Кёп болмай КъМР-ни саулукъ сакълау министри Рустам Калибатов, Нальчикде Республикалы сабий клиника больницада болуп, тынгылы ремонт къалай баргъаны бла шагъырейленнгенди, деп билдириледи ведомствону пресс-службасындан.
Мекямны жангыртыргъа эм керекли оборудование бла жалчытыргъа къыралны Правительствосуну резерв фондундан 120 миллиондан аслам сом бёлюннгенди. Ишле былтырны ахырында башланнгандыла.
Бюгюнлюкде подряд организацияны келечилери эки корпусда юй башларында къанжалларын алышып бошай турадыла. Аны бла бирге биринчиден башлап ючюнчю этажгъа дери жангыртыу ишле къыстау барадыла.
Медицина учрежденияны баш врачыны къуллугъун толтургъан Мадина Кашежева билдиргеннге кёре, стационарны корпусларында ремонт баргъанлыкъгъа, аны харкюнлюк ишине чырмау салынмайды. Жаланда саусузланы жатхан жерлерини бир кесегин азайтыргъа тюшгенди. Алай эсе да, керек болса, аланы санына къошар амал барды.
Проектге кёре, корпусланы алтысында да юй башларыны къанжалларын, терезелерин, эшиклерин, коммуникацияларын, хауа жюрюген системаларын эм от тюшгенни билдирген сигнализацияларын да жангыртырыкъдыла. Ол санда бийик технологиялы операцияла этерге жарагъан хирургия корпус эм приём бардыргъан бёлюм да ачыллыкъдыла. Арбазы да айбат болурча мадар этилликди.
Объектни жангыртыу ишле быйылны ахырына тамамланыллыкъдыла.
Магометланы
Сулейман.