Бу декабрь ай байрамладан бай болгъанды дерчады. Элбрус районнга, ол санда эм ариугъа эмда сюйдюмлюге тауланы халкъла аралы Кюнюн санаргъа тийишлиди. «Приэльбрусье» Миллет паркны экология жарыкъландырыу бёлюмю аны бла байламлы тематика конкурс бардыргъанды.

Алай бла, Лашкута элни Маданият юйюню атындан аны «Тауланы юсюнден назмула» деген номинациясына Къартлыкъланы Лейла бла Мамуколаны Асият къатышхандыла. Бешинчи классны окъуучулары – ала Николай Гумилёвну бла Къулийланы Къайсынны назмуларын окъугъандыла. Жаш къызчыкъла башха-башха ёмюрлени эмда жерлени поэзиясын жууукълашдыргъандыла.

Бу номинациягъа дагъыда Тырныауузну орта школуну окъуучулары Аккыланы Керим, Оришева Ясмина, Саида Черникова, Хеда Бакаева эм Ирина Пятахина къатышхандыла. Огъары Бахсанда школну келечилери Гулийланы Малика, Ёзденланы Самира, Непеланы Мадина, Шинахова Алина, Ахматланы Амина, Джаппуланы Рахима, Жантууланы Раиса, Акъболатланы Расул, Кайчуланы Хадиджа бла Айша, Джаппуланы Малика, Жабелланы Айла, Кульчаланы Ислам, Мусукланы Мансур эмда Гежаланы Малика да назмуланы ариу, шатык окъугъандыла. Терс-Къолну орта билим берген учреждениясыны окъуучулары уа «Ишленнген сурат» номинацияда кеслери жарашдыргъан суратларын кёргюзтгендиле.

Миллет паркны келечилери конкурсха къатышханланы барына да ыразылыкъларын билдиргендиле эмда саугъала бергендиле.

Ахматланы Руслан, "Приэльбрусье" миллет парк.