Къабарты-Малкъарны премьер-министри Мусукланы Алий КъМР-ни Правительствосунда «Шёндюгю шахар болумну къурау» деген баш магъаналы проектни толтурууну жалчытыуну жаны бла ведомствола аралы комиссияны жыйылыуун бардыргъанды. Анда  проектге кёре 2018 жылда тамамланнган ишлени эсеплери чыгъарылгъандыла. Аны чеклеринде 90 арбаз, адамла кёп санда солугъан 21 жер, тёрт да парк тапландырылгъандыла.
Жыйылыуда быйыл муниципал къуралыуланы бюджетлеринде программаланы толтуруугъа субсидияла бериуню юсюнден да баргъанды сёз.  Республиканы муниципалитетлерине къатышырыкъ регион программаны жашауда бардырыугъа 262 миллион сом чакълы бёлюннгенди. «Федерал ара берген онгланы толусунлай хайырланыргъа керекбиз. Битеу къурау ишле къысха заманны ичинде толтурулсунла»,-деп буюргъанды Мусукланы Алий.
   2024 жылгъа Къабарты-Малкъарда болумлары артыкъ доюн болмагъан шахарланы санын 60 процентден асламгъа къысхартыргъа белгиленеди.