КъМР-ни Парламентини президиумуну кезиулю жыйылыуунда «правительстволу сагъатны» чеклеринде республикада коронавирус жукъгъан аурууну жайылыууна къажау мадарла сюзюлгендиле. 
Аны ача, спикер Татьяна Егорова республикада эпидемиология болумгъа депутатла энчи эс бургъанларын, ахыр эки жылда парламентарийле аны бир ненча кере тинтгенлерин чертгенди. Алай вирус жангыдан кенг жайылып башлагъаны бла байламлы аны кезиулю кере сюзерге тюшгенди. 
КъМР-ни медицинасы ауруу жукъгъанланы саны кёбейиригине, аны «омикрон» тюрлюсю жайылгъанына къалай хазырланнганыны юсюнден саулукъ сакълау министр Рустам Калибатов билдиргенди. 19 январьны шартларына тийишлиликде, ауруу жукъгъанла бла тюбеген 4940 инсан амбулаторий къараудадыла, аланы арасында 182 сабий барды.
 Бюгюнлюкде коронавирус жукъгъанланы 4 госпитальда багъадыла, аланы барысында да бирге 710 саусузгъа жер барды, ол санда 610 жер кислород бла жалчытылыныпдыла. ИВЛ-аппаратла излемлеге тийишли тенгли бардыла. 
Ахыр юч ыйыкъда уа республикада COVID-19 жукъгъанланы саны азайгъанды, аны бла байламлы саусузлагъа бёлюннген жерле да 26 процентге къысхартылгъандыла (250 жерге). Алай эпидемиология болум биягъы аманнга кетсе, ала жангыдан ишлеп башларыкъдыла, энтта госпитальла ачыу жаны бла мадарла да хазырдыла. 
Аурууну жангы тюрлюсюню жукъгъаныны энчиликлерин эсге алып, диагностика лабораторияла 3865 кезиуден 5805-ге дери кючленнгендиле. Аны хайырындан ПЦР-тестлени бир кюннге, республиканы хар 100 минг инсанына тергегенде, 500 адамгъа бардырыргъа онг боллукъду. Бюгюнлюкде уа бу ёлчем 295,3-ге жетеди (хар 100 минг адамгъа тергегенде). 
Республикалы эм федерал бюджетледен ахча бёлюнюп, диагностиканы (иммунохроматография амал бла) терк бардыргъан тестле сатып алыннгандыла эмда медицина учреждениялагъа юлешиннгендиле. Министр айтханыча, аны хайырындан бир кюннге тестни бергенлени санын 900-ге дери жетдирирге онг боллукъду – хар 100 минг адамгъа тергегенде. 
 Ауругъанланы саны ёсеригине къоркъуу уллу болгъаны бла байламлы саусузлагъа болушлукъгъа юч амбулатория ачылгъанды. Шёндю республикада аллай жети ара бардыла.  Алада специалистлени жетгенлерин бла къалгъанларын тинтип, керек болса, бу ишге медицина факультетлени студентлерин да къошаргъа белгиленеди. Аны бла бирге дарманла, башха медицина керекле келтириледиле. 
Медицина организацияланы кислород бла жалчытыу къалай къуралгъаны контрольдады. 2021 жылда аны асырарча мадарла этилгендиле, аны хайырындан а кислородну 90 тоннасы къысдырыкъда  турады. Докладчы былтыр ауругъанланы саны ёсген кезиуде уа бир кюннге 22 тонна кислород къоратылгъанын  эсгертгенди. 
Сёз медиклеге тёлеулени, кеслерине амбулаториялада къаратхан инсанланы дарманла бла жалчытыуну юслеринден да баргъанды. 
Рустам Калибатов аруугъа къажау хайырлы мадарладан бири вакцинация болгъанын энтта бир кере эсгертгенди. Республикада дарманны салырча 85 жер къуралгъанды, ала хар кюн да эрттенликде 8 сагъатдан 20 сагъатха дери ишлейдиле. 
Дарманны урунуу коллективлеге, инсанланы юйлерине барып салдырырча уа 58 бригада къуралгъанды. 
 Быйылны 17 январыны шартларына кёре, республикагъа вакцинаны 432 355 дозасы келтирилгенди. Вакцинацияны план кёрюмдюлери 47,9 процентге толтурулгъандыла, бу жаны бла мадарла андан ары этиледиле. 
