЩIы лъабжьэм щIэбэмпIыхь къалэжьыр езыр-езыру нэхумкIэ къеIэу къыщIэкIащ: Ростов - Таганрог гъущI гъуэгур щытралъхьэм щыгъуэ лэжьакIуэхэм зэрымыщIэкIэ къагъуэтыжащ ар. «Донские новости» газетым 1869 гъэм къытехуащ е АзовкIэ, е ДонкIэ кIуэуэ щIэкIыпIэ гуэрхэр щIым щIэлъу къызэратIэщIам теухуа тхыгъэ. ЗэрыжаIэмкIэ, абдеж къыщIахыжат дыщэ хьэпшыпхэмрэ ахъшэ жьгъей бжыгъэншэхэмрэ.
1870 гъэм къыщыщIэдзауэ илъэс 50-кIэ археологхэм мызэ-мытIэу ягъэзэжащ а щIыпIэм, Тэнэисыр къагъуэтыжыну пабгъэу. А зэманым къриубыдэу Недвиговкэ жылэшхуэу тIысыжащ, унагъуэщIэхэр къахэтIысхьэм, унэщIэхэр дащIыхьурэ. ИкIи археологхэм къатIэщIаIами, цIыхухэм зэхадыгъуащ, щIым къыщIахыж мывэхэмкIэ псэуалъэхэр зэтралъхьащ.
1950 гъэхэм совет археологхэм щIэрыщIэу ятхыжащ Тэнэис и экономикэ, политикэ, щэнхабзэ тхыдэр…
АтIэ, къызэрахутамкIэ, Тэнэисыр боспорыпщ Полемон зэхикъутат. И щхьэусыгъуэр къахуэщIакъым, ауэ ар хьэкъщ. Къалэм зэмыпычу боспорыпщым тын иритырт, Пантикопейми гужьгъэжь лъэпкъ къыхуимыIэу къэгъуэгурыкIуэрт. Арати, зэшэзэпIэу, пщым и къалэхэм ящыщ зыр зэтрикъутэну мурад ищIащ. Апхуэдэ гуэр къыхощыж урыс тхыдэми - Иуан Ябгэм Новгородыр 1570 гъэм зэригъэсыжар, псалъэм папщIэ. Урыс пащтыхьым апхуэдэу щIищам и щхьэусыгъуэр тхыдэм дахэ дыдэу къретхэкI, ауэ Полемон Тэнэисыр щхьэ игъэсын хуей хъуа?
Полемон пащтыхьыгъуэм хуэзышар урымхэрщ. Ди лъэхъэнэм ипэкIэ 14 - 8 гъэхэм къриубыдэу хьэмтетыгъуэр зезыхьа пщыжьым пэщIэувэу, тын ирамытыну, щхьэхуэу псэуну хуейуэ мурад зыщIа, Тэнэис дэса лъэпкъым зыкъиIэтати, абы щхьэкIэ къалэр зэтракъутауэ хуагъэфащэ тхыдэджхэм.
А лъэхъэнэм Мэуэтейм щыпсэуа лъэпкъыр наIуэщ - адыгэхэр къызытехъукIыжа мэуэтхэр, ахэр ерыщу, лъы пщтыру, хахуэу зэрыщытари ящIэж. Арагъэнущ зытекIуэдэжари - боспорыпщым и дамэм къыщIэкIыну хуейуэ ныкъуэкъуэн зэрыщIадзар.
Тэнэис лъыхъуа щIэныгъэлIхэм адыгэбзэ ящIэу щытамэ, апхуэдиз илъэскIэ лъыхъуэну къыщIэкIынтэкъым къалэм. Сыту жыпIэмэ, Тэнэис щыпсэуа лъэпкъым и бзэмкIэ фIищыжат а фIэщыгъэцIэр, умылъыхъуэми, къызэрыбгурыIуэнкIэ наIуэу: Тэнэис - Тэн и Iэхэлъахэм ис.
Фырэ Анфисэ.