Коронавирус аурууну жангы тюрлюсю «Омикронну» хатасындан поликлиникаланы ишлерине иги кесек къошулгъанды, аны бла байламлы Къабарты-Малкъар Республикагъа болушлукъгъа деп 31 миллион сом берилликди.

Аллай оноу коронавирусну жангы штаммын тыяргъа эм поликлиникалада болгъан онгланы толусунлай хайырланып, инфекциягъа къажау мадарланы тийишлисича бардырыр ючюн этилгенди.

Саулай да Россейни Правительствосу битеулю медицина страхования амал бла ишлеген поликлиникалагъа себепликге деп регионлагъа 7,3 миллиард сом бёлгенди. Аны юсюнден толу билдириу РФ-ни Правительствосуну официальный сайтында барды. Тийишли буйрукъгъа Россейни премьер министри Михаил Мишустин къол салгъанды, деп билдиредиле республиканы оноучусуну пресс-службасындан.

«Жарсыугъа, ауругъанланы саны ёсе барадыла. «Омикрон» штаммны энчилигинден адамланы асламысы болушлукъ излеп поликлиникагъа барадыла, ол себепден амбулатория бёлюмге уллу ауурлукъ жетеди. Аллай болумлада аланы тохтаусуз ишлеулерин жалчытыу уллу магъананы тутады», -дегенди Михаил Мишустин.

 РФ-ни Правительствосуну Председатели Саулукъ сакълау министерствогъа федерал ырысхыланы жер-жерли медицина страхования жаны бла фондлагъа не къадар терк жиберирча буюруу бергенди.  «Ол ахчала  регионлагъа заманында тапдырылсала  медицинаны биринчи бёлюмю   тохтаусуз ишлеуюне уллу себеплик этерикдиле», -деп чертгенди ол.  

Бизни корр.