Хурметли жерлешле!

Бу кюнледе малкъар халкъны туугъан жеринден зор бла кёчюрюлгенине 78 жыл болады. Биз ол кезиуледе кеслерини жууукъларын, ахлуларын тас этген, кёп къыйынлыкъла сынагъан хар юйюрге жан аурутабыз. Он мингле бла терсликлери болмагъан инсанла адам улугъа къажау ниетле бла бардырылгъан аманлыкъчылыкъ ишлени хаталарындан жоюлуп кетгендиле. Кёчгюнчюлюк къыйынлыкъ Къабарты-Малкъарны тарыхында бек къоркъуулу бетледен бирича къалгъанды.

Биз битеулю тарыхыбызны ол ажымлы кезиуюн унутургъа керек тюйюлбюз, аллай иш энди бир заманда да къайтарылмазча этерге борчлубуз.

Киши жеринде сау онюч жыл тургъанлыкъгъа, малкъар халкъ бюгюлмегенди. Акъыллылыгъы, тёзюмлюлюгю эм жюрек кючлюлюгю анга, къыйынлыкъланы кётюрюрге болушхандан сора да, ёз жерлерине тин байлыкъларын, тиллерин, маданиятларын эм иш кёллюлюклерин сакълап къайтыргъа да себеплик этгендиле. Бюгюнлюкде малкъар халкъ Къабарты-Малкъарны кёп миллетли бирикген юйюрюнде айныйды, республиканы эм битеу Россейни экономика, социал эм маданият ёсюуюне кесини тийишли юлюшюн къошады.

Биз мамырлыкъда эм келишиулюкде, бирлигибизни кючлеп, къайсы къыйынлыкълагъа да къажау тураллыгъыбызгъа, ёз Къабарты-Малкъарны эм Ата журтубузну игилигине деп салгъан борчларыбызгъа жеталлыгъыбызгъа толу ийнанама.