КъМР-ни Башчысы Казбек Коков Нальчикде 1-чи номерли сабий поликлиниканы жангыртыу къалай баргъанына къарагъанды.

- Учрежденияны мекямына ремонт этиуге саулай да 60 миллион сомдан аслам бёлюннгенди. Битеу ишлени быйылны ахырына бошаргъа белгиленеди, - деп билдиргенди республиканы оноучусуна КъМР-ни саулукъ сакълау министри Рустам Калибатов.

Поликлиникада бола тургъан тюрлениулени юслеринден а аны баш врачыны къуллугъун толтургъан Мадина Кашежева айтханды. Жангы юч къатлы мекям къошулса, поликлиниканы жери эки кереге кенг боллукъду. Бюгюнлюкде ол 1620 квадрат метрде орналыпды. Ол а республиканы ара шахарыны сабийлерин медицина болушлукъ бла тынгылы жалчытыргъа азлыкъ этеди. Мында 35 мингден артыкъ сабий эсепде турады.

Поликлиника жангыртылгъандан сора, аны биринчи къатысында диагностика бёлюм, врачха кирирни кезиуюн сакъларча, ана бла сабий турурча отоула да орналлыкъдыла. Кюндюзгю хирургия стационар ачыллыкъды. Адамланы эмда жюклени ташыгъан лифтле ишлерикдиле. Келгенлени экиге бёллюкдюле: ОРВИ-ден ауругъанла энчи эшикледен кирликдиле.

Былтыр поликлиника Республикалы сабий клиника больницаны оноууна берилгенди. Россейни Правительствосуну себеплиги бла резерв фонддан бу учрежденияны жангыртыугъа бла оборудованиясын алышындырыугъа 120 миллион сомдан аслам жиберилгенди. Больницаны корпусларында инженер коммуникацияланы алышындырлыкъдыла, хауаны тазалаучу системаны жангыртырыкъдыла. Мекямны ичи, тышы, тёгереги да тапландырыллыкъдыла – къысхасы, больница танымазча боллукъду.

Шёндюгю  медицина оборудование алыргъа да белгиленеди. Дагъыда больницада саусузланы алгъан жангы бёлюм ачыллыкъды. Ол да бек керек болуп турады, нек дегенде бери битеу республикадан сабийлени келтиредиле. Мында да битеу ишлени быйылны ахырына бошаргъа белгиленеди.

Казбек Коков жангыртыу ишлеге учрежденияны башчылары кибик, министерство да дайым кёз-къулакъ болгъанлай турургъа кереклисин эсгертгенди. Ол къурулуш къалай баргъанына къарап чыкъгъандан сора, жангы корпусну проекти бла да шагъырейленнгенди, педиатрия службаны айнытыуну юсюнден ушакъны эсеплерине тийишли буйрукъла да бергенди.