КъМР-ни Парламентини президиумуну кезиулю жыйылыуу видеоконференция амал бла къуралгъанды. Аны спикер Татьяна Егорова бардыргъанды.
«Правительстволу сагъатны» чеклеринде республиканы санатор-курорт комплексин айнытыуну соруулары сюзюлгендиле. Курорт эм туризм министр Мурат Шогенцуков докладыны аллында бу жыйылыуну санаторийледен биринде бардырыргъа белгиленнгенин, алай эпидемиология болум бла байламлы аллай онг болмагъанын айтханды.
Министрни билдиргенине кёре, санатор-курорт комплексге республиканы социал-экономикасын айнытыуну муратларыны чеклеринде энчи эс бурулады. 2040 жылгъа дери КъМР-ни айнытыуну эмда 2035 жылгъа дери КъМР-де туризмни айнытыуну стратегияларында рекреация комплексни игилендириу жумушланы арасында баш магъана «Нальчик» курортха, аны санаторийлерине бериледи.
Бюгюнлюкде уа республикада 20 санатор-курорт учреждение барды, аланы барысында да бирге 4797 адамгъа жер къуралгъанды. Водолечебница да ишлейди, анда да санаторий жумушла толтуруладыла, алай ичинде адамла турмайдыла.
Былтыр санаторийледе 30 минг адам солугъанды, ол а 2020 жылда тарихледен 20 процентге асламды. Министр тарихлени тенглешдиргенде, санаторийле эпидемиология болум бла байламлы ишлемей тургъанларын эсге алыргъа чакъыргъанды.
Мурат Шогенцуков комплексде кемчиликлени, жарсыуланы юслеринден да айтханды. Биринчиден, санаторийлени мюлклери эски болгъанларын, гара суу бла жалчытыу ызла тапсыз халгъа жетгенлерин белгилегенди. Аны бла бирге уа солугъанланы асламы льготалары болгъан инсанладыла. Аны ючюн а учрежденияланы файдалары ёсмейди, организацияланы кеслерини уа налог неда кредит льготалары жокъду.
- КъМР-ни Правительствосу «Курорт «Нальчик» акционер общество бла хайырланылмагъан объектлени ишлерин жангыртыу, инвесторланы табыу жаны бла ишни дайым да бардырадыла. Бюгюнлюкде уа «Нартан» санаторийде шёндюгю излемлеге келишген санаторий-къонакъ юй къурала турады. Анда 130 отоу боллукъду,-деп билдиргенди министр.
Келир заманда тамамланыргъа белгиленнген жумушланы юслеринден да баргъанды сёз. Ала уа республикада туризмни айнытыугъа, Къабарты-Малкъарны атын белгили этиуге бурулупдула. Ол санда иелигинде республиканы юлюшю болгъан организацияланы ишлерини хайырлылыкъларын ёсдюрюрге, санатор-курорт комплексни айнытыугъа жаны бла инвестиция проектлени къырал программалагъа къошаргъа, республиканы рекреация онгларын Россейни ичинде, андан тышында да кенг белгили этерге тийишлиди.
Жыйылыуда «Курорт «Нальчик» акционер обществону башчысы Хасанби Афов да сёлешгенди. Ол эпидемиология болум бла байламлы бюгюнлюкде санаторийле ишлемегенлерин билдиргенди. Ол а отрасльни болумун осалгъа бургъанды. Аны бла байламлы, РФ-ни Президентини буйругъу бла федерал эм республикалы правительствола отрасльни субъектлерине финанс болушлукъ этгендиле: субсидияла, льгота кредитле берип.
Сёз комплексни ырысхысын сакълау мадарланы, объектлени файдалы хайырланыуну, жангы сезоннга хазырланыуну юслеринден да баргъанды.
Докладланы сюзе, Татьяна Егорова республикалы подпрограмма «Шимал-Кавказ федерал округну айнытыу» федерал программагъа нек кирмегенини сылтауларын билирге сюйгенди. Мурат Шогенцуковну айтханына кёре, этилген эсгертиулени кетериу жаны бла мадарла толтурулуп, санатор-курорт комплексни айнытыугъа бурулгъан жумушланы федерал программагъа къошуу жаны бла уллу иш бардырылады.
Татьяна Борисовнаны санаторийле тамамлагъан жумушланы багъаларыны юсюнден соруууна жууаплай, министр ол процедураланы тюрлюлерине кёре къуралгъанын билдиргенди. Солургъа келгенлени бек алгъа врач саулукъларын тинтип, хар кимге да жараулу процедурала алай тохташдырыладыла.
Парламентни башчысыны орунбасары Мурат Карданов къоншу регионланы сынаулары бла хайырланыргъа боллугъуна эс бургъанды. Ол санда къонакъ юйле, турагентствола бла байламлыкъла къурап, алада солугъанланы санаторийле тамамлагъан жумушлагъа чакъырыргъа боллукъду. Физкультура, спорт эм туризм жаны бла комитетни башчысы Арсен Барагунов да санаторийледе солугъанланы санын кёбейтиуге кесини кёз къарамын билдиргенди.
Депутатла дагъыда курортланы онгларыны, инфраструктураны игилендириуню, Тамбукан кёлде солуу жерни къурауну, башха инвестиция проектлени юслеринден айтхандыла.
Ахырында Татьяна Егорова санатор-курорт комплексни айнытыуда тийишли жумушла толтурулгъанларын чертгенди. Алай артыкъда магъаналы соруула да бардыла, ол санда Нальчикни курортларыны атын алгъын даражагъа чыгъарыу, санаторийледе солургъа сюйгенлени санын ёсдюрюу эм башхала.
«Правительстволу сагъат» жууаплы органлагъа тийишли эсгертиулени къабыл кёрюу бла бошалгъанды.
* * *
Президиум Парламентни кезиулю пленар жыйылыуун быйыл 2 мартда бардырыргъа келишгенди.
Депутатла «КъМР-ни Административ кодексини 9.2-чи статьясына тюзетиуле кийириуню юсюнден» республикалы законну проектине къарагъандыла, Налог, Жер, Урунуу кодекслеге тюрлениуле кийириу жаны бла федерал законопроектле да сюзюлгендиле.
КъМР-ни Парламентини пресс-службасы.
