Бу кюнледе Лескен районну Ташлы-Тала элинде жангы школ окъуучулагъа эшиклерин кенг ачханды. Шёндюгю излемлеге келишген, ариу, битеу окъуу керекле бла жалчытылыннган учреждение «Билим бериуню айнытыу» къырал программаны «Школгъа дери эм битеулю билим бериуню айнытыу» подпрограммасыны чеклеринде ишленнгенди.
18 январьда уа аны къууанчлы халда ачылыууна РФ-ни Кавказны ишлери жаны бла министри Сергей Чеботарев бла КъМР-ни Башчысыны къуллугъун толтургъан Казбек Коков да къатышхан эдиле. Ала сабийлени эринмей, уллу кёллю болмай окъургъа, жетишимли болургъа, устазланы уа кючлерин, билимлерин аямай, ёсюп келген тёлюню юйретирге чакъыргъан эдиле. Алай болуруна уа энди битеу онглары барды. Эки къатлы школда 14 класс, библиотека, спорт эм актовый залла, ашхана, административ отоула бардыла.
Школну директору Цаколаны Жамиляны бизге айтханына кёре, баш кюнден дерсле жангы мекямда бардырыладыла. Школ ишленнген кезиуде уа, къурулуш а былтыр апрельде башланнганды, элни Маданият юйюнде кечиннгендиле. «Анда эки сменнге ишлерге тюшгенди. Жангы школ эрттеден да сакълагъан жумушубузду, битеу элге да уллу саугъады. Эски мекямда 60 жыл окъутгъанбыз, алай ол ахырда жараусуз халгъа жетген эди. Сабийле уа хар кюн да сора эдиле, къачан ишлерикдиле бизге жангы школ деп. Энди уа къууанып кёкге жетерча болгъанбыз. Баш кюн окъуучуланы бетчиклери къалай жарыгъанларын кёрюрге керек эди»,- дегенди ол бизге.
Мында окъутууну шёндюгю излемлеге кёре бардырыргъа битеу амалла къуралгъандыла: компьютерле, интерактив доскала, проекторла да бардыла. «Бизни ашханабызгъа ушаш республиканы бир школунда да болмаз: сауутла жуугъан машинадан башлап, битеу керекле бардыла. Спортзалда уа жууунурча жер окъуна къуралгъанды. Медицина кабинет да ишлейди, анга лицензия да алгъанбыз. Аны бла бирге уа стоматология кабинет къураргъа муратым барды. Бюгюнлюкде элде тишлени багъаргъа онг ахырда жокъду. Врачны район администрация тапдырыргъа хазырды. Шёндю уа Саулукъ сакълау министерство бла кабинетни, оборудованияны юслеринден сёлешиуле бардырабыз, онг болса, болушургъа сёз бергендиле. Бу жумушну тамамлаялсакъ, ол сау элге да жарарыкъды»,-деп белгилегенди школну башчысы.
Ташлы-Талада бир заманда да сабий сад болмагъанды. Алай школ ачылгъан кюн Сергей Чеботарев жууукъ заманда бу кемчилик кетериллигин билдиргенди. Жамиля Тахировнаны бизге айтханына кёре, бюгюнлюкде тийишли документле хазырланадыла. «Бу жумушну да къолгъа алгъандыла, быйыл апрельде къурулуш башланырыгъы белгиленеди. Анда уа 60 балагъа жер боллукъду.
Ол да бек магъаналыды. Нек десенг сабийчикле биринчи классха хазыр болмай келедиле. Башланнган школну окъутуу программасы уа къыйынды, болсада устазларыбыз сынаулу, кючлю болгъанларыны хайырындан башхаладан артха къалмайбыз»,-деп къошханды ол.
