Къабарты-Малкъарны Башчысы школчуланы араларында «Уллу перемена» деген Битеуроссей конкурсда хорлагъанла эм финалгъа чыкъгъанла бла тюбешгенди. «Уллу перемена» россейли  окъуучулагъа деп къуралгъан  эм уллу конкурс болгъанды, анга Россей Федерацияны Президенти Владимир Путин да себеплик этгенди. Конкурс «Россей-онглары болгъан къыралды» деген президент платформаны проектиди.   

Казбек Коков конкурсда хорлагъанланы бла финалгъа чыкъгъанланы алгъышлагъанды эм аланы аталарына бла аналарына, педагоглагъа эм юйретиучюлеге ыразылыгъын билдиргенди, «ала бийик даражада окъуучуланы хазырлагъандыла эм мурдор салгъандыла, ол а шёндюгю хорламгъа себеплик этгенди». «Сизни хорламыгъыз-битеу Къабарты-Малкъарны школчуларыны хорламларыды. Ийнанама,  хар сизни тенгли окъуучу,  жетишимлеригизге къарай, къууанады эм сиз болдургъан кёрюмдюлеге жетерге итинеди», - дегенди Казбек Коков, Битеуроссей  конкурсда хорлагъанлагъа эм финалгъа чыкъгъанлагъа алгъыш сёзюн айта.

 «Уллу перемена сизге кесигизни онгларыгъызны, къаллай хунерли болгъаныгъызны, билимигизни эм команда да ишлей билгенигизни  кёргюзтюрге аламат онг бергенди. Сиз ол жумушну жетишимли тамамлагъансыз», -  деп къошханды КъМР-ни Башчысы Казбек Коков.

Къабарты-Малкъардан конкурсха онбеш мингден аслам школчу эм орта энчи билим  берген учрежденияны окъуучулары къатышхандыла. Аладан онбешиси республиканы Артекде бардырылгъан финалда кёргюзтгендиле. Ахырында финалгъа ётген Къабарты-Малкъардан бешеулен хорлагъандыла.

  Ала  Азаматланы Алан — Нальчикни 14-чю гимназиясыны 5 классыны окъуучусу , Бечелланы Айдана — Нальчикни 6-чы школуну 11 классыны окъуучусу,    Амир Гоноков — Нальчикни 5-чи школуну 11 классыны окъуучусу,   Жаболаны Ахмат —«Кюн шахар» Сабий чыгъармачылыкъ академияны 11 классыны окъуучусу эм Борис Бабочиев – Нальчикни Женгил промышленность колледжини 4 курсуну студенти. 

Финалгъа была чыкъгъандыла:    Сафия Кумышева – Нальчикни 9-чу школуну окъуучусу,    Даяна Шомахова – Заюковону 3-чю школуну окъуучусу,    Дана Шунгарова -  Нальчикни 14 гимназиясыны окъуучусу,  Тамирлан Абулькин – Тырныаузну 5-чи гимназиясыны окъуучусу  Аскер Иванов -  Бахсанны 6-чы школуну окъуусусу,  Ульяна Красильникова -   Нальчикни 2-чи лицейини окъуучусу, Саида Турбина —Нальчини 14-чю гимназиясыны  окъуусусу,   Милана Хубиева – Нальчикни 9-чу школуну окъуучусу,  Шауаланы Арина – Яникойну   Байсултанланы Алим атлы школуну окъуучусу,  Бэла Шантукова -  Черная Речка элни школуну окъуучусу.  

Битеу да къыралдан конкурсха бир миллиондан аслам школчу къатышханды.  Алты жюз сабий  хорлагъанлагъа саналгъанды, аладан 300 тамата класслада окъугъанла биршер миллион сом алгъандыла, дагъыда портфолиоларына  къошакъ балла  алгъандыла, ала  бийик билим берген учреждениялагъа окъургъа киргенде жарарыкъдыла.

 «Уллу переменада» хорлагъанла эм финалгъа чыкъгъанла бла Казбек Коковну тюбешиую бир-бирлери бла ушакъла бардыргъан халда ётгенди.

Тамата класслада окъугъанла шёндюгю тёлюню излемлерине келишген темаланы кётюргендиле, кеслерини проектлерини эм жетишимлерини юсюнден айтхандыла.  Къабарты-Малкъарны Башчысы бла бардыргъан  ушакъны кезиуюнде  окъуучула экономиканы, тёлюлени  бир-бирлери бла халларыны, жаш тёлюню ёсдюрюуню эм  мында жашагъанланы къылыкъларыны, экологияны эм саулукъ сакълауну, билим бериуню эм маданиятны юсюнден оюмларын билдиргендиле. Артыкъ да бек сейир ушакъ туризмни айнытыуну эм Нальчик курортну инфраструктурасы  юсюнден болгъанды-мында окъуучула тюрлю-тюрлю оюмланы эм паланланы айтхандыла.   

Школчула бла сёлешген кезиуде КъМР-ни Башчысы аланы кёп тюрлю сорууларына жууапла бергенди. Ол санда, Башчы жууукъ заманда «Театрланы мекямы» деген къурулушда ишле жангыдан башланырыкъларын эм ол Жаш тёлюню чыгъармачылыкъ мекямы боллугъун айтханды.

Жаш тёлюню чыгъармачылыкъ мекямы  майданларында  тюрлю-тюрлю чыгъармачылыкъ проектлени, ол санда сейирлик студияла  эм кёрмюч залла къураллыкъдыла.   Казбек Коков дагъыда Къабарты-Малкъарда «Уллу перемена» деген Битеуроссей конкурсну регион кезиуюн бардырыргъа мурдор къураллыгъын билдиргенди.

Бизни корр.