Россей Федерацияны Билим бериу эмда илму министерствосу «Мен эмда Россей» деген ат бла былтыр конкурс къурагъанды. Анга къатышханла суратларында келир эмда шёндюгю заманнга кёз къарамларын ачыкъларгъа керек эдиле.
Тёреде болуучусуча, бек алгъа регион конкурс бардырылады. Анга къатышханла уа быйыл Къабарты-Малкъарны юбилейи болгъаны себепли республикагъа, аны келир заманына жораланнган суратланы КъМР-ни Жарыкъландырыу, илму эмда жаш тёлюню ишлери жаны бла министерствосуна, анга бойсуннган «Кюн шахар» арагъа жибергендиле.
Алай бла орта, энчи эмда бийик окъуу юйледен 150-дан артыкъ жаш бла къыз кеслерини хунерликлерин, ариу табийгъатыбызны, жашагъан эллерини, шахарларыны тамблагъы кёрюмдюлерин кеслери ангылагъанча, эслегенча ачыкъларгъа кюрешгендиле. Алада сейирлик архитектуралары бла кёп къатлы юйлени, учуучу автобусланы, машиналаны, космосха, айгъа жолоучулукъларын, миллетлени шуёхлукъларыны белгилерин, дагъыда эс бурурча кёп башха затланы кёрюрге боллукъду.
Конкурсха жиберилген ишлеге къарагъан къауумгъа уа профессионал художникле, журналистле, сурат алыучула, КъМР-ни Жарыкъландырыу,илму эмда жаш тёлюню ишлери жаны бла министерствосуну келечилери, «Кюн шахар» сабий чыгъармачылыкъ академияда ишлегенле да киргендиле.
Сайларгъа къыйын болгъан эсе да, жюри бек игилерин айыргъанды. Аланы араларында уа 3-6-чы, 7-11-чи классланы окъуучуларыны эмда вузланы студентлерини ишлери да бардыла.
-Жаш художниклени хазна къалмай барысы да суратларында кеслерини кёз къарамларын ачыкълаялгъандыла. Аны къой, тамблагъы кюннге атлагъандыла. Ол атламлары уа асыры азат окъуна кёрюннгенди. Бек сейири уа, келир жашауларын космос бла байламлы этгенлериди. Аны игиге санайма, нек дегенде муратла толадыла. Бюгюннгю сабийле тамбылагъы жашауну чархын бурлукъдула. Аны себепли аланы муратлары да толур деп ышанырчады,- дейди «Кюн шахар» академияда бёлюмню таматасы, жюрини къауумуна кирген Биттирланы Жаннет.
Хорлагъанланы барына да КъМР-ни жарыкъландырыу, илму эмда жаш тёлюню ишлери жаны бла министерствосуну сыйлы грамоталары, саугъала да берилгендиле. Ала ишлеген суратла битеуроссей конкурсха жиберилликдиле. Жерлешлерибиз анда да айырмалы болурла деп ышанабыз.
Холаланы Марзият.
Суратланы автор
алгъанды.
