Нальчикде жаш депутатланы «Къабарты-Малкъар Республиканы айныуунда жаш тёлюню магъанасы» деген республикалы форумларыны эсеплери чыгъарылгъандыла. Аны КъМР-ни Парламенти Къабарты-Малкъарны 100-жыллыкъ юбилейине жоралап къурагъанды.
Форум республиканы законла чыгъарыучу органыны мекямында ётгенди, алай анга къатышханланы бир къаууму жыйылыугъа онлайн халда къошулгъанды.
Эсигизге салайыкъ: юч кюнню ичинде муниципал къуралыуланы келечиле органларыны жаш депутатлары – битеу да 200-ге жууукъ адам – экспертле бла бирге жаш тёлюню шёндю бек магъаналыгъа саналгъан проблемаларын сюзгендиле. Ол санда сёз иш бла жалчытыуну, предпринимательликни, социал жанына тартхан жаш тёлю биригиулени кёллендириуню, эллени айнытыугъа, ол санда спортха, туризмге, курортлагъа, башха бёлюмлеге да жаш тёлю не къыйын къошханыны юсюнден баргъанды.
Форумну эсеплерин чыгъарыугъа аталгъан жыйылыугъа уа КъМР-ни Парламентини Председатели Татьяна Егорова, Федерация Советде КъМР-ни Парламентини келечиси Улбашланы Мухарбий, РФ-ни Къырал Думасыны депутаты Геккиланы Заур, республиканы Правительствосуну Председателини орунбасары Марат Хубиев, Парламентни депутатлары, министерстволаны бла ведомстволаны келечилери, муниципал къуралыуланы келечиле органларыны депутатлары, билим бериу организацияланы таматалары, жаш тёлю жамауат биригиулени, Федерация Советде Жаш тёлю палатаны келечилери къатышхандыла.
Жыйылыугъа къатышханлагъа айланып, Татьяна Егрова былай айтханды:
-Бу форум Къабарты-Малкъарны жаш депутатларын бирикдиреди. Республикада кёп болмай бардырылгъан айырыуланы эсеплерине кёре уа, бизде жыл санлары 35-ге жетмеген жаш депутатла 200-ге жетедиле. Бюгюн биз ала юч кюнню ичинде бардыргъан ишни эсеплерин чыгъарабыз.
Ол быллай форум республикада биринчи кере бардырылгъанын эмда жер-жерли самоуправленияны советлерини келечилерини депутат ишлерини башланыуу болгъанын чертип айтханды. «Асламыгъыз шахарлада, элледе жашайсыз, аны себепли алада халланы иги билесиз. Депутатлача, сизге берилген эркинликле халкъгъа керекли тюрлю - тюрлю жумушланы тамамларгъа онг бередиле», - дегенди.
- Спикер оюм этгенден, жаш адамла районда бла элде ишлеге тири къатышырча этиуню магъанасы бек уллу болгъанын, аны бла республикадан кетгенлени санын азайтыргъа онг чыгъарыгъын чертгенди.
- Жаш тёлю политиканы, предпринимательликни айнытыуну амалларын игилендириу жаны бла башламчылыкъла сизден чыкъсала сюебиз. Ол а жаш адамланы онгларын, хунерликлерин ачаргъа, аланы иш бла жалчытыугъа себеплик этерикди,- дегенди Татьяна Егорова.
Аны оюмуна кёре, жаш тёлю бла байламлы ишлени тамамлаугъа тюрлю-тюрлю регионладан коллегалары бла байламлыкъла къурау, бир-бирге сынауларын юйретиу да себеплик этерикди.
- Законла чыгъарыу ишде да биз сизден бютюн уллу тирилик этеригигизни сакълайбыз. Нек дегенде, бир жанындан, сиз жашагъан жерлеригизде халны дурус билесиз, башха жанындан а, тийишли полномочияла берилгендиле. Законла чыгъарыучу орган сизни башламчылыкъларыгъызгъа, сейир амалларыгъызгъа ачыкъды. Сизни сынауугъуз, фахмугъуз, бек башы уа-гиртчилигигиз жангы магъаналы борчланы жетишимли толтуруугъа себеплик этериклерине ышанама, -дегенди ахырында Татьяны Егорова.
Форумгъа къатышханланы Геккиланы Заур, Улбашланы Мухарбий, Марат Хубиев да алгъышлагъандыла. Форумну ишини юсюнден анга къатышхан жаш депутатланы къаууму билдиргенди. Ала бир-бир башламчылыкъларын да туура этгендиле. Сёз ючюн, КъМР-ни Парламентинде Жаш депутатланы советин къурауну дурус кёргендиле.
Ахырында пленар жыйылыугъа къатышханла резолюцияны къабыл этгендиле. Ары уа КъМР-ни Парламентине бла Правительствосуна, республиканы Айырыу комиссиясына бла жер-жерли самоуправленияны органларына этилген предложенияла киргендиле.
Марьяна Белгорокова.
