КъМР-ни Парламентини Промышленность, транспорт, связь эм жол мюлк жаны бла комитетини  жыйылыуу ётгенди. Анда сёз Нальчикде улоуланы ишлери бла байламлы жарсыуланы эмда аланы айнытыуну юсюнден баргъанды. 
Жыйылыуну Парламентни таматасыны орунбасары Жанатайланы Салим бардыргъанды. Аны ишине министерстволаны, ведомстволаны, Нальчикни администрациясыны  эмда Жаш тёлю палатаны келечилери къатышхандыла.
  Кенгешни профильли комитетни таматасы Байдаланы Салих доклады бла ачханды. Ол саулай да республиканы транспорт системасын шёндюгюлю излемлеге келишген халгъа келтирирге кереклисин чертип, ол адамланы къоркъуусузлукъларын да жалчытыргъа керек болгъанын белгилегенди. 
Ызы бла Нальчикни мэрини орунбасары Анатолий Тонконог сёлешгенди. Ол айтханнга кёре, бюгюнлюкде 32 маршрут ыз барды. Аладан 29-су ишлейдиле. Транспорт ызланы излемлерин 12 предприятие жалчытадыла. Озгъан жыл ала 18,3 миллион адамны ташыгъандыла. Ол билдиргеннге кёре, шахар улоуланы ишлерин игилендириу жаны бла реформа керекди. Администрация шёндю ол ишни башлагъанды. Аны жашауда бардырыу бир ненча жылгъа бёлюнюпдю. Линияла бла бирге гитче автобусла бла бирге уллу автобусланы да чыгъарыр мурат барды. Бюгюнлюкде пассажирле жолларына карта бла тёлерча онгла да къуралгъандыла. Дагъыда «Тройка» транспорт картаны чыгъарыу да къысха кезиуде тамамланырыкъды. 
«Северный» автовокзалны хайырланыугъа бергенли бир къауум шахар транспортну маршрутларына  да тюрлениуле кийирилгенини юсюнден да айтылгъанды. Алай бла, къысха заманны ичинде жангы вокзалны бла «Солнечный город» сабий чыгъармачылыкъ академияны эм «Южный» вокзалны байлагъан маршрут жиберилликди. Докладчы белгилегеннге кёре, «Южный» вокзал ачылгъандан сора аны да шахар бла байлауну юсюнден да оюм этиле турады. 
- Жангы вокзалла бла байламлы болум аланы тынгылы хайырланып башлагъандан сора халгъа кёре тинтилликдиле. Чыгъа баргъан кемчиликлени да жаланда алай бла кетерир онг боллукъду, - дегенди Анатолий Тонконог. 
Жыйылыугъа МВД-ны  КъМР-де УГИБДД-сыны таматасыны къуллугъун толтургъан Дмитрий Сухорученко да къатышханды. Кесини докладында ол жоллада къоркъуусузлукъну юсюнден айтханды. Озгъан 9 айны ичинде, былтыр бла тенглешдирип айтханда, маршрут таксилени къатышыулары бла аварияланы саны иги да аз болгъанды. Энчи эс ол адамланы белгиленмеген жерледе тюшюрюу бла олтуртуугъа да бургъанды. Нек дегенде ала авариялы болумла къурайдыла. 
КъМР-ни Транспорт эм жол мюлк министерствосуну бёлюмюню таматасы Нурмухамед Балагов а халкъны ташыу контрольсуз тарифле бла бардырылгъанын чертгенди. 
Кенгешде дагъыда транспортланы иелерини жууаплылыкъларыны юсюнден, жолда бир бирге хурмет этиуню жорукъларыны эм жолда жюрюуню жорукъларына бузукълукъ этип тургъанланы быллай халлы ишден кери этиу дегенча соруулагъа да къаралгъанды. 
Битеу айтылгъан затланы эсге ала, профильли комитет эсепле чыгъарыу документни къабыл кёргенди.

Марьяна Белгорокова.