КъМР-де ич ишле  министр полицияны генерал-майору Василий Павлов ведомствону ветеранлары бла тюбешгенди. 
Жыйылгъанланы алгъышлай, ол ахыр жыллада полициячыланы къуллукъ этиу болумларын игилендириу, ич ишле органлагъа ышаныулукъну, бу усталыкъны даражасын  кётюрюу жаны бла къаллай мадарла толтурулгъанларыны юсюнден айтханды. Ол быйыл бир ненча ведомстволу мекям хайырланыргъа берилгенин юлгюге келтирип, алай бла право низамны сакълаучулагъа борчларын толтурургъа шёндюгю болумла къуралгъанларын билдиргенди. 
 Василий Павлов былтыр 7-чи номерли школда полицияны кадет классы къуралгъанын да эсгертгенди. Жангы окъуу жылда уа энтта бир класс ачылгъанды. «Республикада кадет къымылдауну андан ары айнытыргъа, кенгертирге муратлыбыз. Право низамны сакълаучуланы жангы тёлюлерин юйретиуде, аланы Ата журтубузну аллында жууаплылыгъыбызны ангылатыуда сизни профессионал билимигиз, сынауугъуз артыкъда магъаналыды»,-дегенди министр. 
Тюбешиуде право низамны сакълаучуланы жаш тёлюсюн адеп-къылыкъгъа юйретиуню юсюнден да баргъанды сёз.  «Барыбыз да къадалып ишлесек, къуллукъларына кертичи, законлагъа хурмет этген инсанланы ёсдюрлюгюбюзге ишеклигим жокъду. Республикада право низамны, тынчлыкъны, къоркъуусузлукъну сакълауда къолдан келгенни этерге хазырбыз»,-деп къошханды Василий Павлов.
Министр ведомствону медико-санитар бёлюмюню ишин игилендириуню, полициячыланы, ветеранланы саулукъларын сакълауну качествосун ёсдюрюуню юслеринден да айтханды. 
 Жыйылыуда ич ишле органланы ветеранларыны советини башчысы Борис Думаев, алгъыннгы полициячыла Жаболаны Жабраил, Алик Шоров, Александр Савинов да сёлешгендиле. 
Ахырында министр ветеранла мындан ары да профилактика жумушлагъа тири къатышырыкъларына ышаннганын айтып, алагъа саулукъ, мамырлыкъ, къолайлыкъ тежегенди. 

Тикаланы Фатима 
хазырлагъанды.