Къабарты-Малкъар къырал университетде РАН-ны Ядерный тинтиуле институтуну Бахсанда нейтринный обсерваториясы (БНО) бла байламлыкъ жюрютюуге жоралап, ишчи къауумну кенгеши ётгенди.
Анга КъМКъУ-ну ректоруну къуллугъун болжаллы халда толтургъан Юрий Альтудов, Бахсанда нейтринный обсерваторияны таматасы Валерий Петков, КъМКъУ-ну проректоруну борчун толтургъан Вадим Лесев, илму-излем жаны бла проректору Светлана Хаширова, илму тинтиуле эм инновация ишле жаны бла управленияны башчысы Сергей Шагин, стратегия программала эм проектле жаны бла управленияны таматасы Рамазан Лигидов, физика эм математика институтну директору Борис Кунижев эм башхала къатышхандыла.
Валерий Петков Къабарты-Малкъар къырал университет бла Нейтрино обсерваторияны байламлыгъыны юсюнден айта, Россейни илму фондуну конкурс программаларыны чеклеринде, тюрлю-тюрлю темалагъа жоралап, грантла алыргъа заявкала бергенлерин да билдиргенди.
Университет бла обсерватория жарым проводник детекторланы хазырлауда бирге ишлейдиле. Аланы сынау халда кюнню адрон аксионларын излеуде хайырланыргъа боллукъду. Аны бла бирге, материалланы къурамларын билирча, бюгюнлюкде гитче фонлу позитрон-аннигилляцион спектроскопияланы да хайырланырча мадар этиледи.
Физика эм математика институтда профильли специалистлени хазырлайдыла, ол санда субатом эм сынау физика жаны бла лаборатория ишлейди. Анда жылытычу нейтронланы, жарым проводник детекторланы, электронланы къызындыру эм башха сынаула бардырыладыла.
Юрий Альтудов быйыл 26 майда Дубнода Ядерный тинтиулени бирикген институтуну Алимлерини юйюнде Нейтринода физиканы бла астрофизиканы айнытыу сюзюлгенин да сагъыннганды.
- Нейтринону тинтиу - астрофизика бла космологияда жангы шартланы ачыкъларгъа, ол санда экологияны, хауа болумну, табийгъатда тюрлениулени, эм башха магъаналы шартланы да иги билирге онг тапдырады. Университет БНО-ну келечилери бла бирге кереклисича бир специалистни хазырларгъа эм къыйматлы тинтиулеге да къатышыргъа хазырды,- дегенди Юрий Камбулатович.
Вадим Лесев а жууукъ заманда бу жаны бла аспирантура ачыллыгъын эм жаш аламле БНО-да урунурча онг тапдырыллыгъын да билдиргенди. Аны бла бирге проектлени бардырыуда химиклени болушлугъу да керек боллугъун къошханды.
Валерий Петков билимли специалистлеге Ядерный жаны бла тинтиуле бардыргъан институтдан тышында башха организациялада да сурам болгъанын айтханды.
Ахырында Къабарты-Малкъар къырал университетде жангы оборудование бла жалчтылыннган лаборатория - Нейтринону регистрациясын бардыргъан детектор технологиялары бла ара ишлериги билдирилгенди. Анга Бахсанда обсерваторияны илму келечиси, физика-математика илмуланы кандидаты Адам Пшуков башчылыкъ этерикди.
Магометланы
Сулейман.