Цаколаны Жамиля ташлы-талачыланы атларындан бу уллу ишни толтургъан «Нальчикни къурулуш материалланы заводу» подряд организацияны таматасы Гемуланы Келлетге эмда ишчилеге ыразылыгъын айтханды. «Кёпле ийнаннган да этмей эдиле районда жангыз таулу элде быллай аламат школ ишлениригине. Документле хазырлап, тилекле жазып кёп кюрешгенбиз. Гемуланы Келлет а 9 апрельде техникасын да алып келеди да, ма шёндю уа кёресиз къаллай ариу мекям сюелгенин. Бек огъурлу, иш кёллю адамладыла барысы да, сау болсунла. Бир кемчилик, жетишмеген зат жокъду школну ичинде»,-деп чертгенди ол.
Ахыры 2-чи бетдеди.
Ахыры.
Аллы 1-чи бетдеди.
Устазланы юслеринден да энчи айтханды Цаколаны Жамиля. Аланы асламы тамата тёлюню келечилеридиле: барысы да сынаулула, билимлиледиле. Жаш специалистле да бардыла – жети устаз. «Дагъыда коллективни жартысы эр кишиле болгъанларын айтыргъа сюеме, аны хайырындан а низам да кючлюдю, бир тюрлю къаугъа, даулаш да болмаучуду, сабийле уа алагъа бек тынгылайдыла»,-дегенди ол.
Бюгюнлюкде къыралда билим бериу сферада тюрлю-тюрлю грант программала, конкурсла къураладыла. Мекям эски болгъаныны хатасындан а устазланы алагъа къатышыргъа онглары болмай тургъанды. Алай, Жамиля Тахировнаны айтханына кёре, мындан ары бу кемчилик кетерилликди: «Жаланда «Жылны устазы» деген республикалы конкурсха къатышалыучу эдик, бизни устазыбыз Гумайланы Илияс 2011 жылда аны федерал бёлюмюне да чыгъгъан эди».
Бу кюнледе уа школну «Ас-Салам» миллет тепсеу ансамбли Сочиге барады, шёндю жолгъа хазырлана турадыла жаш артистле. «Анда «Х-Dens» деген халкъла аралы конкурс боллукъду, республиканы анда жангыз биз кёргюзтебиз. Ансамбль къуралгъанлы уа бир жыл толгъанды, аны башчысы Байсыланы Илиясды. Анда жетишимли болурбуз деп бек ышанама. Энди уа бизни быллай уллу федерал программалагъа, окъутуу конкурслагъа къатышыргъа онгубуз боллукъду»,-деп ёхтемленип чертгенди бизни ушакъ нёгерибиз.
Ташлы-Таланы орта школун бошагъанла уа республикада, къыралда да вузлагъа киредиле. «Бир къырал экзамен бизнича элледе окъугъан сабийлеге билимни кенг жолларын ахчанды. Ол бардырылгъан жылланы ичинде уа бир сабийибиз да эки белги алмагъанды, аттестатсыз къалгъаныбыз да жокъду. Жашларыбыз а аскер усталыкъны сайлайдыла асламында. Шёндю экиси Пермьде ол жаны бла вузну бошай турадыла. Москвада, башха уллу шахарлада да окъуйдула выпускниклерибиз. Бири уа Къазахстанны Халкъла аралы байламлыкъланы институтуна киргенди, медицина усталыкъны сайлагъанла да бардыла. Аны айтханым, окъуучуларыбыз жашауда кеслерине тийишли жер табадыла, ол а бек магъаналыды»,-дейди Жамиля Тахировна.
Ушагъыбызны ахырында ол «Заман» газетни окъуучуларына саулукъ, жетишимле тежей: «Ма быллай къууанчлы жумушла кёп болсунла тау эллерибизде»,-дегенди.
Тарихлени юслеринден айтханда уа, мекямны кенглиги 2,6 минг квадрат метрден асламды. Къурулушха орта эсеп бла 110 миллион сом къоратылгъанды. Ахчаны 93 проценти федерал бюджетден берилгенди. Бюгюнлюкде уа анда 120 окъуучу барды, ол санда ючеулен Огъары Лескенден келтириледиле. Бу ишде уа школ автобус да уллу болушлукъду.
