Хабзэ зэрыхъуауэ, мэлыжьыхьым и 30-м ягъэлъапIэ Урысейм МафIэсым пэщIэтынымкIэ и IуэхущIапIэм и махуэр. Ар къызэрызэрагъэпэщрэ илъэс 374-рэ, абы и къудамэ КъБР-м зэрыщыIэрэ илъэси 189-рэ ирокъу мы гъэм. А Iуэхугъуэхэм хуэгъэпсауэ ирагъэкIуэкIащ сабий творчествэмкIэ республикэ зэпеуэ. Абы щытекIуахэмрэ къыхэжаныкIахэмрэ щагъэлъэпIащ Къэбэрдей-Балъкъэрым мафIэсым пэщIэт-къегъэлакIуэ IуэхущIапIэм.
Зэхьэзэхуэм и къызэгъэпэщакIуэщ Къэбэрдей-Балъкъэрым и мафIэс-къегъэлакIуэ IуэхущIапIэр, Урысейм и МЧС-м и управленэ нэхъыщхьэу КъБР-м щыIэр, КъБР-м Егъэджэныгъэмрэ щIэныгъэмкIэ и министерствэмрэ МафIэсым пэщIэтынымкIэ урысейпсо зэгухьэныгъэм и республикэ къудамэм и Налшык къалэ IэнатIэмрэ.
Пресс-IуэхущIапIэм и унафэщI Сэбан Арсен къызэрыджиIащи, зэпеуэмкIэ я мурадыр мафIэсым зэрызыщахъумэн хуейр ныбжьыщIэхэм къагурыгъэIуэнырщ, а IэщIагъэм и мыхьэнэр убгъуауэ яхэпщэнырщ.
ИщхьэкIэ къыхэдгъэща IуэхущIапIэхэм я лIыкIуэхэр зыхэта зэпеуэм и къэпщытакIуэхэм IэдакъэщIэкI нэхъыфIу щырыщ къыхахащ «МафIэс шынагъуэншагъэр - сабийхэм я нэкIэ» (1 - 4-нэ классхэм щеджэхэм), «МафIэсгъэункIыфIыр лIыхъужьхэм я IэщIагъэщ!» (5 - 8-нэ классхэм щеджэхэм) унэтIыныгъэхэм.
«МафIэс шынагъуэншагъэр - сабийхэм я нэкIэ» зэпеуэм бжьыпэр щиубыдащ Май районым и Новоивановскэ къуажэм дэт, Козуб Шурэ и цIэр зезыхьэ лицей №7-м и 1-нэ классым щеджэ Талаев Дмитрий. ЕтIуанэ увыпIэр къихьащ Бахъсэн районым и ХьэтIохъущыкъуей къуажэм дэт, КIурашын Т. М. и цIэр зезыхьэ курыт еджапIэ №1-м и 2-нэ класс «б»-м щIэс Гуэрдэгуэжь Динэ. Ещанэ увыпIэр лъысащ Лэскэн районым хыхьэ Аргудан къуажэм и курыт еджапIэ №3-м и 1-нэ «а» классым щеджэ Иуан Эрнелэ.
«МафIэсгъэункIыфIыр лIыхъужьхэм я IэщIагъэщ!» зэхьэзэхуэм щытекIуащ Лэскэн районым хыхьэ Аргудан къуажэм и курыт еджапIэ №1-м и 6-нэ «а» классым щIэс Iэрэмысэ Асидэ. Нарткъалэ и лицей №1-м и 5-нэ «в» классым щеджэ Цуркан Вероникэ етIуанэ хъуащ. Шэрэдж районым хыхьэ Зэрэгъыж къуажэм IутIыж Б. Къу. и цIэр зезыхьэ и курыт еджапIэм и 5-нэ «а» классым щIэс Бэджий Данияр ещанэ увыпIэр къихьащ.
МафIэсым пэщIэт-къегъэлакIуэ къулыкъущIапIэм и унафэщI Къардэн Анзор зэхьэзэхуэм кърикIуахэр къыщызэщIикъуэжым къыхигъэщащ кIэух зэхьэзэхуэм щагъэлъэгъуа лэжьыгъэхэр гунэс зэрыщыхъуар, жиIащ мыпхуэдэ Iуэхухэр мафIэсым зэрызыщыхъумапхъэм школакIуэхэм нэхъыфIу хащIыкIыным сэбэп зэрыхуэхъум и мызакъуэу, сабийхэм я зэранкIэ къэхъу мафIэсхэри гъэмэщIэнымрэ мафIэсгъэункIыфI IэщIагъэм щIалэхэр дегъэхьэхынымкIи, абы ирилажьэхэм я пщIэр IэтынымкIи мыхьэнэшхуэ зэраIэр.
Сабий творчествэмкIэ зэпеуэм щытекIуахэмрэ къыхэжаныкIахэмрэ иратащ дипломхэр, щIыхь тхылъхэр, КъБР-м СпортымкIэ и министерствэмрэ «Нальчик-сладость» ООО-мрэ къабгъэдэкI саугъэт лъапIэхэр.
УЭРДОКЪУЭ Женя.