Жыйылыуда Потребительлени эркинликлерин сакълау эм халкъны ырахматлы жашауун жалчытыу жаны бла федерал службаны КъМР-де Управлениясыны башчысы Жирослан Пагов да сёлешгенди. Ол   республикада коронавирусну «омикрон» тюрлюсю жайылгъаны ачыкъланнганын билдиргенди.
- 20 тинтиуден сора 9 инсаннга жангы штамм жукъгъаны белгили болгъанды. Хар кюнден да аланы саны ёсюп барады. Сёзге, 20 январьда жангы штамм 11 адамда табылгъанды. Жарсыугъа, аладан бири да вакцина салдырмагъанды. «Омикрон» жукъгъанланы арасында госпитальгъа жатдырылгъанла кёп болмазла деп ышанабыз. Алай «дельта» бла ауругъанланы саны энтта кёпдю, аны ючюн хазыр болургъа керекди. Аны бла бирге ОРЗ эм кесекле тийгенлени саны да ёседи, аны ючюн коронавирусну бла аланы араларын айырыргъа керекди,- дегенди ол.
Депутатланы докладчылагъа соруулары кёп болгъанды. Татьяна Егорова коронавирус жукъгъан адам бла тюбегеннге ПЦР-тестни ненча кюнден берирге кереклисин билирге сюйгенди. 
СПИД-ге эм жукъгъан ауруулагъа къажау араны баш врачы Марина Иванова инсаннга ОРВ неда  COVID-19 жукъгъанларын айырыргъа къыйын болса, багъыуну экисине да жарагъан дарманладан башлагъанларын билдиргенди. 4-5 кюнден а саусузну КТ-тинтиулеге ашырадыла. Андан сора диагнозну тюз тохташдырыргъа, багъыуну башларгъа онг болады. 
Тестни къачан берирге кереклисини юсюнден соруугъа жууаплай, Иванова аурууну шартлары болмасала да, тест коронавирус жукъгъанын бла къалгъанын тюз кёргюзтюрюгюн чертгенди. Инкубация кезиу а бирча тюйюлдю – «дельта» 5-7 кюнден, «омикрон» а 2-3 кюнден ачыкъ боладыла. 
Парламентни Билим бериу, илму эм жаш тёлюню ишлери жаны бла комитетини башчысы Нина Емузова  ауруу  сабийлеге жукъса, аны билим бериу организациялагъа белгили этиуню юсюнден айтханды. Жирослан Паговну билдиргенине кёре, жорукълагъа тийишлиликде, тестни бардырып, аны лабораториягъа жетдирирге 24 сагъат эмда медицина тинтиулени бардырыргъа да аллай бир заман къоратылады.  Битеу шартла Госуслуги порталда басмаланадыла. Классда сабий ауруса уа, школчула дистанциялы халда окъуугъа кёчюрюледиле. 
Жыйылыуда россейли вакциналаны коронавирусну жангы тюрлюлерине жукъдурмауда хайырлылыкъларыны, врачланы билимлерини, багъыуну амалларыны юслеринден да айтылгъанды. Дагъыда халкъда къоркъуусузлукъну жорукъларын сакълауну магъаналылыгъын, аруу жукъгъаны ачыкъланса, не этерге кереклисин  ангылатыуну тирилтирге кереклисине да эс бурулгъанды. 
Парламентарийле жууаплы органлагъа эсгертиулени къабыл кёргендиле.  
* * *
Президиумну жыйылыуунда уа башха соруулагъа да къаралгъанды. «КъМР-ни административ бузукълукъланы кодексине тюзетиуле кийириуню юсюнден», «Инсанла гаражны эм ол орнатылгъан жерни сатып алгъанда бир-бир сорууланы бир низамгъа келтириуню юсюнден» республикалы законланы проектлери сюзюлгендиле.  Ала сейирлери болгъан органланы къарауларына берилгендиле. Тынгылы сюзюлгенден сора законопроектле Парламентни пленар жыйылыууну къараууна берилликдиле. 
Депутатла экономикада, социал сферада жетишимле болдургъан инсанланы КъМР-ни Парламентини Сыйлы грамотасы бла саугъалауну юсюнден оноуну къабыл кёргендиле.

КъМР-ни Парламентини пресс-службасы.