КIуэкIуэ Казбек Урысей Федерацэм и цIыхухэм я паспортхэр яритащ Бахъсэн къалэм щыпсэу ныбжьыщIэхэм. Къэбэрдей-Балъкъэрым и Iэтащхьэр абыхэм Урысей Федерацэм и Конституцэм и махуэмкIэ ехъуэхъуащ икIи ехъулIэныгъэхэмрэ лъагапIэщIэхэмрэ яIэну зэригуапэр къыхигъэщащ. 

«Ди къэралышхуэм и цIыхуу ущытыныр - ар пщIэшхуэщ икIи жэуаплыныгъэшхуэщ. Урысей Федерацэм и Конституцэм Iэмал къыдет ипэкIэ дыбакъуэну, зыдужьыну, ­къэ­кIуэнум дыхуэплъэну. Аращ нобэ ди республикэм къэралыгъуэ щытыкIэ къезытыр, къэралым и адрей щIыналъэхэри щIэзыгъэбыдэр. Конституцэм къыщыхьащ ди ­хабзэр тхъумэн, ди бзэр дджын хуейуэ. А документыращ Урысей Федерацэм и щIы­налъэм зы унагъуэшхуэу дыщызыгъэпсэур», - жиIащ КIуэкIуэ Казбек ныбжьыщIэхэм за­хуигъазэу. 
Iэтащхьэм къыхигъэщащ пандемием, ­къэхъукъащIэхэм я зэранкIэ дуней псор зыхэт экономикэ кризисым емылъытауэ Урысей Федерацэр къэрал лъэщу къы­зэрынэр, лъэпкъ проектхэр, къэрал, щIыналъэ программэхэр абы зэрыщагъэзащIэр. 
Махуэшхуэм трагъэхуащ Бахъсэн къалэ дэт Мамырыгъэм, щэнхабзэмрэ зыгъэпсэ­хугъуэмрэ и паркым «Олимп» физкультурэ-узыншагъэр щрагъэфIакIуэ комплексыр къызэIуахыныр. Ар яхухуащ «Спортыр - гъащIэм и мардэщ» къэрал проектым хыхьэ «Демографие» лъэпкъ унэтIыныгъэм ипкъ иткIэ.  
Спорт комплексыр хуэгъэпсащ бэнэкIэ ­хуитымкIэ зыгъэсэныгъэхэмрэ мыхьэнэ зэ­мылIэужьыгъуэ зиIэ зэхьэзэхуэхэр щегъэ­кIуэкIынымрэ. Махуэ къэс абы екIуэлIэнущ щIыналъэм щылажьэ спорт школхэм я гъэсэни 100-м щIигъу. ЕтIуанэ къатым теннис щыджэгу, тренажёр пэшхэр тетщ. 
КомплексыщIэм тренерхэм япэ зыгъэ­сэныгъэр щыдрагъэкIуэкIащ Бахъсэн къалэм бэнэкIэ хуитымкIэ олимп резервым и школым къекIуалIэ ныбжьыщIэхэм. 
2022 гъэми щIыналъэм щыпащэнущ лъэпкъ проектхэр щыгъэзэщIэным. КIуэкIуэ Казбек  и  къэпсэлъэныгъэм  щыжиIащ ­илъэс дызыхуэкIуэм Бахъсэн курыт щIэныгъэ щрагъэгъуэт школыр щыухуэныр щIа­дзэну. ЕджапIэр 2023 гъэм къызэIуахыну я мурадщ. КъищынэмыщIауэ, мы гъэм къы­щIадза Бахъсэн къалэмрэ Бахъсэн райо­нымрэ я сымаджэщ нэхъыщхьэм и етIуанэ поликлиникэ къудамэр егъэфIэкIуэным ехьэлIа программэр и кIэм нагъэсыну трау­хуащ. 2022 гъэм къызыхуэт щымыIэу къы­зэрагъэпэщыжыну я мурадщ Бахъсэн къалэм дэт ещанэ, еплIанэ курыт еджапIэхэр. Мыхьэнэшхуэ зиIэхэм ящыщщ 2023 гъэм ирихьэлIэу зэфIагъэкIыну я мурад Бахъсэн къекIуалIэ псы зрикIуэ бжьамий гупыр яукъуэ­дииныр. 
Мэзкуу  Къан.