КъМР-ни Башчысы Казбек Коков Москвада Жаш тёлюню ишлери жаны бла федерал агентствону таматасы Ксения Разуваева бла ишчи тюбешиу бардыргъанды.

Тюбешиуню кезиуюнде Къабарты-Малкъар Республикада жаш тёлю политиканы юсюнден сорууланы сюзгендиле. Казбек Коков белгилегеннге кёре, быйыл эм андан ары жыллада жаш тёлю бла байламлы жумушланы айнытыу республиканы къырал политикасында магъаналы жерни аллыкъды. «Бизни республикада тийишли къырал институтла бардыла, жамауат эм жаш тёлю биригиуле, болсада ала бла ишни тирилтирге керекди», -дегенди КъМР-ни Башчысы.

 Жууукъ заманда Къабарты-Малкъарда жаш тёлю политика жаны бла башха толтуруучу власть орган къураргъа мурат болгъанына Жаш тёлюню ишлери жаны бла федерал агентствону таматасы  ыразылыгъын билдиргенди. Ол жумушну тамамлауда   байламлыкъланы жюрютюрге келишгендиле. Жангы ведомство къуралса, республикада бардырылгъан жаш тёлю политика жаны бла тюрлю-тюрлю жумушлагъа, федерал ара да кёз-къулакъ бола турлукъду, деп белгилегендиле тюбешиуню кезиуюнде.

Казбек Коков Ксения Разуваевагъа билдиргеннге кёре, 2022 жылда КъМР-ни Башчысында жаш тёлю политика жаны бла совет къураллыгъын эм Къабарты-Малкъарны жаш алимлерине премияла бериллигин айтханды. Тюбешиуде дагъыда волонтёрлукъ къымылдауну андан ары айнытыу, жаш тёлю проектлеге грантла берип болушлукъ этиу, жаш тёлюню профессионал жаны бла билимлерин ёсдюрюрге итиндириу эм иш кёллюлюклерин кётюрюу соруула сюзюлгендиле.

Белгиленнген планнга кёре- жаш тёлю инфрастуруктураны къураргъа эм тёрлю-тюрлю бёлюмледе арала къураллыкъдыла. Аллай майданладан бири, Жаш тёлю чыгъармачылыкъны мекямы боллукъду, аны къурулушун бошаргъа 2022-2024 жыллада федерал бюджетден 1 миллиард сомдам аслам бёлюнюрюкдю. Андан сора да федерал агентствону  жанындан республикагъа методология жаны бла болушлукъ этилликди.

Тюбешиуде республикада   Жаш тёлюню ишлери жаны бла федерал агентство бла бирге жаш тёлю бла байламлы федерал эм регион арада уллу мероприятияланы   бардырыуну юсюнден сёлешгендиле.  «Команда 5642» республикалы форумну  Жаш тёлюню ишлери жаны бла федерал агентствону майданларында бардырылыучу конкурсха къошаргъа  мурат барды. Андан сора да «Жолоучулукъдан да кёп» федерал проектге, жаш тёлюню айнытыу инфраструктура программалагъа эм Шимал -Кавказ жаш тёлю фестивальгъа къатышыу соруулагъа къаралгъандыла.

Тюбешиуню итогларыны юсюнден  айта, Казбек Коков «Билим» проектге къатышыргъа ыразылыгъын социал сетьде кесини энчи бетинде жазгъанды эм аны бла байламлы республикагъа къыралны регионларындан келлик жаш тёлюге Къабарты-Малкъарны ариу жерлерин кёргюзтюрге хазырлыгъын да билдиргенди.

Бизни корр.