«Полициячы Къар Аппа» Битеуроссей акцияны чеклеринде КъМР-ни Май районуну сабий садларында жолда жюрюуню къоркъуусузлугъуну тематикасында жангы жылгъы утренникле къураладыла. Полициячыланы, юйретиучюлени эм ата-аналаны оюмларына кёре, энчи кииймле кийген жомакълы жигитлени эм аланы сахнада кёргюзтген жашауларыны сабийлеге жолда кеслерин къалай жюрютюрге тийишлисин игирек ангылатырча онглары барды.

Майский шахарны «Ышарыу» сабий садында да сагъынылгъан акцияны чеклеринде жолда жюрюуню жорукъларына жораланнган жангы жылгъы утренник бардырылгъанды. Юйретиучюле сабийлеге деп костюмлу сахна оюн къурагъандыла, аны болушлугъу бла гитчелени жолда жюрюгенде къоркъуусузлукъ жорукълагъа энтта бир кере тюшюндюргендиле.

Сценарийни координаторлары эм къонакълары ГИБДД-ны келечилери болгъандыла. Жашчыкъла бла къызчыкъла, чыгъармачылыкъ ызгъа тири къошулуп, тюрлю-тюрлю эришиуледе билимлерин, хунерлерин кёргюзтгендиле. Тюбешиуню ахырында автоинспекторла юйретиучюлеге, сабийлеге да ариу эм жарыкъландырыу халлы оюнлары ючюн ыразылыкъларын билдиргендиле, къыйын болумсуз Жангы жыл тежегендиле эм келгенлени барына да энчи жарытыучу брелокла юлешгендиле.