КъМР-ни Башчысы Казбек Коков РФ-ни Правительствосуну Председателини биринчи орунбасары Андрей Белоусов видеоконференция халда бардыргъан кенгешге къатышханды. Анда сёз гитче эмда орта предпринимательликге себеплик этиуню юсюнден баргъанды. Ол санда «Гитче эмда орта предпринимательлик бла кеслерине энчи иели иш ачаргъа сюйгенлеге болушуу» деген миллет проект къалай толтурулгъанына къаралгъанды. 
Алгъаракълада РФ-ни Экономиканы айнытыу министерствосуну гитче эмда орта предпринимательликни айнытыу жаны бла регионла этген мадарлагъа багъа берир ючюн рейтинг къураргъа керекди деп, сёзню алай салгъанды. Кенгешде ол оюм къабыл кёрюлгенди эмда   регионла бла ишни къатыландырыргъа кереклиси белгиленнгенди. Министерствону билдириуюне кёре, башында сагъынылгъан миллет проектни толтуруугъа бёлюннген ахча 2022 жылда 65 миллиард сомну тутарыкъды. Алай бла ол былтырны ёлчеминде къалады. 
Къабарты-Малкъар 2021 жылда миллет проектге кёре белгиленнген кёрюмдюлеге жетгенди. «Къыралны жанындан этилген  болушлукъ бизнесни айныууна иги да себеп болгъанды. Гитче эмда орта предпринимательликни субъектлерини бир тизмесине кёре,  республикада энчи иели иш бла кюрешгенлени саны 19144-ге жетгенди. Ол а былтырдан 7,2 процентге асламды. Бу бёлюмде  уруннганланы саны да 19 процентге кёбейгенди»,-деп жазгъанды КъМР-ни Башчысы социал сетьде, кенгешни эсеплерин чыгъара. 
Республиканы оноучусу предпринимательлени санына къошула баргъаныны, налогланы бла къыралны араларында халланы ачыкълыкъларыны хайырындан  регион бюджетни кеси файдалары ёсгенлерин чертгенди. «Жаланда быйыл январь айда ала былтыр бу кезиуден эсе 30 процентге кёбейгендиле эмда 860 миллион сомдан артыкъ болгъандыла. Ол ахча уа социал магъаналы борчланы тамамлаугъа къоратылады. Предпринимательликни бёлюмю регионну экономикасыны мурдорун къурагъанладан бириди. Анга республикада себеплик этиуню андан ары бардырлыкъбыз», - деп чертгенди Казбек Коков. 

КъМР-ни Башчысыны бла Правительствосуну 
пресс-службасы.