Россейни Жамауат палатасыны ЖКХ, къурулуш эмда жолла жаны бла комиссиясыны таматасы Игорь Шпектор Къабарты-Малкъаргъа келип, эки кюн тургъанды. Ол КъМР-ни Правительствосуну Председатели Мусукланы Алий бла тюбешгенди эмда аны бла регионну жашау журтла-къурулуш мюлкюню объектлерин  жангыча ишлерге кёчюрюуню, жамауат контрольну кючлендириуню, къыралны бла энчи иелени араларында бирге ишлеуню къыйматлы амалларын кенг хайырланыуну онгларын сюзгенди.
Ушакъны кезиуюнде дагъыда бу бёлюмде инвестициялагъа тап онгла къурауну, ЖКХ-ны жумушларын тамамлауну, жашау журтлагъа оноу этиуню игилендириуню, башха затланы юсюнден да сёлешиннгенди.

Андан сора Россейни Жамауат палатасыны келечисини, КъМР-ни Правительствосуну Председатели – инфраструктура эмда цифралы айныуну министри Владимир Болотоковну, КъМР-ни Жамауат палатасыны таматасы Хазратали Бердовну, КъМР-ни Парламентини депутатларыны, тийишли министерстволаны бла ведомстволаны, районланы бла шахар округланы, ресурсла бла жалчытыучу организацияланы, управляющий компанияланы,  журтланы иелерини биригиулерини башчыларыны да къатышыулары бла уллу кенгеш бардырылгъанды.  Анда таза эмда кир сууланы муниципал ара системасын жангыртыугъа, кёп фатарлы юйледе барысы да хайырланнган ырысхыгъа тынгылы ремонт бардырыуну качествосуна, оюлургъа къоркъуулу журтлада  жашагъанланы аладан  кёчюрюуге, шахарланы бла эллени санитар болумларына, кир-кипчикни жыйыугъа, аны жангыдан жарашдырыугъа энчи эс бурулгъанды.
Дагъыда тарифле тюз тохташдырылыргъа, управляющий компанияла борчларын толтуруугъа бютюн жууаплы кёзден къараргъа, ала лицензия излемлеге келишгенлерин бла къалгъанларын тинтирге, сакъатлагъа эмда эркин жюрюр амаллары болмагъанлагъа жашау магъаналы жумушла бла жалчытхан объектлеге  барып, жумушларын тамамларча онгла къураргъа кереклиси къаты айтылгъанды.
Кенгешде сёлеше, Игорь Шпектор шахарланы айбатландырыуда, аланы заманны излемлерине келиширча этиуде Къабарты-Малкъар ахшы сынау жыйышдыргъанын айырып айтханды.
-Кеси тийрелеригизге алай  къайгъыргъаныгъыз ючюн уллу ыспасха тийишлисиз. Аллай ишлеге деп республикагъа жиберилген бюджет ахча къалай хайырланнганыны, жамауат жерлени, майданланы, скверлени, орамланы, паркланы юслеринден айтханда,  башха регионла юлгю алырчадыла.
Болсада ЖКХ-да болумну саулай алгъанда, болжалгъа салмай тамамларгъа керек болуп тургъан ишле бардыла. Биз жашау журтла-коммунал инфраструктураны ишлеп тургъан объектлерине, тазалаучу сооружениялагъа, республиканы бир-бир районларында кёп фатарлы юйлеге тынгылы ремонт къалай этилгенине къарагъан заманыбызда этген эсгертиулерибизни, кемчиликлени тюзетиуню биз юйретген амалланы правительство эсге алыр эмда бу бёлюмде ишни андан ары игилендире барыргъа тийишли мадарла этер деп ышанама,-дегенди  Россейни Жамауат палатасыны келечиси.