Быйылгъы жылны тогъуз айына Россельхозбанк агропромышленный комплексде ишлегенлеге 1,2 триллион сом ёнкюч ахча бергенди, ол кёрюмдю  жылны алындан бери эм кёп болгъанды. Сагъынылгъан суммадан 425,7 миллиард сом, не да 35,3 процентин, эллиле льгота халда алгъандыла. Белгилерчады, льгота халда ёнкюч бериу 31,8 процентге ёсгенин.

 Банкны Къабарты-Малкъар Республикада филиалы орта бизнес бла кюрешгенлеге 407 миллион сом, гитче бизнесге-235 миллион сом эм микробизнесге 158 миллион сом бергенди. Ёнкючлени бериу  озгъан жылны бу кезиую бла тенглешдиргенде 1,94 кереге кёпдю. 

 Быйылгъы жылны 9 айына Россельхозбанк уллу бизнесге 885,7 миллиард сом, орта, гитче эм макробизнесге -192,3 миллиард сом бергенди, ол кёрюмдю саулай озгъан жыл бла тенг болады.

Асламысында ёнкюч ахчаланы, башхача айтханда, 127 миллиард сомгъа жууукъну элледе жашагъанла алгъандыла. Ол жаны бла кёрюмдю 6,7 процентге ёсгенди.

«Эл мюлкде уруннганланы баш банкларыча, биз алагъа ёнкючлерин тыймагъанлай берип турургъа айтабыз, адамланы эм бизнес бла кюрешгенлени тамблагъы кюннге ышаныулукълары болурча, ала жерде эркин, ёхтемленип жашарча, сабийле ёсдюрюп, кеслери сюйген ишлерин башлап эм айнытырча. Белгилеп айтырчады, Россельхозбанкны хар ючюнчю сому льгота халда берилгенин, ол амал бизни финанс продуктларыбызны халкъ асламлагъа бютюн да ачыкъ этеди. Уллу эс- эл мюлкде сезон  ишлени бардырыргъа бёлюнеди. Ол жаны бла биз рынокну 72 процентин тутабыз. Бир-бир регионлада уа  Россельхозбанк сезон ишлеге ёнкюч берген жангыз финанс учреждения болгъанлай къалады», - дегенди Банкны правленини председатели Борис Листов.

 «Бизден алгъан ёнкюч ахчала  инвестиция магъанасы болгъан ишлеге (къурулушха, тахта кёгетлени сакъларгъа деп ишлерик жерлеге, малла тургъан уллу комплекслеге, техниканы эм малланы сатып алыргъа)  эм ишлерин тохтатмай бардыргъа да бёлюнеди. Финансланы ёлчемлерин кёбейтиу асламысында эл мюлкде уруннганлагъа аланы алыргъа да тынч болгъаны бла байламлыды», - дегенди Къабарты-Малкъар Республикада филиалны таматасы Алим Сокуров.

 Бизни корр.