Битеуроссей Халкъ фронтну (ОНФ) Къабарты-Малкъарда бёлюмюню келечилери коронавирус ауруугъа жукъгъан саусузлагъа амбулаториялада медицина болушлукъ къалай берилгенин тинтгенлерини эсеплерин чыгъарып башлагъандыла. ОНФ-де айтханларыча, ала сорууну 21 январьда бардырып тебирегендиле. Жууапла бергенле битеу тюрлю жарсыуларын туура этгендиле. Халкъ фронтну келечилери республикада вакцинация терк бардырылмагъанын, алай урунуу коллективледе уа бу иш алгъын окъуна этилгенин кёргендиле. Адамла дагъыда поликлиникалада терапевтле   эмда педиатрла  жетишмегенлерин  билдиргендиле. Ол а, бир жаны бла, медицина ишчиле кеслери да ауругъанларын кёргюзтеди.

«Къабарты-Малкъарда жукъгъан аурууладан бакъгъан больница (500 жерли) ишлерге кереклисин кёпле чертгендиле. Алай этилсе, бир-бир учреждениялада госпитальла къурамай къутулургъа боллукъ эди. 
 Дагъыда сорууланы эсеплерине кёре, адамла прививканы эм биринчиден кеслерин эмда юйдегилерин сакъларча этгенлерин кёргенбиз – ол да къууандырады», - дегенди Битеуроссей Халкъ фронтну республикада бёлюмюню штабыны келечиси Евгений Бакаев.
Саулукъ сакълау министерствону специалистлери эмда врачла айтханларына кёре, больницагъа салырны аллында саусузланы барына да коронавирус ауруугъа экспресс-тест этиледи, кесин да хакъсыз. Аны бла багъыу учреждениялагъа тышындан инфекция келирине чек салынады. Дагъыда медицина ишчилеге къошакъ халда хакъ тёленип турады, республиканы бюджетинден ахча бёлюнюп дарманла эмда экспресс-тестле сатып алыннгандыла.
Ауруу жукъгъанына ишекли болуп, кёбюсюнде къайсы телефон номерле бла сёлешгенсиз деген соруугъа онюч проценти - «122», 23 проценти – «103», 12 проценти – Бирикген ызгъа (8-800-2000-112), жыйырма проценти – регионну аллай ызына, ючден бири уа медицина организацияланы кеслерине, дегендиле.
Битеуроссей мониторинг бардырылып бошалгъандан сора ОНФ-ни экспертлери аны эсеплерин тинтип, ачыкъланнган кемчиликлени эмда не зат этилирге кереклисини юсюнден тийишли ведомстволагъа билдирликдиле.

Улбашланы Мурат.