Къачан да тырныауузчу ауур атлетле атларын айтдыргъанлай тургъандыла. Аланы араларында Олимпиада оюнланы призёрлары, дуния, европалы эм россейли чемпионатлада хорлагъанла бола келгендиле. Аккайланы Хажимуратны, Рагнета Карданованы, Геккиланы Таукъанны эм Чингиз Дахкильговну атларын билмеген хазна адам болмаз.
Алай ол жетишимледен бери спортну бу тюрлюсюнде артыкъ жарыкъ жулдузла эсленмегенли иги кесек болады. Шёндю уа Элбрус районну Олимпиада резервли спорт школуну Жанхотия элдеги бёлюмюнде Гюлюйланы Тамерлан бла Багъатырланы Таулан, ахшы кёрюмдюле болдура, жарау этедиле. Кёп болмай, ала Польшада бардырылгъан Европаны биринчилигине къатышып, кеси ауурлукъларында «домммакъла» къытхандыла. Бу эришиуде ала кеслерини Россейни биринчилигинде болдургъан кёрюмдюлерин игилендирген окъуна этгендиле. Жашланы тренер Муаед Шаов юйретеди.
Тренер айтханнга кёре, бу секциягъа беш жыл алгъа келгенди. Ол кезиуде жашчыкъгъа  жаланда 10 жыл бола эди.  Таулан итиниулюгю, тёзюмлюгю бла да айырмалы эди. Бу жолгъа дери ол республиканы биринчилигинде бир ненча кере хорлагъанды. Россейли даражада да быйыл биринчи кере къарыуун кёргюзтгенди. Анда да доммакъ майдалгъа тийишли болгъанлыкъгъа, жыйымдыкъ команданы тамата тренери аны Польшагъа алыргъа сюйгенди. Багъатыр улу командагъа майдал келтирип, салыннган борчну толтургъанды дерге боллукъбуз. 
Гюлюйланы Тамерлан да сынамлы атлетди. Ол секциягъа Тауландан эки жыл алгъа келгенди.  Кёп кере Россейни школчуларыны араларында бардырылгъан спартакиадаланы призёруду. Россейни биринчилигинде  ол да «доммакъ» къоллу болуп, Европагъа алай атланнганды. Онжети жыллары толмагъанланы араларында эрише, Гюлюй улу да ючюнчю болгъанды. Бюгюнлюкде ол къыралны жаш тёлю командасыны санында  Сауд Аравияда ётерик дунияны биринчилигине хазырлана турады.  

Темирланы Анатолий.
Суратда: Таулан бла Тамерлан тренерлери бла